Sooq imigassamut politikki nutaaq pillugu isumaqatigiinniarnerit aatsaat ukiup ataatsip qaangiunnerani aallartippat? Wangenheim nassuiaavoq

Peqqissutsimut naalakkersuisoq Anna Wangenheim (D) taamanilu Naalakkersuisunut ilaasortaq Mads Pedersen imigassamut politikki nutaaq uppernarsaatinik tunngaveqartoq pillugu innersuussutinik ukioq ataaseq sinnerlugu matuma siorna, 2025-mi oktobarip aallartinnerani, saqqummiussipput.

Imigassamik aalakoornartulimmik kisermaassineq, 21-nik ukioqalereernermi imigassamut akiliuteqarsinnaaneq immiaaqqallu nittarsaanneqarnerata inerteqqutiginissaa siunnersuutit ilagaat.

Nalunaarusiap saqqummiunneqarneraniilli politikkikkut aalajangiisarnerit, soorlu inassuteqaatit politikkimut sunniuteqassanersut, oqaaseqarfigineqanngilluinnarput.

Inersimasut imigassamik aalakoornartulimmik atornerluinerisa kinguneri ilungersunartut meeqqat inuusuttullu suli atugarigaat eqqaaneqarmat naak ilaatigut meeqqat illersuisuat Stina Sværd arlaleriarluni Naalakkersuisut imigassamut aalakoornartulimmut politikkimik nutaamik suliaqarnissaannik ujartuigaluartoq taamaappoq.

- Akisussaaffik tamaat peqqinnissaqarfimmut tunniussinnaanngilarput

Naalakkersuisut Inatsisartuni partiit isumaqatiginninniarfiginiarlugit sapaatip-akunnerani matumani nalunaarput, Sermitsiallu sooq isumaqatiginninniarnerit aallartinnissaat taama sivisutiginersoq Anna Wangenheim aperaa.

Apeqqut paasilluarsimallugu, isumaqatigiinniarnerilli aallartinnginneranni ilaatigut imigassamut aalakoornartulimmut politikkip nutaap nammineq oqartussaaffini, tassa peqqinnissaqarfik, kisiat pinnagu oqartussaaffiit arlallit killilissammagit annertuumik piareersartoqarsimasoq, allakkatigut akissuteqarluni allappoq:

- Meeqqat inuusuttullu illersornissaat, ilaqutariit nukittorsarneqarnissaat imigassamillu atornerluinerup inunnut innuttaaqatigiinnullu sunniutaasa annikillisinnissaat iluatsissappata akisussaaffik tamaat peqqinnissaqarfimmut tunniussinnaanngilarput.

- Isumalioqatigiittariaqarlutalu soqutigisaqaqatigiit peqataatillugit ataqatigiissumik iliuuseqartariaqarpugut, aamma pinaveersaartitsinermut, isumaginninnermut, katsorsaariaatsinut avatangiisinullu meeqqatta inuusuttuaqqallu peroriartorfiannut tunngatillugu, Anna Wangenheim allappoq.

Taassumattaaq partiinik isumaqatiginninniarnerit aallartinnginneranni niuertut, MIO kommunillu aamma ataatsimiisissimallugit oqarpoq.

Siunissaq ungasinnerusoq eqqarsaatigalugu politikkikkut isumaqatigiissusiorumasoq - ukiup naannginnerani inerniliisoqarnissaa neriuutigigaa

Anna Wangenheim naapertorlugu Inatsisartuni amerlanerussuteqarluartunik ilaasortaatitaqassalluni siunissaq ungasinnerusoq eqqarsaatigalugu politikkikkut isumaqatigiissuteqarnissaq maanna anguniarneqarpoq.

- Isumaqatigiissut qinigaaffimmi arlalinni atuuttussaq, qineqqusaarnermi uteqattaarneqarartussaanngitsoq politikkikkulluunniit amerlanerussuteqartut allanngoraangata allannguuteqaratarsinnaasuunngitsoq, taanna allappoq.

Anna Wangenheimip partiiata Demokraatit imigassamut aalakoornartulimmut inatsit 2018-imi atuutilersinneqarlaaq sakkukilleqquaa. Partii piumasaqaatiminut taamanikkut tapersersorneqarpoq.

Anna Wangenheim naapertorlugu isumaqatigiinniarnernut maannakkut pisunut tunngatillugu inuit ataasiakkaat kiffaanngissusiat pisullu imigassamik aalakoornartulimmik atornerluinermi inuit iliuuseqarnissaannut kiisalu taakkununnga qanigisaannullu kingunerlutsitsisilluni killiliisinnaasut pinaveersaartinneqassapput.

– Avissaartuussutigisagut ataatsimoorutigisagullu pillugit oqaloqatigiinnissaq ajornannginnerulermat piffissaq partiinut iluaqutaasoq isumaqarpunga.

– Taamaammat inatsisitigut suliaq aallartissinnaaqqullugu ukiup naannginnerani politikkikkut sinaakkutissatut isumaqatigiissuteqarnissaq neriuutigaarput, naalakkersuisoq Anna Wangenheim oqarpoq.