Sulisitsisut: Ilulissani ukiuunerani takornariat sammisassaqarnerusariaqarput  

Ilulissani mittarfik nutaaq 2200 meterisut takitigisoq oktobarip 29-ni ammassaaq. Mittarfik nutaaq nunanut allanut toqqaannartumik aqqutinik ammaasseqataassaaq.

Pissutsit periarfissallu nutaat atuuttussanngulerput. Tamanna Sulisitsisut Ilulissani immikkoortortaqarfiani siulittaasup, aamma peqatigiiffiup nuna tamakkerlugu siulittaasorigallagaata qilanaaraa.

- Mittarfik nutaaq isumalluarfigisorujussuuarput. Ilulissat ukiuni qulikkaani takornariartitsinermi ornigarneqartutut ineriartortuarsimavoq, mittarfimmillu sanaartorneq ineriartornerup ingerlaqqinnissaanut aningaasaliineruvoq pingaarutilik. Inuussutissarsiortunut suliffissanik pilersitsinissamut, suliffeqarfinnik ineriartortitsinissamut aammalu aningaasaliisartunik kajumilersitsinissamut tunngavissamik nukittunerusumik pilersitsivoq, Jens Peter Pars Sermitsiamut oqarpoq.

Taassuma naliliinera naapertorlugu Ilulissat tikikkuminarsippat nunap immikkoortuani, tassa Qeqertarsuup Tunuani, takornariaqarnerulernissaa periarfissanngussaaq. Tamannalu takornarialerisut suleqatigiinnerunissaannik aamma periarfissiissasoq, siulittaasoq isumaqarpoq.

- Tamanna unnuisarfinnut, misigisassarsiornernut, neriniartarfinnut, angallassinermut aammalu suliffeqarfinnut takornariartitsinermut sullissisunut atuuppoq, Jens Peter Pars oqarpoq.

Ukiuunerani neqeroorutit amerlisikkusukkai

Ilulissat upernarneranit ukiarneranut takornariarpassuarnit tikinneqartarpoq. Takornarialerisut illoqarfimmi pitsaasumik ilaatigullu aamma takornariarpassuarnit tatineqarlutik aasami ulapputtartut Sulisitsisut isumaqarput. Taamaattumik nutaamik mittarfittaarnermi ukiuunerani sammisassat ukkatarineqarnissaat siulittaasup kissaatigaa.

- Mittarfik ukioq naallugu piffissami sivisunerusumi takornariartitsinermut tunngasunik sammisaqartitsinissamut atorneqartariaqarpoq.

- Tamanna suliffeqarfinnut ingerlatsinermi tunngavissamik patajaannerusumik pilersitsisinnaavoq aammalu ukioq kaajallallugu suliffissanik amerlanerusunik pilersitsisinnaalluni. Kisianni tamanna anguniarlugu siunnerfilimmik nittarsaassineq, suleqatissanik nutaanik pilersitsineq aammalu ukiukkut takornarianut naleqquttunik neqerooruteqarneq pisariaqarput, Jens Peter Pars oqarpoq.

Suliniutilli nutaat piviusunngussappata aningaasaliinissarlu kajungernartuussappat sinaakkutaasut pitsaasuusariaqartut, taanna isumaqarpoq. 

- Matumani aalisarnermut, takornariartitsinermut aammalu pigisamik aalaakkaasumik piginnittuunermut inatsisiliornerup aningaasaliissutissanik pisariaqartinneqartunik pissarsiniarneq ajornarnerulersissinnaanera ernumassutigaarput.

Taassuma Ilulissani Kalaallit Nunaatalu avannaani aningaasaleerusuttunik oqaloqateqartarnertik aamma oqaatigaa.

Illoqarfiit allat tikikkuminarsisikkusukkai

Ilulissani tikikkuminassuseq pitsaanerulissagaluartoq illoqarfiup eqqaaniittut illoqarfiit allat suli tikikkuminarnerusariaqaraluartut, Sulisitsisut isumaqarput. Taakkua Ilulissani mittarfissaq Ilulissaniinnaq mittarfissatut isiginagu nunap immikkoortuani mittarfittut atorneqarnissaa pingaartippaat.

- Pisortat mittarfiup eqqaani attaveqaasersuutinut akisussaaffeqarput. Takornariat nunap immikkoortuanut ingerlaqqissinnaasariaqarput, aammalu sanaartornerit ineriartornerillu mittarfiup malitsigisaanik pisariaqartinneqartut piviusunngortinneqarsinnaasariaqarput, siulittaasoq oqarpoq.