Qeqqata Kommuniani qinikkat ullumi ataatsimiissapput. Ullormi ataatsimiiffissaanni taakkununnga naliginnaanngitsumik ullaaq manna pisoqarpoq. Sisorartartut peqatigiiffiat, SSP Alpin Sisimiut, akerliussutsimik takutitsivoq.
Akerliunermut tunngaviusoq tassaavoq, Naleqqameersup, Karl Lyberthip, Sisimiuni sisorartarfiliornissamut aningaasaliissutaareersut sinneri, 19,9 millionit koruunit, ineqarnermut atugassatut nuukkusullugit siunnersuuteqarmat.
Qeqqata Kommuniani qinikkat ullumi ataatsimiissapput. Ullormi ataatsimiiffissaanni taakkununnga naliginnaanngitsumik ullaaq manna pisoqarpoq. Sisorartartut peqatigiiffiat, SSP Alpin Sisimiut, akerliussutsimik takutitsivoq.
Akerliunermut tunngaviusoq tassaavoq, Naleqqameersup, Karl Lyberthip, Sisimiuni sisorartarfiliornissamut aningaasaliissutaareersut sinneri, 19,9 millionit koruunit, ineqarnermut atugassatut nuukkusullugit siunnersuuteqarmat.
Siunnersuut ullumi aalajangiiffigineqassaaaq. Siunnersuut sisorartut innutaassullu ilaasa pitsaanngitsutut nalilerpaat. Tamannalu akerliussutsimik takutitsinermik kinguneqarpoq.
- Tassunga killittariaqalerpugut pissutigalugu inuunerinnissamik meeqqanillu neriuuteqartitsineq attanneqartariaqarami illersorneqartariaqarlunilu, Ulloriaq Kreutzmann Sermitsiamut oqarpoq. Taanna peqatigiiffimmi siulittaasuuvoq.
Aaqqissuisoq: Tamarmik sisorarfittaarusulersimapput
Siulittaasup oqarnera naapertorlugu inuit meeqqanit utoqqarnut, aamma sisorartartuunngikkaluartut, 70-80-it missaanniittut najuupput. Qinikkat Sisimiuniittut akerliussutsimik takutitsisunut oqaaseqarput. Taakkualu oqaasii naammagisimaarneqarput.
- Ajunngitsorujussuupput akissutaat. Pissutigalugu maannakkut tamarmik sisorarfittaarusulersimarpalukkamik, Ulloriaq Kreutzmann oqarpoq.
Karl Lyberthip Maniitsumeersup siunnersuutaa parteeqataanit Sisimiuniittumit isumaqatigineqanngitsoq peqatigiiffiup siulittaasuata maluginiarpaa. Taamaattumik siunnersuutip ullumi akuerineqannginnissaa neriulluarfigaa.
- Neriuppunga aamma naatsorsuutigilluinnarpara qinikkat isumaat allanngorsimassasoq. Aatsaaginnaq akerliussutsimik takutitsigatta illua-tungiliuttuerussimagami. Naleqqameersumut allaat parteeqatini Maniitsumiittut pisuutippai, Ulloriaq Kreutzmann oqarpoq.
Qinikkat ataqqinneqqugai
Karl Lyberthip sisorartarfimmut aningaasaliissutit kommunimi ineqarniarnerup pitsaanerulernissaanut atorneqassasut kissaatigigamiuk, tamanna siunnersuutigigaa, kommunalbestyrelsip ataatsimiissutissaani atuarneqarsinnaavoq. Aningaasalli taakkua siunertamut allamut atorusutai naammaqqajanngitsut sisorartartut siulittaasuat isumaqarpoq.
- 19,9 millionit koruuninut qanoq illuliortigissavit? Immaqa ilaqutariit pingasut-sisamat illussai, Ulloriaq Kreutzmann oqarpoq.
Taamaattumik aningaasaliissutit amerlanerussutilinnit akuerineqarnikut qinikkanit ataqqineqarnissaat kissaatigaa.
- Isumaqatigiissutaareersunuku ikerinnakkut allanngortinniarneqartut, tamanna aamma pissusissamisuunngilaq. Aningaasaliissutit ataqqineqartariaqarput, Ulloriaq Kreutzmann oqarpoq.
