Sipineq+ pisinnaatitaaffiit atugarissaarnerlu pillugit nutaamik isumaqatigiissuteqartoq

LGBTQIA+-it pisinnaatitaaffii periarfissaallu naalagaaffeqatigiinnerup iluani assigiinngilluinnarput. Kalaallit Nunaanni pissutsit ilaatigut Danmarkimit peqqinnissaqarfimmut attaveqarluannginnerunermik, Folketingimi pisinnaatitaaffiit akuerineqartut malinneqannginnerannik kiisalu innuttaasunut taakkununnga tunngasunik ilisimatusarnerit paasissutissalluunniit killeqarnerinik sunnerneqarput.

LGBTQIA+-p peqatigiiffia Sipineq+ taama allappoq, taannalu LGBT+ Danmarkimik nutaamik annertuumillu suleqateqarnissamut isumaqatigiissuteqaqqammerpoq.

Isumaqatigiissut ukioq manna Copenhagen Pride-mi atsiorneqartoq, Kalaallit Nunaanni tamarmi LGBTQIA+-nik naligiissitsinissamut, peqqissutsimut, atugarissaarnermut inuillu pisinnaatitaaffiinut ataavartumik aaqqissuussinerup ineriartortinneqarnissaanut tapersersuisussamik naligiissitaalluni siunissaq ungasinnerusoq eqqarsaatigalugu suleqatigiinnermik pilersitsivoq.

Inuit Kalaallit Nunaannut tunngasuni siuttuunissaat, kultuurikkut, oqaasiinik namminerlu aalajangiisinnaatitaanerannik ataqqinninnissaat suleqatigiinnermi tunngavigineqarpoq. Aammattaaq LGBT+ Danmarkip immikkut ilisimasaqarluarnera politikkikkullu suliniutinik misilittagai Naalagaaffeqatigiinni nunanilu allani ataatsimut anguniagassanik sulissutiginninnermut atorneqassapput.

- Isumaqatigiissut manna Nunatsinni LGBTQIA+-nut alloriarneruvoq pingaarutilik. siuttuulluta suliniuteqarnissaq aamma qanimut suleqatigiinneq aqqutigalugu qulakkeersinnaavarput Inuit nipaat pisariaqartitaallu qitiutinneqarluinnartut, Nunatsinni, Naalagaaffeqatigiinni nunanilu tamalaani inuit pisinnaatitaaffii pillugit oqallinnerni, Qillaq Olsen, Sipineq+-imi siulittaasoq oqarpoq.

Naalagaaffeqatigiinnermi tamarmi immikkut ittumik suliniuteqarneq

Siuariartoqaraluartoq Kalaallit Nunaanni LGBTQIA+ inuullutik assigiinngisitsinermik, inuiaqatigiinni immikkoortinneqarnermik, paasissutissatigut tunngavissakitsunik kiisalu peqqinnissamut sullissinernut naammattumik periarfissaqannginnermik suli annertuunik unammilligassaqarput.

Suleqatigiinnissami ataani allassimasut immikkut sammisassaqassapput:

• Peqqissuuneq: Peqqinnissaqarfimmik pitsaanerusumik atuisinnaaneq, toqqissisimaffiusunik ataatsimoorfinnilu pilersitsineq

• Inatsisit naapertorlugit naligiinneq: Angajoqqaatut isumaginninnerup inatsisitigut akuerineqarnera assigiinngisitsinerlu

  akiorniarlugu inatsisit sukaterneqarnissaa.

• Ilinniartitaaneq piginnaanngorsaanerlu: Ilinniutinik Nunatsinni pissutsinut oqaatsinullu naleqqussakkanik ineriartortitsineq,

  peqqinnissaqarfimmi sulisut politiillu piginnaanngorsarnissaa.

• Kulturi innuttaaqatigiillu: Nuuk Pride, nammineq kajumissutsimik suliniuteqarneq najukkamilu ataatsimoorfiit tapersersornissaat.

Isumaqatigiissummi suliassaqarfiit Danmarkimi oqartussaasunut tunngasut imaluunniit assigiinngitsunik oqartussaasunik oqaloqateqarnissaq pisariaqartoq immikkut sammineqarput. LGBT+ Danmarkip, Sipineq+ qanimut suleqatigalugu suliniuteqarnissani ima piumasaqaqatigiipput: Allamik isumataartitsiniarluni katsorsaariaatsit inerteqqutaalersinneqassasut, aamma Nunatsinni atuutinneqalernissaa. Nunatsinni LGBTQIA+-inut uumissuinermik pinerlunnerit aaqqissugaasumik nakkutigineqarnissaat, Naalagaaffiup politiivi suleqatigalugit. Inuit LGBTQIA+-ikkut isiginnittaasiat nunap iliuusissatut pilersaarutaanut inatsisinullu ilanngunneqarnissaat.

- Suleqatigiinnermik tamatuminnga pilersitsigatta tulluusimaarutigeqaarput. Naalagaaffeqatigiinni pisinnaatitaaffiit ataatsimoorluta qaffassavagut, tamatumalu najukkami tunngaviusumik ilisimasat aammalu ilisimasat Sipineq+-ip Kalaallit Nunaanni pissarsiarineqartut tapersersornissaat, Susanne Branner Jespersen, LGBT+ Danmarkimi allattoqarfimmi pisortaq oqarpoq.

Isumaqatigiissut ullumikkut atuutilerpoq, Nunatsinni LGBTQIA+-ikkut tamakkiisumik naligiissitaanissaat, assigiimmik periarfissaqalernissaat inuiaqatigiinnilu peqataallualernissaata

tungaanut atuuttussanngorlugu.