KL

DK

Suleqatigiissitat nutaat Danmarkimit ineqarnermut tapiissutinik piareersaasussanngortinneqartut

Illoqarfinni nunaqarfinnilu inissiat attartortittakkat pisortanit pigineqartut nutarterneqarsinnaanersut Naalakkersuisut danskillu naalakkersuisuisa misissorniarpaat. Aserfallaatsaaliinermi massakkorpiaq kinngussaangaatsiartoqarpoq.

Jens-Frederik Nielsenip Mette Frederiksenillu isumaqatigiissutaat Kalaallit Nunaanni ataatsimeeqatigeereerneranni pilersinneqarpoq. EU-kommissionimi siulittaasoq Ursula von der Leyen saamerliuvoq.
Morten Okkels Morten Okkels Tusagassiortoq
Saqqummersinneqarpoq

Kalaallit Nunaanni inissiat attartortittakkat pisortanit pigineqartut nutarterneqarnerannut Danmark aningaasatigut tapiissuteqaratarsinnaavoq.

Siullermik kalaallit danskilli suleqatigiissitaasa aningaasaliissutit pisariaqartinneqartut suliamullu aningaasaleeqataanissamut periarfissat misissussavaat.

Tamanna Naalakkersuisut siulittaasuata Jens-Frederik Nielsenip (D) ministeriunerlu Mette Frederiksenip isumaqatigiissutaanni nutaami allassimavoq.

Naalakkersuisut Siulittaasuata Naalakkersuisoqarfianit tusagassiutitigut nalunaarut naapertorlugu inissiat attartortittakkat pisortanit pigineqartut aserfallatsaaliornissaannut aningaasartuutit 2,5 milliardit koruuninik naleqartut missingersuutigineqarpoq. Danskilli qanoq annertutigisumik tapiissuteqassanersut isumaqatigiissummi allassimanngilaq.

Illoqarfinni nunaqarfinnilu inissiat nutarterneqarnissaat pisariaqartoq Jens-Frederik Nielsenip erseqqissarpaa:

– Angerlarsimaffik peqqinnartoq toqqissisimanarlunilu, patajaallunilu inuulluataarnissamut periarfissaqartitsivoq. Illoqarfinni nunaqarfinnilu inissiat nutarterneqarnissaat ineriartortinneqarnissaallu pisariaqartinneqarput. Siunertatut isumaqatigiissut politikkikkut aalajangiinernut tunngavissaalluarpoq, taakkua pitsaanerusumik ineriartortitsinissaq qulakkeertariaqarpaat, taanna tusagassiuutinut nalunaarummi oqarpoq.

EU namminersortullu akuliunneqarsinnaasut

Suleqatigiissitat aningaasaleeqataanissamut pisariaqartinneqartut nalilersussallugillu Naalakkersuisut danskit naalakkersuisuisalu Danmarkip aningaasaliisinnaaneranik eqqarsaatiginninnerminnut tunngavigisinnaasaannik assigiinngitsunik siunnersuuteqassapput.

– Kikkut tamarmik pitsaasumik najugassaqartariaqarput. Kalaallit inuiaqatigiit ineriartornerannut aamma inuit inissaasa pingaaruteqarneratut pingaaruteqartigisumut peqataasinnaagatta nuannaarutigaara, ministeriuneq Mette Frederiksen tusagassiutitigut nalunaarummi oqarpoq.

Aamma siunertatut isumaqatigiissummi piffissaliisoqarpoq: Suleqatigiissitaq 2027-mi upernaakkut naammassissaaq.

Suleqatigiissiat Aningaasaqarnermut Naalakkersuisoqarfimmi Danmarkimilu Aningaasaqarnermut Ministereqarfimmi pisortat oqartussaasut allat attuumassuteqartut peqataatillugit pilersinneqartussaapput.

inissiat attartortittakkat danmark naalakkersuisut jens-frederik nielsen nutarterineq inuiaqatigiit

Atorfiit tamaasa takukkit

PODCASTI

Powered by Labrador CMS