Qeqqata Kommuniani kommunalbestyrelsip Sisimiuni sisorartarfissaq nutaaq 2024-imi 22 millionit koruuninik aningaasalerpaa. Danskit aningaasanut inatsisaanni 3 millionit koruuninik aamma taamani aningaasaliisoqarpoq.
Kommunalbestyrelsilli aningaasaliissutai siunerataminnut maanna atorneqarunnaassasut, kommunalbestyrelsimut ilaasortaq, Karl Lyberth (N), siunnersuuteqarpoq.
Qeqqata Kommuniani kommunalbestyrelsip Sisimiuni sisorartarfissaq nutaaq 2024-imi 22 millionit koruuninik aningaasalerpaa. Danskit aningaasanut inatsisaanni 3 millionit koruuninik aamma taamani aningaasaliisoqarpoq.
Kommunalbestyrelsilli aningaasaliissutai siunerataminnut maanna atorneqarunnaassasut, kommunalbestyrelsimut ilaasortaq, Karl Lyberth (N), siunnersuuteqarpoq.
- Qeqqata Kommuniani innuttaasut pisariaqartitaat assigiinngitsut eqqarsaatigalugit, soorlu
inissaaleqinerujussuaq, utoqqaat illuisa nutarternissaat, puigortunngortunut inissiat
amigaataanerujussui, meeqqeriviit nutaat amigaataaneri, utoqqaat innarluutillillu illunik
aalajangersimasunik ornittagaqannginneri, allallu pisariaqartinneqartut eqqarsaatigalugit,
isumaqarpunga maannakkut piffissaanngitsoq Sisimiuni nutaamik sisorartarfilliornissaq, Karl Lyberth siunnersuummini allappoq.
Taanna illua-tungiliuttunut ilaavoq, illuatungiliuttullu maanna amerlanerussuteqarput. Gideon Lyberthimi, borgmesteriutitaqartut Siumukkut qimallugit upernaaq manna attaviitsunngorpoq.
IA: Tukak
Karl Lyberthip Sisimiuni sisorartarfissamut aningaasaliissutit allamut atorusulermagit, suleqatigiit borgmesteriutitaqartuni, Inuit Ataqatigiinneersup, siunnersuut nuannarinngilaa.
- Tukattutut akisussaassuseqanngitsutut isigivara inuit amerlanerussuteqartut aalajangernikuusaat taamaaliinnarlugu, amerlanerussuteqaleriaramik, maanaannaq peerniaraat, Nivi Heilmann Efraimsen (IA), Sermitsiamut oqarpoq.
Karl Lyberthip siunnersuutaa, kommunissinni innuttaasut ineqarnikkut pitsaanerusumik atugassaqarnissaannik siunertaqartoq isumassarsiatsialaanngila?
- Isumassarsiatsialaasorinngilara. Pissutigalugu taakkununnga ileqqaarluta aallartereernikuugatta.
- Ukulu 22 millionit tamakkorpassuarnut pilersitsinissamut amigarujussuarput, Nivi Heilmann Efraimsen oqarpoq.
Qeqqata Kommuniani atorfilittat siunnersuummik suliaqarnerminni ilaatigut allapput Sisimiuni sisorartarfissamut aningaasaliissutit sinneruttut maanna 19,9 millionit koruunit missaanniittut, suliniutillu pilersaarusiorneranut piffissaq sivisooq atorneqareersoq. Siunnersuut akuerineqassappat danskit aningaasanut inatsisaatigut tapiissutit 3 millionit koruunit annaaneqassapput.
Siunnersuut Qeqqata Kommuniani qinikkat sisamanngornermi maajip 28-ni ataatsimiilerunik aalajangiiffigissavaat.
