Kalaallit Nunaanni inunnguuserinngisaminnik suiaassusillit immikkut ittumik katsorsartinnissamut inatsiseqartinneqartinneqaratillugu sullinneqannginnamik peqqinnissaqarfimmit naammaginartumik ikiorneqarneq ajorput. Kalaallit Nunaanni suiaassuseq apeqqutaatinnagu aappariinneq 2016-imi apriilip aallaqqaataani atuutilersinneqaraluartoq inunnguuserinngisaminnik suiaassusillit atugassartititaat pisinnaatitaaffiilu politikkimut tunngasutigut sumiginnarneqarnerat annertuvoq.
Kalaallit inunnguuserinngisaminnik suiaassusillit imminnut piviusumik inuunissamik takorluugaqarnertik nunaminnut angerlarsimaffimminnullu qimatsinissaminnut annernartumik attuumassuteqartittarpaat. Amerlasuut najukkami ikiorneqarnissamik amigaateqarnertik pissutigalugu eqqortumik ikiorneqassagunik nunanut allanut nuuttariaqartarput.
Kalaallit Nunaanni inunnguuserinngisaminnik suiaassusillit immikkut ittumik katsorsartinnissamut inatsiseqartinneqartinneqaratillugu sullinneqannginnamik peqqinnissaqarfimmit naammaginartumik ikiorneqarneq ajorput. Kalaallit Nunaanni suiaassuseq apeqqutaatinnagu aappariinneq 2016-imi apriilip aallaqqaataani atuutilersinneqaraluartoq inunnguuserinngisaminnik suiaassusillit atugassartititaat pisinnaatitaaffiilu politikkimut tunngasutigut sumiginnarneqarnerat annertuvoq.
Kalaallit inunnguuserinngisaminnik suiaassusillit imminnut piviusumik inuunissamik takorluugaqarnertik nunaminnut angerlarsimaffimminnullu qimatsinissaminnut annernartumik attuumassuteqartittarpaat. Amerlasuut najukkami ikiorneqarnissamik amigaateqarnertik pissutigalugu eqqortumik ikiorneqassagunik nunanut allanut nuuttariaqartarput.
- Inunnguuserinngisaminnik suiaassusillit uattut ittut, ingammik nunatsinni kusanartumi, ikiorserneqarneq ajornerat uggoraara. Inunnguuserinngisaminnik suiaassusillit tamarmiunngitsoq Danmarkimut nuunnissamut pisariaqartumillu katsorsarneqarnissamut periarfissaqarnerat maluginiartarpara, kalaaleq arnaq inunnguuserinngisaminik suiaassusilik Danmarkimut nuussimasoq Anguteeraq Jessen Larsen oqarpoq.
- Suiaassutsinnik allannguinissama saniatigut pilersaarusioqqaarnanga suliffissamillu piareersimasuuteqarnanga suliffinniit soraarlunga Danmarkimut nuunniarlunga aalajangerpunga. Kalaallit Nunaanniiginnaraluaruma qularnanngitsumik ulluinnarni nalinginnaasumik inuullungalu aalajangersimasumik suliffeqarsimassagaluarpunga, timerali suiaassutsinnut naleqqussarnissaa pingaaruteqarpallaartoq misigivunga, Miko Kongstad timini suiaassutsimut naleqqussarnissaa aallartinniarlugu aalajangernini ajornakusooraluarluni avaqqunneqarsinnaanngimmat Kalaallit Nunaat qimallugu Danmarkimut nuussimasoq oqaluttuarpoq.
Kalaallit Nunaata Danmarkillu akornanni ilisimasanik amigaateqarfiusumi unittooqqaneq
Nunap immikkoortuini suliatigullu assigiinngissuteqarneq amigaateqarnermik pilersitsimmat innuttaasut eqqugaasut isumannaallisaaffigineqanngilluinnarput. Inuiaqatigiinni inissaqartitsinnginneq tarnikkut peqqissutsimut qanoq sunniuteqartarpa? Maniitsumi atoqatigiinnermik ilisimasalik kingunerluutillu pillugit katsorsaasartoq Mette Scharling Laursen naapertorlugu Kalaallit Nunaanni peqqinnissaqarfiup amigaateqarnera inunnut pisariaqartitsisunut toqqaannartumik innarluunertut sunniuteqartarpoq.
- Immikkut ilisimasallit avatangiisitsinniittut tatigisinnaasariaqarpagut. Immikkut ilisimasallit peqqinnissaqarfillu pisariaqartitatta tunniunnissaanut akuerinissaanullu periarfissaqanngippata tamanna kingunerlutsitsingaartarpoq. Inuk aaqqissuussinermi nunarsuarmut piviusumut naapertuutinngitsumi ajortutut tikilluaqqusaanngitsutullu misigilertarpoq. Iluaqutaasinnaasut arlallit akornanniiginnarluni sumiluunniit naleqquttuunani misigisoqartarpoq, Mette Scharling Laursen erseqqissaavoq.
Kinguneri annertuut ikiorneqannginnerlu Miko Kongstadip ilisarisinnaavai. Kalaallit Nunaanni peqqinnissaqarfimmi sinaakkutissaaleqineq pissutigalugu ulluinnarni piareersimaffigineqanngitsumut kiserliorluni akiuuttarpoq. Miko Kongstad neqerooruteqannginneq inunnguutiginngisaminnik suiaassusilinnut nunatsinni najugaqaannartunut qanoq kinguneqartarnersoq aperineqarami qulanngilaq.
- Tamanna inuunerminnik piviusunngortitsisinnaannginnerannik suiaassutsikkullu kinaassutsimik ersersitsinertik naapertorlugu inuusinnaannginnerannik isumaqarpoq. Periarfissaannut killilersuisorujussuuvoq. Qanoq iliorluni suiaassutsimik allannguinissamut tunngatillugu ilisimasanik, siunnersuinermik tarnillu pissusaanik ilisimasalimmik ikiortissarsiorfissamik peqanngippat tamanna ajornartorsiuterujussuuvoq. Taamanikkut qanoq artornartigisimanersoq nammineq eqqaamavara – sumiluunniit periarfissarsiorsinnaananilu ikiortissarsiorsinnaannginneq. Artornaqaaq, Miko Kongstad oqaluttuarpoq.
Miko Kongstadip aaqqissuussaanerup iluatsinngitsoorneranik nammineq misigisimasaqarluarnera suliniuteqarneranut pissutaaqataasut pingaarnersaraat. Kinguaariit tulliuttut nammineq annernartumik aalajangiisariaqannginnissaat kissaatiginerpaavaa.
- Maannakkorpiaq Kalaallit Nunaannut uternissamut periarfissaqannginnama anniaatigalugulu uumitsaatigisarpara. Danmarkimi unittooqqasutut misigalungalu angerlarsertaqaanga. Suliffinniit soraartariaqarneq kiisalu nunagisannik ineriartortissimasannillu tamanik qimatsisariaqarneq artornartorujussuuvoq. Kalaallillu inunnguuserinngisaminnik suiaassusillit allat taamatut misigisaqartikkusunngilakka.
- Aammattaaq Danmarkimi najugaqarnera sivitsoriartortillugu kalaaliusutut misigiunnaariartuinnarama aliasuutigisarpara. Piffissaq ingerlatillugu Kalaallit Nunaat pillugu ilisimasakka ikiliartorput, tassanilu ikinngutinik ilaquttanillu ulluinnarni attaveqarneq annaaneqartarpoq, Miko Kongstad oqaluttuarpoq.
Siunissaq pillugu nalorninartorsiorneq
Paasissutissat pingaarutillit: TAGGISIT TAARTISSAAT
Isumaa: Taggisit taartaat tassaapput oqaatsit immitsinnut taagorluta atortakkagut (ass. angut arnarluunniit). Taggisit taartaat suiaassutsimut qanimut attuumassuteqaramik inunnguuserinngisaminnik suiaassusilinnut suiaassutsinullu pituttorsimanngitsunut pingaaruteqarput.
Taggisit taartaa suiaassuseqanngitsut: Suiaassutsinut pituttorsimanngitsorpassuit ataqqineqartutut misiniarlutik oqaatsit suiaassuseqanngitsut atorneqarnissaat kissaatiginerusarpaat. Oqaatsit nalinginnaanerpaat tassaapput „de/dem“ aamma svenskinit isumassarsiaasoq 'hen'.
Eqqoriaaginnarnak aperigit: Isikkukkut naliliisannginnissaq kattuffiup LGBT+ Danmarkip inassutigaa. Taarsiullugu ima aperigit: “Illit taggisit taartaat sorliit atorlugit taaneqarsinnaavit?
Eqqaamajuk: Aallaqqaammut kukkusoqartarnera ajunngilaq. Oqaaseq kukkusoq atorukku imminut naqqipallariarlutit oqaloqatigiinneq ingerlatiinnarsinnaavat.
- najoqqutaq: LGBT+ Danmark
Inunnguuserinngisaminnik suiaassusillit ullumikkut pas-imi CPR-normimilu kinaassutsiminnut naapertuuttumik normuliorsinnaallutik suiaassutsiminnik inatsisitigut allanngortitsisinnaagaluartut allaffissornermi aaqqissuussinerit suli danskit naalagaaffiannut attuumassuteqarput. Kisiannili nakorsaqarnikkut, tarnip pissusianut tunngasutigut peqqinnissaqarfimmi neqeroorutit pineqaraangata akisussaaffik Kalaallit Nunaanniippoq - tassanilu iliuuseqartoqarallarnavianngitsutut isikkoqarpoq.
Naalakkersuisut siulittaasuata Jens-Frederik Nielsenip Sermitsiamut allakkatigut akissuteqarnermini Kalaallit Nunaanni peqqinnissaqarfik ullumikkut pilattaasartunik immikkut ilisimasalinnik nunami tamatumani suiaassutsimik allanngortitsinissamik pilattaanissamut hormoninillu nakorsaanissamut pisariaqartunik nakorsaqanngitsoq nassuerutigaa.
- Pinngoqaatiginngisamik suiaassusillit ikiorserniaraanni qaffasissumik immikkut ilisimasallit assigiinngitsunillu suliaqartut ilisimasaat pisariaqarput, soorlu pilattaasartut, hormonilerisut, tarnip pissusaanik ilisimasallit peqqissaasullu misilittagaqarluartut. Piginnaasat taakku Kalaallit Nunaanni Peqqinnissaqarfimmi ullumikkut pigineqanngillat, Jens-Frederik Nielsen (D) allappoq.
Nassuiaat tamanna Miko Kongstadip akueriuminaatsippaa. Immikkut ilisimasanik amigaateqarneq politikkikkut iliuuseqarniarnerup kinguartinnissaanut atorneqartuaruni tunngavilersuutitut atorneqarsinnaanngilaq.
– Tamanna utoqqatsissutitut isigigajuppara. Inunnguuserinngisaminnik suiaassusilinnut neqerooruteqartoqarnersoq aperigaangatta nunatsinni peqqinnissaqarfimmi nakorsat pikkorissullu amigaataasut akineqartarpugut, Miko Kongstad peqqinnissaqarfiup ajornartorsiornera Naalakkersuisut utoqqatsissutigineraat aperineqarami oqarpoq.
Kalaallit inunnguuserinngisaminnik suiaassusillit qaqugukkut aalajangersimasunik sinaakkuteqalerlutillu pisinnaatitaaffeqalersinnaanersut peqqinnissaq pillugu isumaqatigiissutigineqartussaq apeqqutaammat Naalakkersuisut siulittaasuata oqaatigisinnaanngilaa. Oqaloqatigiinnerli aallartinneqareersoq taassuma naqissuserpaa.
- Peqqinnissaqarfimmi siuariartornerup annertusinissaa qulakkeerniarlugu Naalakkersuisut aamma suliniuteqartuarsinnarput, tamatumunngalu atatillugu soqutigisaqaqatigiit, ilaatigut Sipineq+ aamma Miko Kongstad, Kalaallit Nunaanni inunnguuserinngisaminnik suiaassusillit atugaat pillugit oqallinnermi qitiusumik oqaaseqartartoq, pisariaqartitat paasineqartut erseqqissarnissaat iliuuseqarfiginissaallu siunertaralugu oqaloqatigisimallugit, Naalakkersuisut siulittaasuat Jens-Frederik Nielsen allappoq.
Peqqinnissaqarfimmik pitsaasumik pilersitsinissaq sivisusinnaagaluarpoq, kisianni politikikkut piumassuseqartoqarpat suliassat tungaasigut akornutaasut sukkanerusumik qaangerneqarsinnaasut Miko Kongstad isumaqarpoq. Oqartussat sunarpiaq aqagu allanngortittariaqarneraat aperineqarami piumasaqaataa erseqqippoq.
- Kalaallit Nunaanni hormoninik nakorsaatinneqarsinnaanissaq ajornarunnaarsillugulu inatsisitigut akuerisanngortittariaqarpaat, aamma peqqinnissaqarfik avaqqullugu, Miko Kongstad kajumissaarivoq.
Miko Kongstad, assimiittoq, peqqinnissaqarfimmi neqerooruteqannginnermut aaqqiissutissanik toqqaannartunik siunnersuuteqarpoq: Oqartussat hormoninik nakorsaatinik nunanit allanit eqqussuinissaq akuerisariaqarpaat imaluunniit Danmarkimi Center for Kønsidentitet (CKI) qanimut suleqatigilertariaqarpaat.
Assi: Oscar Scott Carl
Inunnguuserinngisaminnik suiaassusillit katsorsarnissaannut neqeroorummik piviusunngortitsinissaq pisortanut unammillernaraluartoq Naalakkersuisut utoqqatsissutissarsiortariaqanngitsut Sipineq+-ip siulittaasuata Qillaq Olsenip erseqqissarpaa.
- Neqeroorutip pilersinneqarnissaanut siunnersuutinik peqqinnissaqarfimmut, peqqissutsimut naalakkersuisumut oqartussanullu attuumassuteqartunut allanut nassiussivugut. Pisariaqartunik ilisimasaqalerniarluta taakkulu aqqutigalugit katsorsartinnissamik neqeroorfigisinnaaniassagatta Center for Kønsidentitet-ip (CKI) suleqatiginissaanut tunngassuteqarpoq.
- Inunnut inunnguuserinngisaminnik suiaassusilinnut suliassat inuiaqatigiittut nammineq suliarisinnaannginnerarlugit utoqqatsissutissarsiortoqassanngilaq, Qillaq Olsen erseqqissaavoq.
Miko Kongstadimit
siunnersuutit pitsaasut
- Siullermik: Kisimiinngilatit. Siunnersuutiginerpaasara tassaavoq oqaloqateqarniarnissat inunnguuserinngisaminnillu suiaassusilinnik allanik attaveqarneq – Kalaallit Nunaanniikkaluaruit, Danmarkimiikkaluaruit nunaniluunniit allaniikkaluaruit. Nammineerlunga taamaaliorama Danmarkimi ataasiinnarmilluunniit allaqateqarsinnaanera qanoq iluaqutaatiginersoq tupaallaatigaara. Apeqquterpassuaqarpoq, attaveqarnerlu pingaaruteqarluinnarpoq, Miko Kongstad oqarpoq.
Miko Kongstadip politikkikkut siunissami nalorninartut peqqinnissaqarfiullu neqerooruteqannginnerata Kalaallit Nunaanni inuiaqatigiit ineriartorneranni aaqqissuussaanikkut ajornartorsiutaanerarpaa, tassani nipikinnerit tusaaniarneqannginnerusarput.
- Ikinnerussuteqartut sumiginnarneqartarput, assigiinngitsorpassuartigullu tunuartitaasarput. Neqerooruteqarnissamut ’Kalaallit Nunaanni ikippallaartugut' oqartussat oqaraangata tamanna tunuartinneqarnerannut ersiutaavoq. Inuiaqatigiinni pingaartinneqartutut isigineqanngitsutut misigisimalersitsisarpoq, Miko Kongstad nassuiaavoq.
