Sikukip annertuumik umiarsualivimmik alliliinissamut sanaartortussaq toqqarpaa
KJ Greenland Nuummi talittarfimmik nutaamik 350 meterimik sanaartussaaq.
Umiarsualivinnik ingerlatseqatigiiffik Sikuki Nuuk Harbour kilisaatinut sakkutuullu umiarsuaannut akuleriimmik talittarfimmik (assip qeqqani) sanaartussaaq, talittarfillu 350 meterinik takitigisoq containerterminalimut 2017-mi sanaamut toqqaannartumik tallissutitut sanaartorneqassaaq, kilisaatinullu talittarfissaq 200 meteriussaaq 150 meterillu dual-usetut sakkuttut talittarfissaattut agguarneqarpoq.
Assi: Sikuki Nuuk Harbour
Sikuki Nuuk Harbour namminersorlutik oqartussanit pigineqartoq sanaartortitsisunik arlalinnik, Nuummi annertuumik umiarsualivimmik alliliinissamut soqutiginnittunut suliariumannittussarsiornermik ingerlatsivoq.
Neqeroorut ajugaassutaasoq KJ Greenland A/S-mit neqeroorutigineqartoq, illuatungeriillu maanna isumaqatigiissusiorniarlutik naapissasut, ingerlatseqatigiiffik tusagassiortunut nalunaarummini allappoq.
Suliniut talittarfimmut 350 meterisut takitigisumut tunngavoq, taannalu kilisaatit talittarfissaannut 200 meterimut dual-usemillu sakkutuut umiarsuaasa talittarfissaannut agguarsimavoq.
Niuernikkut umiarsuarnik angalanerit, kilisaatinik usingiaasarnerit, takornariat umiarsuaannik angallannerit, sakkutuut imarsiortut ingerlatsineri pilersuinermilu isumagisassat ukiuni kingullerni umiarsualivioreersumik tatisinerujartornerat pissutigalugu umiarsualivik tallineqassaaq.
Pisortaq isumaqatigiissummik nuannaarutiginnittoq
Sikuki Nuuk Harbourimi pisortap John Rasmussenip kalaallinik sanaartortitsisunik isumaqatigiissuteqarsinnaaneq nuannaarutigaa:
- Nuannaarutigaarput inernera, sanaartornissamut toqqarneqarsimasut KJ Greenland A/S-imut suliassamik tunniussisimaneranut. Neqeroorut tunngavigalugu umiarsualivik allisinnissaanut pisariaqartoq, aammalu siunissamut piviusunngortissinnaanissaanut toqqammavissaqarpugut, John Rasmussen oqarpoq imalu nangilluni:
- Umiarsualiviup allisinneqarnissaanut atuisunut tamanut iluaqutaassapput – inissaqarluartumik pitsaasumik, allanngorarsinnaassusermik annertunerusumik, kiisalu inuussutissarsiornermut, aalisarnermut, pilersuinermut, aamma upalungaarsimanermut atugassanik pitsaanerusunik pilersitsissallutik.
Sakkutuut talittarfissaannik isumaqatigiissut illersornissaqarfimmik isumaqatigiissutigineqartoq
2024-mi Sikuki Nuuk Harbourip containerterminalimik allilerinissamik suliariumannittussarsiuussineq, neqeroorutit tamarmik missingersuutigineqartunit annertunerunerat patsisigalugu taamaatiinnartariaqarsimavaa.
Kingorna ingerlatseqatigiiffiup pilersaarut nangittumik suliaraa, taamattaarlu illersornissaqarfimmut tunngasunik assigiinngitsunik pisoqarpoq, tamakkulu maanna sakkutuut umiarsuaannut talittarfimmik 150 meterimik pilersaarummut ilanngussisoqarnera kinguneraa.
Sakkutuut umiarsuaannut talittarfimmut tunngatillugu Sikuki Nuuk Harbour danskit illersornissaarfiannik taakku umiarsuaasa salliutinneqarnissaannik isumaqatigiissusiorpoq.
Umiarsualivimmik allilerineq 2028-mi novembarip qaammataani naammassineqarnissaa naatsorsuutigineqarpoq.
