- Soorunami pakatsivugut, tassami itigartitsisoqarnera uagutsinnut isumaqarpoq 2026-p ilarujussua kilisaaterput tulanngasariaqartoq. Raajarniarnermut avaleraasartuunullu pisassiissutit kilisaammut ukioq kaajallallugu aalisarnissamut naammanngillat.
Sikuaq Trawl A/S-imi pingaarnertut piginnittoq pisortarlu Carl
Christensen Sermitsiamut taama oqarpoq.
- Soorunami pakatsivugut, tassami itigartitsisoqarnera uagutsinnut isumaqarpoq 2026-p ilarujussua kilisaaterput tulanngasariaqartoq. Raajarniarnermut avaleraasartuunullu pisassiissutit kilisaammut ukioq kaajallallugu aalisarnissamut naammanngillat.
Sikuaq Trawl A/S-imi pingaarnertut piginnittoq pisortarlu Carl
Christensen Sermitsiamut taama oqarpoq.
Siorna decembarip 12-ani allaaserisatsitut Sikuaq Trawl A/S
kilisaatini Svend C atorlugu Kitaani 2026-mi avataasiorluni
saarullinniarsinnaanermut qinnuteqarpoq.
Decembarip 19-ianni ingerlatseqatigiiffik Aalisarnermut, Piniarnermut
Nunalerinermullu Naalakkersuisoqarfimmit itigartinneqarsimavoq.
– Sikuaq Trawlimi pisassiissutit agguaanneqarnerannut atatillugu Naalakkersuisut Kitaani saarullittassiissutinik ingerlatseqatigiiffinnut nunanit allanit soqutigisaqarluartunut tunniussisarnerat kamaatigingaarparput, Carl Christensen oqarpoq.
Assi: Nammineq pigisaq
Sikuaq Trawlip missingiuppaa 2026-mi kilisaatini taamaallaat
qaammatit arfineq pingasut affarlu raajanik aamma avaleraasartuunik
kilisassinnaassallutik. Taamatut pisoqassappat ukioq mannamit 2027-mut
raajartassiissutinik nussuisoqarsinnaassanngilaq. Aammattaaq
Atlantikup avannaani avaleraasartoortassat siunissaat
nalorninartorujussuuvoq.
- Raajanik avaleraasartuunillu aalisartuaannarutta
siunissaq nalorninartoqarsinnaavoq, Carl Christensen oqarpoq.
100 procentimik nunaqavissunit pigineqartumit
ingerlatseqatigiiffik
Sikuaq Trawl A/S suliffeqarfiuvoq nunaqavissunit 100 procentimik pigineqartoq aningaasatigullu nukittuumik ukiorpassuarni inissisimalluartoq.
Carl Christensenip erseqqissarpaa Sikuaq Trawl raajarniutinit
tunisaqarnermi akigissaarnerpaajusarluni, inuttanilu
akissarsiaqartilluartarlugit. Taamaasilluni ingerlatseqatigiiffik
Kalaallit Nunaanni inuiaqatigiinnut iluaqutaasumik iliuuseqartuarpoq,
oqarpoq.
Ingerlatsisut nutaat
2026-mi Kitaani avataasiorluni saarullittassiissutit Naalakkersuisut decembarip 18-ianni agguaappaat. Pisassiissutit katillugit 16.000 tonsiupput. Pisassiissutit ingerlatseqatigiiffinnut arfineq-pingasunut agguaanneqarput, taakkunanngalu tallimat 2025-mi pisassiissutigineqarlutik.
Tamanna agguaassinermut nalunaarusiami Sikuaq Trawlip Aalisarnermut, Piniarnermut Nunalerinermullu Naalakkersuisoqarfimmit Sermitsiamut tunniussaani takuneqarsinnaavoq.
Ingerlatseqatigiiffiit Arctic Prime Fisheries ApS, M/Tr Claudia aamma Tuullik A/S ukioq manna Kitaani avataasiorluni saarullinniarnermik aallartitsipput.
Ukioq manna Kitaani saarullinniarsinnaanermut pisassiissutinik tunineqartut tassaapput Royal Greenland A/S, Polar Seafood Greenland A/S, Sigguk A/S aamma Qaleralik A/S.
Tunumi avataasiorluni saarullittassiissutit aatsaat 2026-p aallartinnerani, Kalaallit Nunaata Norgellu aalisarneq pillugu isumaqatigiinniarnerat naammassippat, Naalakkersuisunit agguaanneqassapput.
Carl Christensenip erseqqissarpaa, 2026-mi Kitaani sinerissap qanittuani saarullinniarsinnaanermut pisassiissutit ingerlatseqatigiiffinnut tamakkiisumik kalaallinit pigineqartunut soorlu M/tr Claudiamut aamma Tuullik A/S-imut tunniunneqarnerat naleqqulluinnartoq.
Sikuaq trawl a/s kamappoq
– Sikuaq Trawlimi pisassat agguaanneqarnerannut atatillugu Naalakkersuisut Kitaani saarullittassiissutit ingerlatseqatigiiffinnut nunanit allanit soqutigisaqarluartunut agguaanerat kamaatigilluinnarparput, Carl Christensen oqarpoq.
Tassani suliffeqarfiit Arctic Prime Fisheries ApS aamma Arsuk Food ApS pivai. Arctic Prime Fisheries ApS-imi siulersuisuni siulittaasuuvoq Islandimiu inuussutissarsiornermik ingerlatsisoq pissaaneqarluartoq sunniuteqarluartorlu Gudmundur Kristjánsson.
Kristjánsson Islandimi aalisarnermik ingerlatsivissuarmi Brim hf-imi piginneqataassusaa annerpaajuvoq. Arctic Prime Fisheries ApS tamakkiisumik Arctic Prime Coastal ApS-imit pigineqarpoq, taannalu Islandimiut ingerlatseqatigiiffiannit Línuskip ehf-imit pingajorarterutaanik pigineqarluni.
Hentzar Petersenip Qaqortumi najugaqartup Arctic Prime Coastal ApS-imi piginneqataassutit pingajorarterutaat marluk pigilerpai.
Arctic Prime amigartooruteqarfiusoq
Ukiumoortumik naatsorsuutit misissoqqissaaraanni takuneqarsinnaavoq Arctic Prime Fisheries sinneqartoorniarnermik ajornartorsiuteqartartoq.
Arctic Prime Fisheries ApS-ip ukiumoortumik naatsorsuutaani 2014-imiit 2024-mut akileraarutit ilanngaatigereerlugit arfineq-pingasoriarluni amigartooruteqarpoq.
Suliffeqarfik tamakkerlugu Arctic Prime Coastal ApS-ip 2024-mi ukiumoortumik naatsorsuutaani takuneqarsinnaavoq nammineq aningaasaatai 228 millionit koruuninik amingartooruteqartut.
Carl Christensenip tupigusuutigaa Arctic Prime Fisheries ApS Tunumi avataasiorluni saarullittassiissutinik amerlasuunik ukiorpassuarni pisassinneqartartoq aningaasarsiorsinnaasimanngimmat, ukiuni kingullerni amerlanertigut amigartooruteqartarmat.
Carl Christensen oqarpoq qularutiginagu kalaallit aalisarnermik ingerlatseqatigiiffiutaat Islandimi taama angusarlutsigingaluarpata, piffissap sivikitsup iluani nunamit anisitaassagaluartut.
Kalaallit Nunaanni aalisarnerup iluani ilisimaneqarluartoq
Savalimmiuni aalisakkerivissuup P/F JFK-p ingerlatseqatigiiffik Malik Seafood ApS aqqutigalugu Arsuk Food ApS 20 procentit inorlugit piginneqataaffigaa. P/F JFK-mi aqutsisoq piginneqataasorlu pingaarnerusoq, Hanus Hansen, Kalaallit Nunaanni aalisarnerup iluani ilisimaneqarluartuuvoq.
Hanus Hansen 2007-imi P/F JFK-lu Arctic Prime-mik aallartitseqataapput, tamatumalu kingorna P/F JFK Gudmundur Kristjánssonip ilaqutaasa suliffeqarfiutaannut 2014-imi piginneqataassutiminik tunisinissami tungaanut. 2007-imiit 2013-imut Arctic Prime Fisheries ApS ukiut tamaasa amigartooruteqarpoq, 2011 minillugu. Hanus Hansen Malik Seafood ApS-imi siulersuisuni siulittaasuuvoq, taannalu Arsuk Food ApS-imik piginnittuulluni.
Arsuk Food ApS-ip 2025-mi aalisariutaa Arsugaq Savalimmiuneersuuvoq, taamanilu Kvikk-imik taaguuteqarluni.
Imaatigut angallannermut aqutsisoqarfiup nittartagaani Skibsbladetimi allassimavoq umiarsuaq pigisimasani P/F Kvikk Arsukkami tamakkiisumik piginneqataaffigigaa. P/F Kvikk tamakkiisumik P/F JFK-mit pigineqarpoq. Kisianni Sermitsiap paasissutissaatai naapertorlugit umiarsuarmi piginneqataassutsip takutippaa P/F JFK piginneqataassutaasumiit Arsuk Food ApS-imi oqaaseqaataanerussasoq.
Carl Christensenip tupigusuutigaa Sikuaq Trawl A/S-ip saarullittassiissutinik tunineqarumannginnera aalisarsinnaanermik tunngavilersuuteqartillugu, Skibsbladetimili allassimavoq Arctic Prime Fisheries ApS decembarip pingajuanni akuerineqartoq islandimiut kilisaataat sikusiut Helga Maria Ilivileq-mik taaguutilimmut. Arctic Prime Fisheries ApS maanna marlunnik kilisaateeqarpoq Tasermiunik aamma Ilivileq-mik.
– Paasilluarsinnaavara Islandimi Savalimmiunilu kalaallit illaruaatigineqassagutta. Nunaqavissut ingerlatseqatigiiffii tamakkiisumik siuarsarnagit maanna saarullittassiissutit erlinnartut ingerlatseqatigiiffinnut nunanit allanit soqutigisaqarluartunut tunniunneqarput. Tamanna alianartumik quiasaarneruvoq, Carl Christensen taama oqarpoq.
Neriuutaarutinngillat
Saarullinnik pisassiissutit pillugit neriuutaaruppit?
– Naamerluinnaq, aalisarnermi isumalluartuujuaannartoqartariaqarpoq pissutsillu upperalugit. Isumaqarpugut ajunngitsumik siunertaqartumik suliniuteqartugut. Kalaallit Nunaanni aalisarnerup ineriartortinnissaa kissaatigigaanni taamaallaat suliffeqarfiit nunaqavissut pisassiissutinik tunineqartarnissaat silatusaarnerussaaq, Carl Christensen oqarpoq.
