Sisorartarfissaq oqqattoqareersoq aningaasartaqaannassasoq

Sisimiuni sisorartarfissaq, Nattoralinnguamiittoq, 20 millionit koruuninik maanna aningaasartaqartoq aningaasartaqaannassaaq. Tamanna Qeqqata Kommuniani kommunalbestyrelsimut ilaasortat amerlanerussutillit sisamanngornermi aalajangerpaat.

Karl Lyberthimmi (N) suliniutip aningaasartaarunnissaanik siunnersuutaa kommunalbestyrelsemi ilaasortanit 15-iusunut, qulit akuerinngilaat.

Tamannali siunnersuummik aalajangiilivinnermi aatsaat isumaqatigiissutigineqarpoq. Akunnerimmi pingasut missaanni oqallittoqarnerani Karl Lyberthip (N), siunnersuutaa, tassa sisorartarfissaq aningaasartaarunneqassasoq, amerlanerussutilinnit, Naleqqamit, Atassummit, Demokraatinit attaviitsumiillu akuerineqartussanngorpasikkaluarpoq.

Naaperiut qaqinneqartoq

Taasissutaasussanngulersorli, illuatungiliuttunit, Demokraatineersup, suleqatigiit borgmesteriutitaqartut itigartissinnaanngisaannik naaperiarfigai. 

- Sisimiuni arsaattarfik piariipallanneqassasoq, Sisimiuni timersortarfik nutarsassasoq, autismertut Sisimiuni atuarfittaassasut inissialiornerlu aningaasaliiffiginerusinnaagutsigu akerliunersi akuerisinnaavarput, Rachel Ingemann (D), oqarpoq.

Qinikkat taama pisoqareersoq marloriarlutik, isumaqatigiinniarlutik, unikkallarput.

Demokraatit akuerineqartariaqavittumik naaperiaanerat suleqatigiit borgmesteriutitaqartut akueraat. Taamaalilluni Sisimiuni sisorartarfissamut aningaasaliissutit nikisinneqanngiinnarput.

- Naaperiutigineqartut akuerivagut, naaperiutigineqartut missingersuusiornermik suliaqalerutta qaqissavagut, Evelyn Mølgaard (S), oqarpoq.

Siunnersuuteqartup suleqatai isumaqatigiikkunnaartut

Aningaasartaarutitsinissamik siunnersuut Naleqqamut ilaasortat avissaartuuffigaat.

Siunnersuut Naleqqameersut, Karl Lyberthip Jens "Meeraq" Lyberthillu, attaviitsup Gedion Lyberthip, Atassummeersullu Bitten Heilmannip akueraat. Siunnersuut Siumumeersut, Inuit Ataqatigiinneersut, Demokraartineersut Naleqqameersullu Steffen Johansenip akerleraat. Naleqqameersoq Nathan Møller akuersinanilu akerliunani taaseqataanngilaq.

Lyberth: Kukkulerpusi

Karl Lyberthip siunnersuutigeqqaagaluagaa aningaasartornerunermik kinguneqartussaanngilaq. Killormut aningaasat atoriaannaat 20 millionit koruunit missaannik amerlissapput. Karl Lyberthip naliliinera naapertorlugu Demokraatit naaperiaataat kommunimut akisussaqaaq. 

- Rachel Ingemannip siunnersuutaa akuerinngilara. Taakkartugai piviusunngortissagutsigit tamanna 100 millionit koruunit sinnerlugit akeqassaaq, Karl Lyberth oqarpoq.

Taassuma siunnersuutaa tassaavoq aningaasaliissutinik atorunnaarsitsineq. Tamanna siunertanut allanut, soorlu inissialiornerunernut, atuarfiliornernut, arsaattarfimmut timersortarfiulluunniit iluarsartuunneqarnissaanut qulakkeerinninngilaq.

Oqqattut

Suliaq suliarineqarluni aallartimmat borgmesterip, Malik Berthelsenip, siunnersuuteqartoq assuaaraa.

- Karl Lyberth missingersuutit pillugit ataatsimiinnerni ukiuni kingullerni arlalinni takunngilarput. Taamaammat siunnersuut qinngasaarinermik tunngaveqaannartoq uanga nalilerusuppara, Malik Berthelsen oqarpoq.

Tamanna isornartorsiorneqartup nuannarinngilaa.

- Borgmesterip oqaasii akuerinngilluinnarpakka. Qinikkat taamatut sulineq ajorput aamma taamatut pasillerneq ajorput, Karl Lyberth oqarpoq.

Karl Lyberthip kommunip missingersuutissai pillugit isumasioqatigiinnerit ukiuni kingullerni arlalinni peqataaffigineq ajorlugit nassuerutigaa. Tamannali nakkarsaatitut atoqqunngilaa.

- Inuttut nakkarsaaneq maanna atorparsi, tamanna politikkiunngilaq. Qinnuigissavassi inuttut nakkarsaaneq atorunnaarlugu politikkissasusi, Karl Lyberth oqarpoq.

Borgmesterilli oqaatsini utertinnagit aalajangiusimaannarpai:

- Isumaga suli aalajangiusimavara, siunnersuut qinngasaarutitut suli isigaara, Malik Berthelsen oqarpoq.

Borgmesteri illua-tungiliuttunut sianeqattaartoq

Borgmesteri Malik Berhelsen Sisimiuni majuartaatissap ataatsimiinnermi suliarineqarnera sioqqullugu illuatungiliuttunut arlalinnut sianeqattaarsimavoq.

Tamanna borgmesterip aamma nammineerluni oqaatigaa. Taassuma attaviitsoq Gedion Lyberth sianerfigisimallugu oqaatigaa. Illuatungiliuttunut ilaasoq, Erne Olsen (D), borgmesterimit sapaatiummat sianerfigineqarsimalluni aamma oqarpoq.