Sissami neriniartarfinnilu pujortarneq Spaniami naalakkersuisut inerteqqutiginialerpaat

Spaniami sissami imaluunniit cafép silataani issialluni cigarettimik ikitsineq piffissami qaninnermi inerteqqutaalersinnaavoq.

Spaniami naalakkersuisut, inatsisissatut siunnersuut silami, ilaatigut sissani, narsaamanerni silamilu sassaalliisarfinni pujortarnerup e-cigarettinillu atuinerup inerteqqutaalernissaanik siunertalik marlunngornermi akuersissutigaat.

Nutaarsiassaqartitsivik AFP taama allappoq.

Inatsisissatut siunnersuut Spaniami inatsisartuni amerlanerussuteqartunit suli akuersissutigineqanngilaq.

Pujortarneq inerteqqutigiinnarnagu siunnersuutip aamma inuusuttut tupamik atuinerat tupamillu tunisassianik ussassaarinerup inerteqqutigineqalernissaannik imaqarpoq.

Inuit peqqissusaat illersorniarlugu "kinguaariiaat tupamik atuiunnaarnissaat“ anguniarlugu iliuuseqarnerusariaqartoq, Spaniami peqqissutsimut ministeri Monica Garcia isumaqarpoq.

- Anguniagaq paasiuminartuuvoq. Silaannaq minguitsoq najugaqarfigisatsinni nalinginnaasunngorsassavarput, Garcia marlunngornermi tusagassiortunik katersortitsinermi oqarpoq.

- Naartusut astmartullu silami neriniartarfinni nerisut, allat nerriviiniit pujortartut pujuannit akornusersorneqaratik nerisinnaasariaqarput, peqqissutsimut ministeri oqarpoq.

Spaniami innuttaasut inersimasut sisamaraarterutaat ulluinnarsiutigalugu pujortartarput, nunami peqqinnissamut oqartussaqarfiup kisitsisaataani tamanna takuneqarsinnaasoq, AFP allappoq

Frankrigimi narsaamanerni sissanilu pujortarneq siorna inerteqqutaalerpoq.

Frankrigimi nikotinimik akullit akiorniarlugit sukannersumik iliuuseqartoqarpoq.

Taamaasilluni Frankrigimi pooqattaaqqat nikotininik imaqartut, aamma snusinik taaneqartartunik, atuineq, pigisaqarneq, tuniniaaneq pisisinnaanerlu apriilip aallaqqaataaniit inerteqqutaalersinneqarput.

Inerteqqutip unioqqutinneqarnerani qanoq annertutigisumik akiligassiissutigineqartalernissaa suli ilisimaneqanngilaq.

RITZAU