Siunnersuisooqatigiit saqitsaannermut kaammattuisut: Aaqqiissutinik nassaarniarniaritsi
Inuit Pisinnaatitaaffii pillugit Siunnersuisooqatigiit Kommne Kujalliup Naalakkersuisullu kommunimi meeqqanut inunnullu innarluutilinnut immikkoortumi ilungersunartorsiutini aaqqiissutissanik nassaarniarnermik ukkatarinninnissaannik kaammattorpaat.
Arkivfoto: Trine Juncher Jørgensen
Inunnut ikiorneqarnissamik annertuumik pisariaqartitsisunik kommunip Naalakkersuisullu akornanni illuatungeriilluni pisuutitseqattaarnermik isummernissaq nanertornarlunilu nukinnik pisariaqanngitsumik atuiffiuvoq.
Taama Inuit Pisinnaatitaaffii pillugit Siunnersuisooqatigiit nalunaaruteqarput, taakkulu Naalakkersuisut Kommune Kujalliullu kommunimi meeqqanut inunnullu innarluutilinnut immikkoortumik passussinermi illuatungeriit isumaqatigiinnginnerannut kaammattuuteqarput.
Innuttaasut pisariaqartumik ikorfartorneqarnissaat kiisalu ilungersunartorsiutinut piusunut aaqqiissutissanik nassaarnissami suleqatigiinnermik nukittorsaanissaannik illuatungeriit uukkatarinnittariaqartut, Siunnersuisooqatigiit isumaqarput.
Siunnersuisooqatigiit: Pissutsit ilungersunarput
Kommunip immikkoortumik aqutsinera Naalakkersuisut 2024-mi atorunnaarsippaat. Taamaammallu Naalakkersuisut maannakkut aqutsinermik siulersuinermillu isumaginnipput. Kommunaldirektørip Randi Vestergaard Evaldsenip Naalakkersuisut immikkoortumik ingerlatsinerat sakkortuumik isornartorsiorpaa, pisortarlu naapertorlugu kommunimi innuttaasut kalluarneqartut tamatumannga toqqissisimanngillutillu naammaginninngillat.
Inuit Pisinnaatitaaffii pillugit Siunnersuisooqatigiit oqartussat aaqqiissutinik nassaarnissaannik kaammattorpaat, Siunnersuisooqatigiimmi naapertorlugit kujataani inuit inuuniarnermi atukkatigut ulorianartorsiortut kiisalu inuit timikkut tarnikkullu ikiorserneqarnissamut pisariaqartitsissut atugaat ilungersunartumik inissisimapput.
-Aningaasatigut atugassarititaasutigut suliamullu piginnaasalinnik naammattumik sulisussaqarniarnikkut ajornartorsiutit tikkuarneqarput, Inuit pisinnaatitaaffii pillugit siunnersuisooqatigiit allapput, taakkuli aamma immikkoortut ilaanni pitsannguisoqarsimanera akueraat, tassani oorlu angajoqqaat paarsisartut atugaanni.
Immikkoortitsineq pinngitsoortinneqartariaqarpoq
Taamaammat Inuit Pisinnaatitaaffii pillugit Siunnersuisooqatigiit Kommune Kujalleq Naalakkersuisullu ilungersuutinut piusunut aaqqiissutinik nassarnissamik nangittumik nukittorsakkamillu suleqatigiinnissaannik kaammattorpaat.
- Taamaaliortariaqarput inuit pisinnaatitaaffiini pisussaaffiit pinngitsuunngivilluni eqqortitassaasut malinneqarnissaat pillugu kiisalu siumut isigaluni suliniarnerup aaqqissugaasumik ingerlanissaa anguniarlugu, Siunnersuisooqatigiit allapput.
Inuit Pisinnaatitaaffii pillugit Siunnersuisooqatigiit ilanngullugu oqartussat assigiinngisitsinermik pinaveersimatitsinissamik Kalaallillu Nunaanni tamarmi isumaginninnikkut tapersersuineq piviusoq naligiimmillu pinniffiusup qulakkeerinninnissaannik kaammattorpaat.
