Spiralilersorneqarsimasut taarsiiffigitinnissaat ingerlateqqinneqartoq – DF-ip allannguutissatut siunnersuutaa itigartinneqarpoq

Kalaallit arnat spiralilersorneqarsimasut taarsiiffigineqarnissaat pillugu siunnersuut Folketingimi marlunngornermi aappassaaneerneqarami sivikitsuinnarmik suliarineqarpoq.

Politikeri kisiartaalluni oqaluttarfimmiittoq tassaavoq Dansk Folkepartimeersoq Alex Ahrendtsen, taassumalu tunngavilersuutai ilaasortanit allanit iluarineqanngillat.

Taarsiinissamut aaqqissuussaq Folketingip akuerissappagu aamma qallunaanut arnanut piumassutsiminnik spiralilertissimasunut atuutissasoq, taamaassappallu Dansk Folkepartip taarsiissutissaq pilersaarutit malillugit pingajussaaneerneqarpat, tassa sisamanngornermi inaarutaasumik akuersissutigineqarpat, aamma akuerissagaa Ahrendtsen tunngavilersuivoq.

Dansk Folkepartiilli siunnersuutaa, tassa aaqqissuussinermut ilaasut amerlanerulernissaat pillugu allannguutissatut siunnersuut, oqalugiartoq oqaluttarfimmit aqqarniariartoq itigartinneqarpoq.

Inuit Ataqatigiit ilaasortaatitaata Naaja H. Nathanielsenip siunnersuutaa, arnap piffissami tamatumani arlaleriarluni naalliutsinneqarsimaguni 300.000 koruuninik taarsiiffigineqarsinnaaneranik siunnersuutaa, aamma itigartinneqarpoq.

Allannguutissatut siunnersuut Kalaallit Nunaannit Folketingimut ilaasortap aappaannit, Qarsoq Høegh-Damimit (N), taperserneqarpoq, partiinilli allanit taperserneqanngilaq taamaammallu siunnersuut itigartinneqarpoq.

Allannguutit allat akuerineqarput

Peqqissutsimut ministerip allannguutit arlallit siunnersuutigai, taakkualu akuerineqarput.

Ilaatigut Napparsimasut taarsiivigineqartarnissaannut ataatsimiititaliap, taarsiissutissanik qinnuteqaatinik suliarinnittarfiup, arnat 1991-ip tungaanut Kalaallit Nunaanni najugaqarsimanissaat pillugu piumasaqaat atorunnaarsissinnaavaa.

Allannguut tamanna arnap, inuunini tamaat Danmarkimi najugaqarsimasup nammineq isummani naapertorlugu kalaaliunini pissutigalugu Danmarkimi naartunaveersaaserneqarsimaguni taarsiiffigineqarsinnaalerneranik kinguneqarpoq.

Allannguutissatut siunnersuut alla naapertorlugu arnat taarsiiffigineqarnissaminnik itigartitaagunik allaffissornikkut naammagittaalliuuteqarnissaminnut periarfissaqalerput. Aamma Napparsimasut taarsiiffigineqartarnerat pillugu Ataatsimiititaliap immikkut ittumik pisoqartillugu qinnuteqaatit tunniunnissaannut piffissaliussaq, tassa septembarip aallaqqaataat 2028-mi, atorunnaarsissinnaagaa akuerineqarpoq.

Inatsisissatut siunnersuut ataatsimiititaliamut suliarineqaqqinnani pingajussaaneerneqassaaq, sisamanngornermilu akuerineqarnissaa naatsorsuutigineqarpoq. Spiralilersuisimanermut tunngatillugu inuit pisinnaatitaaffii pillugit nalunaarusiat marluk Naalakkersuisut ulloq taanna saqqummiutissavaat. Ilisimasallit nalunaarusianik suliaqartut ilaatigut suliaq inuiannik toqoraanertut taaneqarsinnaanersoq ilaatigut nalilersortariaqarsimavaat.