Siorapalummi innuttaasut igaassannik qerisunik piffissami sivitsortumi ullussaminnik
qaangiisimasunik, sulilu tuniniarneqartunik, pisiassaqarput.
Avannaata Kommuniani kommunalbestyrelsemi ilaasortaq, Siorapalummi Savissivimmilu
nunaqarfinni aqutsisunut ilaasortat peqatigalugit, Pilersuisup
aaqqiissutissaanik ujartuillutik tusagassiutitigut nalunaarutiminni allapput.
Siorapalummi innuttaasut igaassannik qerisunik piffissami sivitsortumi ullussaminnik
qaangiisimasunik, sulilu tuniniarneqartunik, pisiassaqarput.
Avannaata Kommuniani kommunalbestyrelsemi ilaasortaq, Siorapalummi Savissivimmilu
nunaqarfinni aqutsisunut ilaasortat peqatigalugit, Pilersuisup
aaqqiissutissaanik ujartuillutik tusagassiutitigut nalunaarutiminni allapput.
Siorapalummi nioqqutissaqarniarnikkut taamatut atugaqartoqarnera qinikkat
ernummatigaat.
Siorapalummiu aarleqquteqarpoq
Ajornartorsiut nutaajunngitsoq, taamaattoqartuaannartorlu, Siorapalummi
innuttaasup Patdloq Hendriksenip AG-mut oqaatigaa.
- Piffissami sivitsortumi pisiassat qaangiussimasut tuniniarneqarput.
Pisiassat ullussaminnik qaangiuttoorsimasut akikillilaamineqartarput,
ilaannikkullu akikillineqassanatik, naggataatigullu igiinnarneqartarlutik,
Patdloq Hendriksen oqarpoq.
Siorapaluup Pilersuisuani igaassat qerisut qaangiussimasut
eqqarsaatigalugit aaqqiissuteqartoqassasoq Patdloq Hendriksenip neriuutigaa.
Siorapaluup Pilersuisuani igaassat qerisut ilaat ullussaminnik 14.11.2025 qaangiisimasut suli tuniniarneqarput.
Assi: Maassannguaq Oshima.
- Uggornaqimmat pisiassat igiinnarneqartarnerat, igiinnarnagit
akikillilerlugit tuniniarneqarsinnaagaluarmata. Pisiassat ullussaminnik
qaangiisimasut akikillilerneqartaraluarpata, atorluarneqarlutik
igiinnarneqartassanngikkaluarput, taamaaliornerlu uagutsinnut Pilersuisumullu
iluaqutaasassagaluarpoq, Patdloq Hendriksen oqarpoq.
Qinikkat iliuuseqartoqarnissaanik kissaateqarput
Pisiassat soorlu igaassat qerisut, ullussaminnik qaangiisimasut qinikkat
maluginiarsimavaat. Tusagassiutinullu nalunaarutiminni kissaatigaat Pilersuisoq
piaartumik aaqqiissuteqaqqullugu.
- Nioqqutissatigut pilersorneqarfituatsinnut
Pilersuisumut inussiarnersumik sakkortuumillu piumasarivarput inuussutissanik
pisariaqavissunik immikkut ittumik tikisitsinissaq naammasseqqullugu, Ujuut
Olsen (S), Naduk N. Kristensen (S) aamma Maassannguaq Oshima (S) allapput.
Inuit peqqinnartunik inuussutissaqarnissaat pisiassaqarnissaallu
pingaaruteqartoq Ujuut Olsenip Avannaata Kommuniani kommunalbestyrelsimi
ilaasortap ilanngullugu oqaatigaa.
- Sungiusimaannalernikuuarput nioqqutissat
qaammaterpassuarni qaangiinikut inuussutissatut pisiarineqartarneri. Igaassallu
qerisut ullussaminnik qaangiisimasut peqqinnassusaat eqqarsaatigalugu
ernummateqarpugut. Qularnanngilaq Siorapaluk kujatitsinni inissisimagalurpat
pisiassat qaammaterpaalunnik qaangiinikut pillugit sakkortuumik
uparuartorneqangaatsiassagaluartoq, Ujuut Olsen naggasiivoq.
Siorapalummi nioqqutissat qerisut ullussaminnik qaangiisimasut pillugit,
Pilersuisoq qanoq aaqqissuteqarnissamik pilersaaruteqarnersoq AG-mit
paasiniaaffigaarput. Aaqqissuisoqarfimmiillu allaaserisap
naammassinerani suli akissutisinngilagut.
