– Suna tullinnguunnersoq eqqarsarnarpoq

Campus Ilimmarfimmi nipaappoq.

Ilisimatusartut ataasiakkaat kaffimik kissartumik nillujuitsumiititaqarlutik qarasaasiaminnik suliaqarput — januaarimi misilitsinnissamut piareersarlutik.

Nerisarfilli inoqalaarpoq. Kaffisiniartoqarlunilu patitarsiniartoqartarpoq.

- 65 koruunit, Maren Blytmann, akiliisitsisoq, oqarpoq.

Akiliummik akiliissut nipiliorpoq.

- Qujanaq.

Puugutarsuit nerriviillu assakaasulli saviminiusut nerisarfiup igaffiani nipiliorput.

Maren Blytmann suleqatini marluk, Aningâk Tobiassen aamma Lena Bidstrup, peqatigalugit qallersukkani taniillunilu frikadellinik qerititassanik siatsivoq.

- Tuttup neqaanik frikadelliliat, Lena Bidstrup kantiinami pisortaq ilisimatitsivoq.

Lena Bidstrup neqimik aserortikkamik aalassilluni sulinngikkaangami nutaarsiassat USA-mut, Trumpimut Kalaallit Nunaannullu tunngasut malinnaavigilluartarpai.

USA-p Venezuela januaarip pingajuani saassummagu, nunap taassuma præsidentia nulialu tigusarimmagit kinguninnguatigullu Kalaallit Nunaat tiguarusullugu eqqartuileqqimmalli malinnaalerpoq.

- Soorunami malinnaavunga. 110 procentimik, taanna oqarpoq.

Maren Blytmannip assani igaffiup errortorfiani errortorpai. Angerlarsimaffimmi pisartut soqutiginerugaluarlugit qanoq pisoqassanersoq aamma pissanngatigaa.

- Malinnaavigerpianngilakka, taanna oqarpoq.

- Qanoq pisoqarnersoq aappara aperiinnartarpara. Taassuma tv-mi radiomilu aviisit aallakaatitat tamakkualu tamaasa malinnaaffigisarpai.

Aningâk Tobiassenip, inuussutissalerinermi ikiortip, pisut Facebookikkut radiokkullu malinnaaffiginerusarpai.

- Venezuelami iliuuserisimasai eqqarsaatiginaqaat. Uagut tullinnguuppugut, imaluunniit susoqassava, taanna aperaaq.

TV2-mi nutaarsiassat unnuakkut isiginnaartarai

TV2-mi nutaarsiassat unnuakkut isiginnaartarai

Aalisartut arlallit umiatsiatik Nuummi umiarsualivimmi iluarsaatileruttopaat. Naajat qarlortut motoorit nipiliorput.

Nukaaraq Lund Serritzlev talittarfimmiit majuarpoq. Ningitseqqammerpoq, kangerlummili qaleralinniarnerusarpoq.

Maanna qitornani marluliingajalersoq meeqqerivimmut aatinnagu atisani taarseqqaassavai.

Qallunaat toqqaannartumiknutaarsiassaqartitsivii, soorlu TV2News, maannakkut malinnaaffiginerpaasarpai, taanna oqaluttuarpoq.

- Nalinginnaasumik taamaaliorneq ajoraluarpunga, maannakkulli nalunaaquttap nikingassutaa pissutigalugu unnukkut taamaaliortarpunga, taanna oqarpoq.

Ernumagami nutaarsiassanut malinnaasarpoq.

- Trumpip Kalaallit Nunaat piumavaa. Taama oqarpoq – pimoorukkaalu inuppassuit oqartarput, Nukaaraq Lund Serritzlev oqarpoq.

- Sakkutuunik maanga tikiuttoqassanersoq ernumaginerpaavara.

Ernumassuteqaraluarluni USA-llu Kalaallit Nunaat saassussinermini tulliani saassutissanngikkaa kissaatigigaluarlugu ilaquttani ernumassuteqassanngitsut oqarfigisarpai. Donald Trumpip suna siunertarineraa takoqqaartariaqarparput, ilaquttani oqarfigisarpai.

Siunissami qanoq pisoqarnissaa neriuutigaajuk?

- Tamanna naluarput. Kalaallit Nunaannili nutaanik periarfissaqalissanersoq qilanaaraara. Assersuutigalugu aatsitassarsiornermut aalisarnermullu tunngatillugu, Nukaaraq Lund Serritzlev akivoq.

Lisathe Møller Nuummi atuakkanik atorniartarfimmi issiavoq.

Paasiniaasarfimmi qulaaniittumi inuit - atuagaanerusut pillugit - apeqqutissaqaraangata ikiortarpai.

“Aamma?” Donald Trump – siornatut 2019-imitullu – Kalaallit Nunaat pisiarerusullugu oqarmat eqqarsarpoq.

- Inuppassuit annilaangapput. Uangali annilaangassanngilanga, taanna oqarpoq.

- Siorna annilaalaarpunga, maannali eqqissisimaneruvunga.

Lisathe Møller Facebookimi nunatsinnilu nutaarsiassani malinnaasaraluarluni USA ulluinnarni sammivallaarnaveersaartarpaa.

Taava ernumanngilatit?

- Trumpip qanoq iliuuseqarumaarnera eqqarsaatigigaanni imaluunniit sakkutuulersorluni Kalaallit Nunaat tiguarniaraa misissuleraanni, tamanna pisussat ajornerpaartaraat. Maannali eqqarsaatiginianngilara, akivoq nangillunilu:

- Taanna præsidentiuvoq, USA-mili aamma allanik aalajangiisussanik politikkereqarpoq. Taannaannaanngitsoq.

USA-mik suleqateqarnissaq neriuutigigaa

Nuummi ilisimatusarfimmi nerisarfimmi aqutsisoq Lena Bidstrup nerrivik assakaasulik atorlugu qilalukkap neqaanik Uummannameersumik qerititsivimmut assartuivoq.

Iggavimmi suleqatinilu suliassatik pingaarnerpaatippaat, Trumpilu isumakuluutigivallaarnagu.

Suli nerisassiortoqartariaqarpoq. Ilisimatusartut suli nerisariaqarput.

- Soorunami suliartoraangatta tv-aviisimi allaniluunniit takusagut pillugit oqaloqatigiittarpugut, Lena Bidstrup oqaluttuarpoq.

Ullaakkut suliartoraangata unnuap ingerlanerani nutaanik oqaloqatigiissutigisinnaasaannik pisoqarsimasarpoq.

- Suna tullinnguunnersoq eqqarsarnarpoq, nerisarfimmi aqutsisoq oqarpoq.

Trumpip oqaasii siorna Donald Trump junior Nuummi tikeraarmat oqaatigisaanit allaanerulluinnarpat?

-Maannakkut ilungersunarneruvoq. Ilungersunarnerujussuuvoq, Lena Bidstrup akivoq.

Aningâk Tobiassenip tamanna isumaqatigaa. Nunalli allat – ingammik EU-miittut – Kalaallit Nunaannut tapersersuillutik nalunaaruteqarnerat tuppallersaatigisarpaa.

- Nunat ilaasa tapersersoraatigut eqqarsaatigalugu toqqissisimanarsivoq, taanna oqarpoq.

Piffissami tulliuttumi qanoq pisoqarumaarnera neriuutigaasiuk?

- Politikkikkut siuttutta amerlanerusut suleqatiginissaq pillugu Amerikamiut oqaloqatigisinnaassagaat neriuppunga, Aningâk Tobiassen akivoq nangillunilu:

- Kalaallit Nunaata tiguarnissaa pinnagu, suleqatigiinnissarli pillugu.

Lena Bidstrup isumaqataalluni ileqimisaartorpoq.

- Diplomatit naalakkersuisullu isumaqatigiinniallaqqissuussasut neriuutigisariaqarparput, taanna oqarpoq.