Sapiitsuliortut politiinit nersorneqartut

Nukaq Barselajsen, Nuka-Minik Sandgreen, Anda Sandgreen, Nikolaj Samuelsen tassaapput politiinit nersorneqarlutik akissarsitinneqartut 14-iusut ilaat. Kalaallit Nunaannit Politiit taama nalunaarput.

- Politiit inuit inunnik allanik annaassiniarlutik imaluunniit politiinik ikiuiniarlutik immikkorluinnaq ittumik iliuuseqarsimasunik nersorinnittarneq ileqqorivaat, politiit Facebookimi quppernerminni allapput.

Akissarsitinneqartut tamarmik allat ikiorniarlugit namminneq isumannaatsuunissartik tunulliullugu iliuuseqarsimapput.

- Tamassi nersornartumik innuttaaqataasutut pisussaassuseqarlusi tupinnartumik piginnaassuseqarneq, aalajangiissuseqarneq suleqatigiinnerlu pisuni ilungersunartuni takutipparsi, nalunaarummi allassimavoq.

Ullumi inuit nersornaatinik pinnattut: Nukaq Barselajsen, Nuka-Minik Sandgreen, Anda Sandgreen, Nikolaj Samuelsen, Kasper Mortensen, Brian Andersen, Daniel Lyberth, Hans Karl Therkelsen, Mikkel Filemonsen, Jørgen Broberg, Nikki Rosing, Farta Mørch, aamma politiini sulisut: Theodora Rosing-Zethsen aamma Nukannguaq Lennert.

Taamak nersorinninneq allagartannguamik annertunngitsumillu akissarsisitsinermik pisarpoq.