Siumup siulittaasuata tullia spiralilersuisimaneq pillugu nalunaarusiap piaarnerpaamik saqqummiunneqarnissaanik kissaateqarpoq: Qineqqusaarnermi inerniliussat ilisimaneqartariaqarput

Naalakkersuisut spiralilersimanermut suliamut atatillugu inuit pisinnaatitaaffiinut tunngasunik immikkut ilisimasallit misissuinerisa nutserneqarnerat sapaatip-akunneri arlallit atorlugit suliarissavaat, Ineqi Kielsenilli (S) inerniliussat qineqqusaarnermi atorneqarsinnaaniassammata nalunaarusiap piaarnerusumik naammassineqarnissaa kissaatigaa.

Spiralilersuisimaneq pillugu suliami immikkut ilisimasallit misissuinerisa inerneri folketingimut qinersinissaq sioqqullugu tamanut saqqummiunneqassasut Ineqi Kielsenip kissaatigaa.

Assi nammineq pigisaq

Hollie Olsen Kielsen Hollie Olsen Kielsen Tusagassiortoq

Saqqummersinneqarpoq 27. Februaari 2026 - 10:12

Ussassaarut

“Naartunaveersaaserneqarsimasut pillugit suliaq” – spiralilersuisimaneq pillugu suliatut ilisimaneqarluartoq – pillugu immikkut ilisimasallit misissuinerat sivisuumik utaqqineqartoq maanna Naalakkersuiniippoq.

Nalunaarusiarli maannakkut suliarineqarlunilu tuluttuumiit nutserneqartillugu politikkikkut tatisineq annertusiartorpoq, ilaatigut Ineqi Kielsenimit (S) inerniliussat tamanut saqqummiunneqarnissaat kissaatigineqarluni.

- Qinersisartut inuit pisinnaatitaaffiinut, inatsisitigut isumannaatsuunermut kiisalu Kalaallit Nunaata oqaluttuarisaanerani siunissamilu attaveqatigiinnerannut tunngasunik paasisaqarnissaminnut pisinnaatitaaffeqarput, Ineqi Kielsen tusagassiutitigut nalunaarummi allappoq.

Inuiannik toqoraanerua?

Folketingimut qinersisoqarnissaa nalunaarutigineqaqqammersoq pissutigalugu politikerit innuttaasullu nalunaarusiap imarisaanik ilisimasaqalernissaat pisariaqartoq taanna isumaqarpoq.

Ussassaarut

- Oqaluttuarisaanermut tunngasuinnaanngilaq – politikkimut inatsisinullu tunngassuteqarlunilu kingorna isumaqatigiinniarnernut toqqaannartumik sunniuteqartussaavoq, Ineqi Kielsen isumaqarpoq.

Spiralit naartunaveersaatillu allat pillugit 1960-ikkunniilli ullumikkumut inuit pisinnaatitaaffiinik nunarsuarmi tamarmi atuuttunik nunallu inoqqaavisa pisinnaatitaaffiinik unioqqutitsinerit misissionermi qulaajarneqarput.

Misissuinermili taamanikkut ileqquusoq inuiannik toqoraanertut oqaatigineqarsinnaanersoq nalilerneqassanersoq tupinnarnerpaavoq.

Piffissaliunneqartoq unammillernartoq

Suliaq taanna kalaallisuunngortinneqarnissaa ilanngullugu sapaatip-akunneri arfinillit angullugit sivisussuseqarsinnaasoq Naalakkersuisut nalunaarutigaat.

Piffissarli tamanna qineqqusaarnermut maannakkut ingerlanneqartumut naleqqutinngitsoq Siumukkormiut isumaqarput.

- Suliassaq tamanna innuttaasunut arlalinnut attorneqartunut kiisalu tamanut ammasumik oqallinnermut annertoorujussuarmik pingaaruteqarsimavoq. Taamaammat piffissaliineq ammasuunerlu aalajangiisuupput, Ineqi Kielsen allappoq.