Suila-tapinik pissarsivallaarsimasut utertitsinissaannik piumasaqaat Naalakkersuisut unitsiinnarpaat

2025-mi Suila-tapinik pissarsivallaarsimasut aningaasanik utertitsinissaat Naalakkersuisut tunuartissavaat, aningaasaqarnermut naalakkersuisoq Aqqaluaq B. Egede tusagassiuutitigut nalunaaruteqarluni allappoq.

– Paasissutissat pisortanit pissarsiarineqartut innuttaasutut tatigineqarsinnaasussaapput. Tamanna matumani pisimanngilaq, tamannalu utoqqatsissutigaarput. Innuttaasut ilaat kukkussuteqarnatik amerlavallaartunik aningaasanik tunineqarsimapput, tassungalu akisussaaffik innuttaasuni ataasiakkaaniinngilaq, aningaasaqarnermut naalakkersuisoq Aqqaluaq B. Egede oqarpoq.

Aamma atuakkit

Marie Didriksen aningaasat qinnutigisimanngisani utertillugit akiliutigissavai - maanna akerliussutsimik takutitsiniarpoq

Inatsisartut Aningaasaqarnermut Akileraartarnermullu ataatsimiititaliaanut Naalakkersuisut qinnuteqaateqarput utertitsinissamik piumasaqaatit taamaatinneqassasut, kukkuneq Namminersorlutik Oqartussat qarasaasiaqarfianiikkami innuttaasuniinnani.

Taamatut aalajangerneq pivoq Nuummi innuttaasut akerliussutsimik takutitsinissaat sioqqutitsiarlugu, taakku akerliussutsimik takutitsinissaminni piumasaraat erseqqissumik akineqarnissartik aammalu naapertuilluartumik suliaq naammassineqartariaqartoq.

Siusinnerusukkut nalunaarutigineqarsimasut naapertorlugit innuttaasut 7.521-nik amerlassusillit aningaasanik pissarsivallaarsimanermik kingorna katillugit 31,9 millioner koruuninik utertitsissasut ukiumut nalunaarusiap iluarsisap kingunerisaanik piumasarineqaraluarpoq.

Maannamut suli ilisimatitsissutigineqanngilaq aningaasat qanorpiaq amerlatigisut aningaasaqarnermut ataatsimiititaliamut Naalakkersuisunit qinnuteqaatigineqarnersut.

Innuttaasut Suila-tapinik amerlavallaartunik tunineqarsimasut utertitillutik akileereersut, akiliutaat utertinneqassasut, Naalakkersuisut allapput.

- Naalakkersuisut suliaq ilungersunartutut isigaat. Kukkunerit ilinniarfigissavagut. Piffissaq utertissinnaanngilarput, akisussaaffimmilli tigusilluta aaqqissuussami kukkunernik innuttaasut akiliisissanngilagut. Tamannalu maanna iliuuseraarput,  Aqqaluaq B. Egede oqarpoq.