Suleqatigiinnissamut isumaqatigiissutip Kullorsuarmi meeqqat inuusuttullu atugarissaarnerunissaat nukittorsassavaa

Avannaata Kommunia aamma Kalaallit Meerartaat ukiuni arlalinni suleqatigiinnissamut isumaqatigiissuteqarput, meeqqat, inuusuttut ilaqutariillu atugarissaarnerunissaat anguniarneqassalluni.

Kalaallit Meerartaat Kullorsuarmi arlalerliarlutik aasarsiortitsisareernikuupput. Avannaata Kommunianik suleqateqarnissamik maanna isumaqatigiissuteqarput.

Assi: Kalaallit Merartaat

KASSAALUK KRISTENSEN KASSAALUK KRISTENSEN Digitalredaktøri

Saqqummersinneqarpoq 22. Juuli 2026 - 15:30

Avannaata Kommunia Kalaallit Meerartaat suleqatigiinnissamut isumaqatigiissuteqarfigaa, taannalu aqqutigalugu nunaqarfimmi Kullorsuarmi meeqqat inuusuttullu atugarissaarnerunissaat siuarsarneqassaaq. Isumaqatigiissutip pilersinneratigut nunaqarfimmi meeqqanut ilaqutariinnullu pitsaasunik sinaakkusiinissaq anguniarlugu, illoqarfimmi soqutigisaqatigiinnik kattuffik qanimut suleqateqarsinnaalerpoq.

Suleqatigiinnermi “Ikioqatigiinneq”-mi Kullorsuaq toqqissisimanartumik peroriartorfiusinnaanersoq, aamma meeqqat, inuusuttut angajoqqaallu siunissamut sunik kissaateqarnersut takorluugaqarnersulluunniit aallaavigineqassapput.

Borgmesterip Lars Erik Gabrielsenip (S) suleqatigiinnerit nuannaarutigaa.

Ussassaarut

- Meeqqat siunissaraavut, takuterusupparpullu, inuunerissuunissaat ilumoorukkipput tusarnaarusukkigullu pitsaasunik nassaarnissatsinnik, Kullorsuarmi meeqqat pitsaanerusumik inuuneqalernissaannik pilersitsinissamut.

- Nuannaarutigaara takullugu illoqarfimmi innuttaasut tamanut ataatsimiititsinerni tapersersuillutik siunnersuuteqartarneri, piumassusertillu aallaavigalugu suleqataajumallutik sassartartut, isumassarsiarpassuit pitsaasut piviusunngortinneqaleraangata illoqarfimmi meeqqanut, inuusuttunut ilaqutariinnullu najugaqartunut nuannaarutaasumik, Lars Erik Gabrielsen oqarpoq.

IKIOQATIGIINNEQ

Suliniut Ikioqatigiinneq piffinni ataasiakkaani pisariaqartitsineq aallaavigalugu pinngorpoq, piumassusertik aallaavigalugu sulisunit ingerlanneqarluni, sammisanik suliniutinillu pilersitsisarluni meeqqanut, inuusuttunut ilaqutariinnullu inuunerinnermik pilersitsisumik.

Ikioqatigiinneq Nordea-fondimit tapersersorneqarpoq, maannakkorpiarlu Nanortalimmi, Narsami, Qeqertarsuarmi Kullorsuarmilu ingerlanneqarluni.

Najoqqutaq: Kalaallit Meerartaat

Nunaqavissut piumassuseqarnerat aallaaviusoq

Kalaallit Meerartaat Kullorsuarmi aasaanerani ukiorpassuarni tammaarsimaartitsisarpoq. Isumaqatigiissut nutaaq Ikioqatigiinneq aqqutigalugu suleqatigiinnerat 2027-p tungaanut sivitsorneqarpoq.

Aasaq manna suleqatigiinneq illoqarfimmut malunniutilereerpoq, tassanimi kajumissutsiminnik sulisut nunaqavissut angalasartullu ilaqutariit illuutaannik iluarsaanneqartariaqartunik iluarsaassissapput.

Kalaallit Meerartaanni allattoqarfimmi pisortaq, Evi Kreutzmann, naapertorlugu suliniut iluatsissappat nunaqavissut peqataanissaat pingaaruteqarpoq.

- Nuanaarutigaara qanimut tatigeqatigiilluni Avannaata Kommunealu suleqatigiinnerput, sumiiffimmi nukinni pingaaruteqarnerpaani pitsanngorsaaniartut – tassa meeqqanut inuusuttunullu. Tamanna taamaallaat iluatsissinnaavoq, illoqarfimmi amerlasuunik inoqarmat tunniusimalluartunik, najukkaminni sassartartunik. Tamanna tulluusimaarutigaara, kattuffittut tapersersorsinnaangatsigu, allattoqarfimmi pisortaq oqarpoq.