Soraarnerussutisiaqalernissamut aningaasaateqarfimmi pisortaq ukiuni qulini pisortaareerluni tunuartoq

Soraarnerussutisiaqalernissamut aningaasaateqarfik SISA nutaamik pisortartaarpoq.

Pisortaaneq Søren Schock Petersen ukiut qulit pisortaareerluni aggustip naanerani soraarpoq. Soraarnera Hotel Hans Egedemi Nuummiittumi aggustip 27-ani malunnartinneqarpoq.

- Søren ukiuni qulini – piffissami SISA-p ineriartorfiulluarfiani – sulilluarsimaneranut qujaffigaarput, pitsaanerpaamillu kissaapparput, SISA nittartakkamini allappoq.

Morten Lund Madsen septembarip aallaqqaataani pisortaanertut atorfinitsinneqassasoq soraarnerussutisiaqalernissamut aningaasaateqarfiup SISA-p aamma ilisimatitsissutigaa.

Morten Lund Madsen soraarnerussutisiaqalernissamut aningaasaateqarfimmi aqutsisutut sivisuumik sulisimavoq.

SISA 43.000-it missaanni ilaasortaqarluni soraarnerussutisiassanullu katersanut 6 milliarder koruunit sinnerlugit aningaasanik katersaqarluni Kalaallit Nunaanni soraarnerussutisiaqalernissamut aningaasaateqarfinni annersaavoq.