ISSITTUMI SAKKUTOOQARFIUP QULLERSAQARFIA
Sakkutuut naalagaat Søren Andersen: Najuuffitsinni suleqateqarluarneq uagutsinnut pingaaruteqarpoq
Issittumi Sakkutooqarfik, Arktisk Kommando siornatigut inuit sulisinnaasutigut aningaasatigullu sumiiffimminni pilersitseqataasareerpoq, sulili annertunerusumik tamanna pisussanngorpoq, isumaqatigiissutip ilassutaa 2 atuutilerpat, taama oqarpoq Arktisk Kommandomi pisortaq, Generalmajori Søren Andersen.
Maani Arktisk Kommando, 80-it tikillugit sulisulik, ullumikkut pingaarnertut inissisimaffeqarpoq. Illu issimaffigisaat mikivallaarpoq sumiiffimmi ulikkaavissumi, taamaattumillu Arktisk Kommando sumiiffinni assigiinngitsuni Nuummi allaffeqarfiusinnaasunik arlalinnik attartortariaqarpoq. Tattoqisaannerup saniatigut pitsaanerpaamik qitiusoqarfik qarasaasiatigut isumannaallisaanermik cyber-sikkerhedimik pilersitsisinnaanngilaq.
Asseq toqqorsivimmit: Leiff Josefsen
Arktisk Kommandop Nuummi sulisui patajaatsumik akuulluartuupput, tamannalu ilaatigut pissutigalugu qullersaqarfimmi sulisussanik pissarsiniartarnera aammalu sulisunik pioreersunik najumminnissinnaanera ajornannginneruvoq.
- Suli pitsaanerulissaaq, nammineq qullersaqarfeqalerutta, ataatsimoorluta inissisimassagatta, maannakkutut sumut tamaanga siammarsimanata, isumannaallisaanermi qaffasissuseq, pingaartumillu qarasaasiatigut isumannaallisaanermi qaffasissuseq annertuumik pitsanngoriassaaq, Arktisk Kommandomi pisortaq, Søren Andersen, naqissusiivoq.
Sumiiffimmi akuuneq
Søren Andersenip isertuutinngilaa Arktisk Kommandomi sulisut Nuummi najugaqarnertik naammagisimaarlugulu nuannarigaat:
Arktisk Kommando-mi pisortaq, Generalmajor Søren Andersen
Assiliisoq: Oscar Scott Carl
- Issittumi Sakkutooqarfimmi atorfinitsitsiniaanermi sulisooreersunillu najumminnissinnaassuseqarnerput pitsaasumik ingerlapput. Illoqarfimmi ilaavugut sumiiffimmilu innuttaasut pitsaasunik attaveqarfigalugit. Sumiiffimmi tunngavissaqarluarneq atorfinitsitsiniartarnermi sulisooreersullu najummaannarnissaannut periarfissat annikitsuararsuusimassagaluarput Issittumi Sakkutooqarfiup qullersaqarfia inuilaarsuarmiitinneqaraluarpat, soorlu assersuutigiinnarlugu tusaasakka malillugit ilaasa kissaatigisaattut Kangilinnguaniitinneqaraluarpat taamak periarfissaqarnavianngikkaluarpugut.
- Tamatuma saniatigut aamma politikkikkut oqaluuserineqartoq tusaasama ilagaat ilaquttagut ilagalugit maanga nuuttartugut. Aap, taamaappoq, nuummilu sulisutta nuliaasa, uiisa aappaasaluunniit suliffissaqartarput ilinniakkaminnut piginnaasaminnullu tulluartumik, assersuutigalugu nakorsatut, peqqissaasutut, ujarassiuutut ilinniartitsisutullu sulilertarnerat ajornannginneruvoq, Arktisk Kommando sumiiffimmi inoqanngitsumi avinngarusimasumilu inissisimagaluarpat, aamma tamanna periarfissaanngikkaluarpoq.
Issittumi Sakkutooqarfiup najuunnera sumiiffimmi suliffeqarfiit iluaqutigaat
Arktisk Kommando-p qullersaqarfiani sulisut atugarissaarnissaasa saniatigut, suliffeqarfiit sumiiffimmiittut, soorlu kiffartuussinermik pilersitsisinnaasut AK-mut aamma pisariaqarput, Arktisk Kommando-mi pisortaq oqarpoq:
Generalmajor Søren Andersen sulisut atugarissaarnissaannik peqataanerminnillu Kalaallit Nunaata Arktisillu illersornissaanni naammagisimaarinnippoq. - Tamanna pisinnaavoq Nuummilu qullersaqarfeqaratta, oqarpoq.
Foto: Oscar Scott Carl
- Maanna Nuummi, suliffeqarfiit maaniittut suleqatiginissaat uagutsinnut pingaaruteqarpoq, kiffartuussinermillu pilersitsisinnaasut arlallit atorpagut. Assersuutigiinnarlugulu Nuummi umiarsualivimmi umiarsuaq nakkutilliissut Ejnar Mikkelsen Nuummi amutsivimmut qaqitsipparput, amutsivimmut qaqitsineq pilersaarutaasumik siullerpaamik taamaalilluta aqqusaarparput. Aamma amutsivik atulaartuartarparput, assersuutigalugu, atortutta arlaannik ajortittoqaraangat.
- Amutsivimmik atuinitta saniatigut, suliffeqarfiit maaniittut aamma atorluartarpagut, assersuutigalugu Air Greenlandimut ikigisassaanngitsunik aningaasalersueqataavugut, annaassiniarnerit SAR-operationit immikkut eqqarsaatigalugit, kisiannili aamma assartuinermi suliassanut RAL atortarparput aamma Polaroil atugaraarput, tamakkulu saniatigut aamma sumiiffimmi nammineq pisariaqartitannik imaaliallaannaq pisiniarsinnaanera pisariinneruvoq.
Taamaakkaluartoq, periarfissat suli amerlanerusut takkutissapput, illersornissamut isumaqatigiissummi immikkoortoq 2 atuutilerpat. Ilanngullugu assersuutigalugu oqaatigisinnaavara aamma Issittumi Sakkutooqarfimmit Arktisk Kommandomit sapaatip akunnerata siuliani aamma inuussutissarsiornermut saqqummersitsinermi peqataavugut, tassani aamma sammineqarpoq qanoq iliorluni aningaasat milliardilikkaat ilaat suliffeqarfinnut maaniittunut iluaqutaasinnaanersut.
- Qanoq iliorluta milliardilikkaat ilaat kalaallit suliffeqarfiutaannut iluaqutaasinnaappat? Tassa taanna sammisaraarput, isumaqatigiissummimi aamma allassimavoq, aammalu suliffeqarfiit peqatigalugit pitsaasumik suleqatigiinneq ingerlareersoq nukittorsassavarput. Taanna aamma isumaqarpunga siunissami annertunerujussuarmik takusinnaassagipput.
