Sermitsiap assiliisartua nutaamik nersornaatisisoq

Arfininngornermi Tusagassiuinermi Sulisut Peqatigiiffiata, TP-p nersornaataa Kajumissaat Elna siullermeerluni tunniunneqarpoq.

Assilisanik tusagassiortoq Oscar Scott Carl, Sermitsiami atorfeqartoq tigusisuuvoq.

Taanna alutornartumik kusassagaanngitsumillu assiliisarnini pillugu aamma suliffimmi tusagassiorfiup Sermitsiap isikkuanik allannguinini pillugu kajumissaaserneqartoq, TP tusagassiorfinnut nalunaarummini allappoq.

Kalaallit danskillu aallartitaasa USA-p nunanut allanut ministerianik vicepræsidentimillu januaarimi naapitsineranni oqaluttuarisaanermi pingaarutilimmi ilaatigut Oscar Scott Carlip assiliisuuffigigaa, Tusagassiuinermi Peqatigiiffik allappoq.

Taamattaarlu allaaserinnikkiartorluni Kalaallit Nunaanni angalavoq, ilaatigut nunatta kangiani, tassanilu inuit naligalugit ammalluni ataqqinnillunilu naapikkai, TP tikkuaavoq.

- Inunnik naapitsinermini pisunillu ingerlatitseqqiinermini, ilaatigut aamma oqaluttuarisaanermi pingaarutilinnik pisuni, Oscar Scott Carlip allaanerusumik kusassagaanngitsumillu saqqummiisarpoq, Erik Olsen Kajumissaat Elnamik tunniussinermi naliliisartut sinnerlugit oqarpoq.

Nersornaaserneqarnermigut Oscar Scott Carl suleqatiminut, atuartartunut nutaarsiassanillu isiginnaartunut suliaanik tunniusimaneranillu nersorneqarpoq.

Tusagassiortoq toqoreersoq atsiunneqartoq

Kajumissaat Elna Tusagassiuinermi Sulisut Peqatigiiffiata arfininngornermi 28. februar ataatsimeersuarnerani tunniunneqarpoq.

Tusagassiuinermi Sulisut Peqatigiiffiata 2025-mi ataatsimeersuarnerani nersornaatip pilersinneqarnerata kingorna siullermeerluni tunniunneqarpoq. Nersornaat ilaasortanut ilaatigut Kalaallit Nunaanni tusagassiornermi immikkuullarissumik suliaqartunut tunniunneqartarpoq.

Kajumissaat Elna tusagassiortoq Elna Egede (1953-2024) toqoreersoq nersorniarlugu atsiunneqarpoq. Taanna tusagassiortarnermigut, erseqqissuliortarnermigut isorinnissinnaassuseqarnermigullu ilisimaneqarpoq.

Elna Egede TP-p ataqqinaammik nersortaataanik 2008-mi Dansk Journalistforbundillu Carsten Nielsen-legatianik politikerit atorfilittallu Nuummi piffinni pilerinartuni niuernermi akit ataaterujussuarlugit akikitsunik namminersorlutik oqartussat sulisunut inissiaanik pisiortornerinik qulaajaanera pillugu ukioq taanna aamma nersornaaserneqarpoq.