Siumut naalakkersuisooqatigiinnit anivoq – siulittaasoq pakatsivoq
Vivian Motzfeldt Naalakkersuisunit tunuarpoq, Siumullu naalakkersuisooqatigiinnit anilluni. Jens-Frederik Nielsenip partiip aalajangernera pakatsissutigaa.
Siumut naalakkersuisoqatigiinniit animmat Vivian Motzfeldt naalakkersuisuujunnaarpoq.
Assi: Oscar Scott Carl
Jens-Frederik Nielsenip qisuariaataa ilanngullugu nutarterpoq.
Siumut naalakkersuisooqatigiinnit aniniarluni aalajangerpoq.
Naalakkersuisut siulittaasuat Jens-Frederik Nielsen (D) taama paasissutissiivoq:
- Siumuup siulittaasuata ullumi nalunaarfigivaanga Siumut naalakkersuisoqatigiinni suleqataajumajunnaarlutik. Tamanna nammineq aalajangigaraat. Tamanna ataqqivara. Unneqqarillungalu oqarusuppunga pakatsillunga, Facebookimi quppernermini allappoq.
Naalakkersuisunut ilaasortat marluk, Anna Wangenheim (S) Naaja H. Nathanielsenilu (IA), folketingimut qineqqusaarnerat pissutigalugu Siumup naalakkersuisooqataajunnaarnissani ulluni kingullerni sioorasaarutigisarpaa.
Jens-Frederik Nielsen tusagassiortunut sassarnermini aaqqiagiinngitsoqarnera pillugu ima oqarpoq:
- Naalakkersuisut marluk suliassaminnik aallussinerat, aamma folketingimut qineqqusaarnerup nalaani, qularutissaanngilaq. Inatsisinik unioqqutitsisoqanngilaq, ajoraluartumillu tusagassiuutitigut partiimit allamiit eqqunngitsumik oqariartuuteqartoqarpoq, oqarpoq.
Jens-Frederik Nielsenilli Folketingimut qinersinissamut Naalakkersuisunut ilaasortat marluk sassarnerat pitsaanerusumik iliuuseqarfigineqarsinnaasimagaluartoq nassuerutigaa:
- Qineqqusaartut saqqummiunneqarnerat naalakkersuisoqativut eqqarsaatigalugit immaqa pitsaanerusimasinnaagaluarpoq, kisianni tusagassiuutitigut naalakkersuisooqatigiinniit sioorasaarneqarneq tatineqarnerlu eqqunngitsuusoq isumaqarpunga, oqarpoq.
Naalakkersuisoqatigiit suli amerlanerussuteqarluarlutik 19-inik ilaasortaqalerput, illuatungiliuttunngortullu aqqaneq-marluulerlutik.
- Nunarput geopolitiskimik ilungersunarluinnartumik inissisimavoq
Nunanut allanut tunngasunut Ilisimatusarnermullu Naalakkersuisoq Vivian Motzfeldt marsip 13-iani tunuartoq, Naalakkersuisut aamma nalunaarutigaat.
Vivian Motzfeldt USA-p qaammatini kingullerni tatisinerata aaqqinneqarnerani qitiusumik inissisimaffeqarsimavoq. Ilaatigut Washingtonimi USA-mi nunanut allanut tunngasunut ministeri Marco Rubio aamma præsidentip tullersortaa J.D. Vance nunanullu allanut tunngasunut ministeri Lars Løkke Rasmussen ataatsimeeqatigai.
Jens-Frederik Nielsenip tusagassiortunut sassarnermini nunanut allanut tunngasunut naalakkersuisuusimasoq suliaqarsimaqisoq oqarpoq:
- Ataatsimiinnerpassuarnik Kalaallit Nunaannut tamarmut iluaqutaasunik suliaqarnikuuvoq, tamannalu naalakkersuisooqatigiit sinnerlugit qujassutigaarput.
Naalakkersuisut siulittaasuat Jens-Frederik Nielsen Facebookimi allappoq, piffissami Kalaallit Nunaata nunanit allanit aatsaat taama tatineqartiginerani Siumup naalakkersuisooqatigiinnut ilaasortaajunnaarnera uggoralugu:
- USA-miit oqariartuutigineqartartut apuunneqartartut ersarilluinnarput, nunarput geopolitiskimik ilungersunarluinnartumik inissisimavoq. Tamanna perpiarlugu uannut pingaaruteqarsimavoq naalakkersuisoqatigiit sapinngisaq tamaat siammasissoq pilersinnissaa.
- Ajuusaarutigaara Siumut tassunga peqataarusukkunnaarnera, Jens-Frederik Nielsen Facebookimi allappoq, allataali kingorna peerneqarpoq.
Qinersinermi angusarlunnerup kingorna naalakkersuisoqataalersoq
Siumut Inatsisartunut 2025-mi marsip aqqarngani qinersinerup kingorna Jens-Frederik Nielsen siuttoralugu naalakkersuisoqatigiinnut ilannguppoq.
Qinersineq Siumumut angusarluffiuvoq, taakkumi 2021-mi qinersisimik affaat annaavaat. Partii 2021-mi qulinik ilaasortaatitaqalersoq 2025-mi sisamaannarnik ilaasortaqalerpoq.
Qinersinerup kinguninngua Erik Jensen partiimi siulittaasutut tunuarpoq. Vivian Motzfeldt siulittaasuugallartutut inissippoq, juunimili 2025-mi Aleqa Hammondimut, partiimi siulittaasunngoqqittumut, ajorsarluni.
Siumut nal. 14 tusagassiortunik katersortitsissaaq, taannali sioqqullugu Jens-Frederik Nielsen nal. 12.15 allaffimmini tusagassiortunik katersortitsissaaq.
