ULLORMUT NALUNAARUSIAQ
Sinersortaammut ilaasut ilaat hashimik nassataqariaraluartoq
Sinersortaammut Sarfaq Ittummut ilaasoq Nuummi umiarsualivimmi ilanngaaserisuniit marlunngornermi ullaakkut unitsinneqarpoq. Angut hashimik 1 kilo sinnerlugu paarisaqartutut unnerluutigineqarpoq. Politiit Qinngorpumi inimi naasumik cannabisimik aamma nassaarput.
Politiit ikiaroornartumut tunngasut marluk suliaat ullumi nalunaarusiami atuarneqarsinnaapput.
Assi: Oscar Scott Carl
Sarfaq Ittummut ilaalluni Nuummiit Kujataanukartussap nassataani hashimik nassaartoqarmat umiarsualivimmi ilanngaaserisuniit marlunngornermi ullaakkut unitsinneqarpoq.
Pisoq politiinut marlunngornermi nalunaaqutaq 08.51 nalunaarutigineqarpoq.
- Hashi kiilu sinneraa misissuinermi paasineqarpoq. Angut politiinit tigusarineqarpoq, hashimillu pigisaqartutut unnerluutigineqareerluni kingorna iperagaavoq. Suliaq inatsisitigut nalilersorneqaleruttorpoq, Kalaallit Nunaanni Politiini pigaartut pisortaat Aputsiaq Hansen Sermitsiamut oqarpoq.
Naasoq cannabis nalaatsornerinnakkut nassaarineqartoq
Nuup ilaani Qinngorpumi angerlarsimaffimmi tillinniartoqarsimasoq politiit marlunngornermi nalunaaqutaq 15.06 nalunaarfigineqarput. Tillinniarfigineqartoq savilersorfigineqarluni sioorasaarneqarsimavoq, pigisaanillu arsaarneqarluni.
- Politiit pasisat inaanukarput. Taakku aamma Qinngorpumiippoq, tassanilu misissuinermi tillinniat angerlarsimaffimini cannabisimik naasuuteqartut paasineqarlutik. Tillinniartutut pasisat cannabisimik naasuuteqartutut suliami unnerluutigineqarput, Aputsiaq Hansen oqarpoq.
Inuit taakku imminnut nalunngimmata tillinniartoqarnera nalaatsornerinnakkut pisutut isigineqanngitsoq, taassuma aamma oqaatigaa.
Ikuallattut pingasut — illoqarfinni pingasuni assigiinngitsuni
Kalaallit Nunaanni Politiit ikuallattoqarneranik pingasunik marlunngornermi aamma nalunaarfigineqarput. Illoqarfinni marlunni, Sisimiuni Paamiunilu, inissiaq ataaseq ikuallappoq. Ikuallannerni taakkunani inunnik ajoqusertoqarsimanngitsoq pigaartut pisortaat ilisimatitsissutigaa.
- Aamma Tasiilami qui ikuallattoq nalunaarutigineqarpoq, tassungalu atatillugu politiit takunnissimasinnaasut tusagaqarsimasunilluunniit attaveqarfigerusuppaat, Aputsiaq Hansen oqarpoq.
Politiit oqarasuaammut 70 14 48-mut attavigineqarsinnaapput.
