Suliniut Illoqarfik Saligaatsoq: Maniitsumi eqqakkanik ilungersunartorsiutit aaqqinneqassasut
Maniitsumi Inussutissarsiortut Peqatigiiffiata Arctic Circle Businessillu suleqatigiillutik maanna illoqarfimmi eqqakkanik ajornartorsiutit sammilerpaat.
Maniitsumi Inussutissarsiortut Peqatigiiffiata Arctic Circle Business aaqqissuussinermik, iliuuseqarnermik ungasissumullu sammisumik illoqarfimmi eqqakkanik ilungersunartorsiutit aaqqiiviginissaat kissaatigalugu saaffigaa.
Sermitsiaq
Maniitsumik namminersorlutik inuussutissarsiortut illoqarfimmi eqqakkanik ajornartorsiutit naammagiunnaarpaat, avatangiisinullu, peqqissutsimut illoqarfiullu isikkuanut suli annertunerusumik kinguneqartinnagu, iliuuseqarnissarlu kissaatigalugu.
Taamaammat Suliniutit Illoqarfik Saligaatsoq aallartinneqarpoq.
Maniitsumi Inussutissarsiortut Peqatigiiffiata Arctic Circle Business aaqqissuussinermik, iliuuseqarnermik ungasissumullu sammisumik illoqarfimmi eqqakkanik ilungersunartorsiutit aaqqiiviginissaat kissaatigalugu saaffigaa.
Taama Arctic Circle Business tusagassiuutinut nalunaarummi allappoq.
- Eqqakkanik ajornartorsiutit maannakkut passunneqanngippata, kingunissai imaannaanngitsuusussaapput. Eqqakkat amerliartorneri pinngortitamut kingunerluuteqarput, illoqarfimmi avatangiisinik ajornerulersitsillutik, mingutsitsinissamut aarlerinaammik annertunerulersitsillutik innuttaasunullu tikeraanullu kiisalu aningaasaliiumasinnaasunut pitsaanngitsumik takutitsillutik. Peqatigisaanik siunissami aaqqissuutit akisunerulerlutillu iliuuseqarnissaq kingusinnerujartortillugu akisunerulerlutillu pisariunerulissapput.
- Taamaammat Suliniut Illoqarfik Saligaatsoq saliinissamik taamaallaat suliniutaanngilaq – Tamanna Maniitsup siunissaanut aningaasaliineruvoq, Arctic Circle Business allappoq.
Pilersaarutip allanngorneq pingaarutilik takutippaa
Suliniutip pingaarutilittut ilaatut Arctic Circle Business HJHansen Recycling Groupimut, nunani avannarlerni saviminikunik atoqqiisarnermi suliffeqarfinni siuttutut inissisimasumut attaveqarpoq.
HJHansen maanna Maniitsumiippoq ilisimasanillu sukumiisumillu illoqarfimmi eqqakkat annertussusilerneqarneranni ikiulluni. Ilaatigut eqqakkat suussusaat misissoqqissaarpaat, annertussusaat nalilersorlugu taamatullu siunissami containerit qanoq amerlatigisut atorlugit illoqarfimmit aallarunneqarnissaat missingersorlugu.
Ilisimasaq tamanna ungasissumut sammisumik aaqqiissusiornermi pingaaruteqarpoq.
- Suliniut Illoqarfik Saligaatsoq allanngornermik pingaarutilimik ersersitsivoq: Namminersorlutik inuussutissarsiortut maanna avatangiisunut akisussaaffimmik tigusipput, illoqarfiullu imminut napatinnerusup pilersinnissaanut ilapittuillutik. Maniitsumi Inussutissarsiortut Peqatigiiffiata, Arctic Circle Businessip nunanilu tamalaani piginnaasat HJHansen Recycling Groupip piffimmi suliniutit avataanit ilisimasanik peqateqarlutik allannguinermik pilersitsisinnaanerat takutinneqarpoq.
- Suliniut manna Maniitsup siuttoorusussusianik ersersitsivoq. Illoqarfiup nammineq siunissaa kisiat pinnagu, aammali Kalaallit Nunaata sinneranut maligassiuinertut, Arctic Circle Business allappoq.
Suliniutip siunissami nunatsinni piffinni allani suliniutinut tunngavissiisinnaanera naggasiullugu erseqqissarneqarpoq.
