Silaana suinnartoq? 

Seqineq, kiak aasarissuarlu.

Nunatta Kitaani sumiiffiit amerlanerpaat piffissaq kingulleq aasarissuupput. Ullulli kialaarfiullutillu seqinnisaarfiusut piffissaq tulliuttoq qaangiukkallassapput.

DMI taama ilimasaaruteqarpoq. Silali sooq allanngoriartornersoq ilimasaarutini takuneqarsinnaanngilaq.

Silap allanngortussanngornera sumik pissuteqarnersoq DMI-p Facebookikkut quppernera, DMI - Kalaallit Nunaat, iserfigigaanni  nassaarineqarsinnaavoq. Tassani silap sooq allanngornera silasiortup ima ilaatigut nassuiarpaa.

- Tallimanngornermi arfininngornermilu silaannaq isugutattoq kujataaniit ingerlaassaaq, siallissaaq. Putsilertassallunilu. Upernavimmi nuisseriartussaaq. Tunumi aamma silaannaq isugutannerusoq kujataaniit takkutissaaq, nuisseriartussalluni, siallililaartassallunilu. Ullullu seqinnariffiorfiusimasut annikilligassallutik, DMI-p saqqummiussaasa kingulliit ilaanni taama allassimasoqarpoq.

DMI aggusti ilanngullugu "Silasiortup oqaaseqaataa"-ni taama nassuiaasiortassaaq2026-mi aggustip tungaanut DMI ingerlaavartumik taamatut nassuiaasiortassaaq.

- Sila ulluugaluarpat unnuaagaluarpalluunniit qanoq issanersoq Kalaallit Nunaanni Facebookikkut quppernitsinni piffissami kingullermi sivisuumi ukkatarinikuuarput. Maanna silasiortup oqaaseqarneratigut annertunerusumik paasissutissiisarniarluta misilipparput, DMI-mi Issittumi Silasiorfimmi Sikusiornermillu Kiffartuussivimmi pisortaq Anna Christiansson oqarpoq.

Nassuiaat nuannarineqarluartoq

DMI Danmarkimi sila pillugu "Silasiortup oqaaseqaataa"-nik saqqummiussaqartareerpoq, oqaaseqaallu taanna DMI atuisunut neqeroorutaani nuannarineqarnerpaat ilagaat. Maanna aamma nunatsinni sila pillugu kalaallisut nassuiaasiortoqartalerpoq. Oqaaseqaat annertunerusumik nassuiaasiornissaq pisariaqartinneqaleraangat Facebookikkut saqqummiussisoqartassalluni.

- Silassamik ilimasaarutitsinnik malinnaasutsinnut ilisimasavut pissarsiariuminarnerulersillugit ingerlateqqikkusuppagut. Silassamik ilimasaarut oqaaseqaammi uteqqiinnarneqartassanngilaq, kisianni silap sooq allanngornissaa paasiuminartunngorlugu nassuiaatigineqartassaaq, Anna Christiansson oqarpoq.

"Allamik naalagaqanngilaq, silarsuaq kisimi naalagaavoq." Nipilersukkami taallap imaa taama imalik nunatsinni ilisimaneqarluarpoq. Taassumaannaalluunniit nunatsinni silap ulluinnarni qanoq aalajangiisuusartiginera uppernarsarpaa. Taamaattumik silap allanngoriartornera DMI-p "Silasiortup oqaaseqaataa"-ni annertunerusumik nassuiaateqarfigisassavaa.

Oqaaseqaatit silasiortunit sikusiortunillu allanneqartassapput. Oqaaseqaatit imaatigut angalasunut isumannaallisaanermik nukittorsaaqataassasut DMI-mit neriuutigaat.

- Kalaallit Nunaanni sila, imaq aammalu sikut imminnut ataqatigiipput. Silasiortutta sikusiortuttalu ilisimasatik paasiuminartumik saqqummiuttalerpatikkit sooq silap taama pissusilersornera innuttaasunut paasiuminarnerulissaaq, Anna Christiansson oqarpoq.