SIK-p ilaasortaasa ilaat aningaasarsiaqarnerulertussanngortut

Sulisartut SIK-p aamma Namminersorlutik Oqartussat kommunillu akornanni isumaqatigiissutaannik atuisut, ukiut marluk ingerlaneranni akissarsiaat 7 procentimik qaffattussanngortut, SIK allappoq. Siulittaasoq illuatungerisatik nalunaaruteqartinnagit oqaaseqarusunngilaq.

SIK-p siulittaasua, Jess G. Berthelsen, isumaqatigiissummik atsiortoq.

Assi: SIK

Andreas Wille Andreas Wille tusagassiortoq

Saqqummersinneqarpoq 20. Juuli 2026 - 09:16

Sulinermik Inuussutissarsiuteqartut Kattuffiat, SIK, pisortallu ukiunut marlunnut isumaqatigiissuteqarput. Sulisartut kattuffiat nittartakkamini allappoq.

- SIK aamma Namminersorlutik Oqartussat kommunillu sinaakkutaasumik isumaqatigiissuteqarput ukiut marluk ingerlaneranni akissarsiat katillugit 7 procentinik qaffaateqartussanngorlugit, kattuffik allappoq.

Tamanna kattuffiup siulittaasuata, Jess G. Berthelsenip, naammagisimaaraa nittartagaanni allaaserineqarpoq.

Ussassaarut

Kattuffiup avammut nalunaarutaa naapertorlugu Namminersorlutik Oqartussani kommuninilu SIK-p isumaqatigiissutai malillugit sulisuusut tamarmik akissarsiaat sulinerminnilu atugarisaat pitsanngoriaateqassapput.

Sermitsiap kattuffiup siulittaasua pitsanngoriaatit suunersut pillugit itisileeqqullugu attaveqarfigigaluarpaa. Jess G. Berthelsenilli illuatungerisatik, isumaqatigiissut pillugu avammut suli nalunaanngimmata, oqaaseqarsinnaanngikkallarluni ilisimatitsissutigaa. Namminersorlutik Oqartussat isumaqatigiissusiortoqarsimanera pillugu allaaserisap suliarineqarnerani nalunaaruteqanngillat. Taamaattumik isumaqatigiissutaasoq illuatungeriit aappaannaanit maannakkumut uppernarsarneqarpoq.

Kingumoortumik nalimmassaassasut

Sulinermi aningaasarsiat atukkallu pillugit isumaqatigiissutit immikkuualuttut 20-it missaanniittut uani pineqartut, siulittaasoq Sermitsiamut uppernarsaavoq. Ilaasortat isumaqatigiissummillu atuisut aningaasarsiaqarnerulernissartik piaakannersumik malugisinnaassagunarpaat. Aningaasarsiammi kingumoortumik iluarsineqartussaapput.

- Sinaakkutaasumik isumaqatiigiissutip imarisai ulluni aggersuni isumaqatigiissutinut aalajangersimasunut assigiinngitsunut ilanngussuunneqassapput, akissarsiallu kingumoortumik 1. apriili 2026-mit atuuttussamik iluarsineqassapput, SIK allappoq.