Soraarnerussutisiaqalernissamut aaqqissuussinermut peqataasussaatitaanerup atorunnaarsinneqarnissaanik siunnersuut itigartinneqartoq

Naleqqap siulittaasuata Pele Brobergip soraarnerussutisiaqalernissamut pinngitsoorani ileqqaartussaatitaanerup atorunnaarsinneqarnissaanik siunnersuutaa, Inatsisartut apriilip 15-ianni aappassaanneerlugu oqaluuseraat.

Aalajangiiffigisassatut siunnersuut akuerineqarpat, pinngitsoorani

soraarnerussutisiaqarnissamut ileqqaartussaatitaanerup atorunnaarsinnissaannik Naalakkersuisut inatsisissatut siunnersuummik saqqummiusseqquneqassapput, taamaalilluni pinngitsoorani ileqqaartussaatitaanermut taarsiullugu, nammineq piumassuseq aallaavigalugu ileqqaartussaanermik aaqqissuussinermik taamaallaat aallaaveqalernissaa anguniarlugu, Pele Broberg aalajangiinissamut siunnersuummini allappoq.

Aningaasaqarnermut naalakkersuisunngorlaaq Aqqaluaq B. Egede (IA) oqaluttarfimmut qaqivoq, Naalakkersuisullu sinnerlugit itigartitsinissamik siullersaalluni siunnersuuteqarluni.

Jens Napaattuup (N) partiit allat qineqqusaarutiminnik qimarratiginninnerarlugit pisuutippai, erseqqissarlugulu Naleraq qinersisartunit 110 procentimik naatsorsuutigineqarsinnaasoq.

- Partiit allat naalakkersuisuusimasut qanoq isornartorsiorsimagaat imaluunniit qineqqusaarnermi allannguiniarlutik neriorsuisimanerat qularnanngitsumik eqqaamalluarparsi, ullumikkulli Naalakkersuisutut inissisimanerminni qanoq iliorpat? Qineqqusaarnermi neriorsuutiminnik qimarratiginnipput, oqaluttarfimmit taama naggasiivoq.

Inatsisartuni ilaasortat 16-it siunnersuut akerlilerpaat, arfineq pingasut – tassa Naleqqami ilaasortat tamarmik – akuersillutik. Siunnersuut taamaalilluni itigartitsissutigineqarpoq

Naalakkersuisut aaqqissuussineq allanngortikkusukkaat

Soraarnerussutisiaqalernissamut pinngitsoorani ileqqaartussaatitaanermik aaqqissuussineq 2016-imi akuerineqartoq sivisuumik isornartorsiorneqartarsimaqaaq. 2025-milu qineqqusaarnermi partiit amerlanersaasa allanngortinneqarnissaa isumaqatigiissutigigaluarpaat. Atassutip, Demokraatit Naleqqallu inatsit atorunnaarsinniaraluarpaat, IA-lli allannguisoqarnissaa kissaatigaa, Siumullu aaqqissuussinerup nutarterneqartuartarnissaa kissaatigalugu.

Demokraatit, IA, Siumut aamma Atassut siorna marsimi naalakkersuisoqatigiileramik, soraarnerussutisiaqalernissamut aaqqissuusseqqinnissaq pillugu isumaqatigiissuteqarput, tamatumunngalu ilaalluni soraarnerussutisiaqalernissamut ileqqaartussaatitaanerup nalilersorneqarnissaa.

Taamaattumik aaqqissuussineq pillugu oqallinneq ataatsimiinnermi matumani aamma suli naammassineqanngilaq. Partiit soraarnerussutisiaqalernissamut ileqqaagaqarnissamik pinngitsoorani piumasaqaateqalernissaq pillugu siunnersuut maajimi oqaluusereqqissavaat. Tamatumuuna Naalakkersuisut siunnersuutaat, aaqqissuussinermut allannguuteqarnissamik kinguneqartussaq.

Naalakkersuisunit suleqatigiissitat immikkut ilisimasallit suliaasa inerneri utaqqimaarusunneqarput, tassa soraarnerussutisiaqalernissamut aaqqissuussineq, ilaatigut pinngitsoorani ileqqaartussaatitaaneq pillugu annertunerusumik aalajangiisoqartinnagu. Naalakkersuisunilli pinngitsoorani ileqqaartussaatitaanermik naleqqussaanissaq pisariaqartinneqartoq oqaatigereerpaat.

Tjenestemandit ileqqaartussaatitaanerannik killiliisoqarnissaa akileraarutitigullu akiliisitsiniartarnerup atorunnaarsikkallarneqarnissaa, Naalakkersuisut siunnersuutigaat.

Naalakkersuisut siunnersuutaat maajip tallimaanni aappassaaneerlugu oqaluuserineqassaaq, maajillu 15-ianni pingajussaaneerlugu oqaluuserineqassalluni.