Sisimiuni Maniitsumilu aningaasartuutit nikingavallaanngitsut - innuttaasulli amerlassussaat nikingaqisut
Qeqqata Kommuniata illoqarfimminut marlunnut sanaartukkanut 2022-imit 2025-imut aningaasartuutai assigiipajaarput. Innuttaasulli Maniitsumi ikinnerungaatsiarput. Innuttaqqortussuseq malillugu sanaartugassanut aningaasalersuisarneq qinikkat atorunnaarsippaat.
Innuttaqqortussuseq aallaavigalugu sanaartugassanut aningaasaliisarneq missingersuusiornermi atoraniluunniit atuukkunnaarsinneqarpoq.
Assi: Sermitsiaq
Qeqqata Kommuniani innattaqqortussuseq malillugu sanaartugassanik aningaasalersuisarneq atorunnaarpoq. Tamanna Qeqqata Kommuniani kommunalbestyrelsemi amerlanerussutillit, tassa Naleqqap, Demokraatit, Atassutip attaviitsullu, sisamanngornermi ataatsimiinnerminni aalajangerpaat. Attaviitsoq, Gedion Lyberth, siunnersuuteqartuuvoq.
Siunnersuut suleqatigiit borgmesteriutitaqartut, Siumup Inuit Ataqatigiillu, ikinnerussuteqarlutik akuerinngilaat.
Qaammatialuinnarni atuuttoq
Maanna aalajangernerup akerlianik qaammatit pingasut matuma siornatigut aalajangertoqaraluarpoq. Tassa sanaartugassat inoqarfiit innuttaasuisa amerlassusaat aallaavigalugit aningaasalersorneqartassasut.
- Qaammatini kingullerni pissutsit allanngorneri tunngavigalugit matumuuna siunnersuutigaara qangatut pissuseq uterfigineqassasoq, tassa sanaartornermut aningaasaliissutaasartussat pisariaqartitsineq aallaavigalugu agguarneqartalernissaat, Gedion Lyberth siunnersuummini allappoq.
330 millionit koruunit
Qeqqata Kommunia qinigaaffimmi kingullermi sanaartukkanut missingersuusiornermini, tassa 2022-imit 2025-imut, illoqarfinnut marlunnut, Maniitsumut Sisimiunullu, katillugu 330,2 millionit koruuninik aningaasartuuteqarpoq. Sisimiunut 170,2 millionit koruunit Maniitsumullu 160 millionit koruunit.
Taamaakkaluartoq illoqarfinni taakkunani innuttaasut amerlassusaat nikingaqaat. Maniitsormi Sisimiut piffissani taakkunani inuisa affaasa missaannaanik inoqarpoq. Taamaakkaluartoq sanaartukkanut aningaasartuutit 10 millionit koruuninik nikingapput.
Maniitsoq 2022-imit 2025-imut agguaqatigiisillugu 3080-inik inoqartoq Sisimiut 6127-inik inoqarpoq.
Maniitsoq aningaasalerneqarnerusoq
Qeqqata Kommuniani ingerlatsiviup qinikkanut ilisimatitsissutaa naapertorlugu 2025-imit 2027-imut sanaartukkat aningaasalersorneqalereertut ilaat agguaanneqareerput.
Ukiuni taakkunani suliniutit aallartereersut aningaasartaasa 50 procentii Maniitsumi, Sisimiuni 28 procentii, nunaqarfinni 17 procentii ataatsimoorussamillu 5 procentii atorneqassasut, ingerlatsivik allappoq.
