Sverigep timmisartut sorsuutit Kalaallit Nunaannut aallartikkusukkai
AS 39 Gripen tassaavoq Sverigep timmisartua sorsuut Kalaallit Nunaata Islandillu qulaani alapernaarsuiartortitassaa.
Sverigemiut timmisartui sorsuutit JAS 39 Gripen siusinnerusukkut NATO-p sungiusarnerinut atorneqarpoq, soorlu Hollandimi 2025-mi Ramstein Flag-imik sungiusaqatigiinnermi.
Assi: John Thys/Ritzau Scanpix
Sverigep timmisartoq sorsuut JAS 39 Gripen Kalaallit Nunaannut alapernaarsuiartortissavaa.
Tamanna Sverigemi illersornissamut ministeriaqarfiup tusagassiuutinut nalunaarutaani allassimavoq.
Timmisartut Kalaallit Nunaata Islandillu eqqaanni alapernaarsuissapput.
Tamannalu nunap immikkoortuani Europamut Atlantikullu illuatungaani suleqatigiinnermut pingaaruteqartumi aalajaatsumik inissisimalersitsisussaavoq, Ulf Kristersson nalunaarummi oqarpoq.
Timmisartoq JAS 39 Gripen Sverigemiut sakkussialioqatigiiffiannit Saabimit sanaajuvoq.
Sverigep ikiuinera Nato-p Issittumi alapernaarsuiartortitaanut ilaavoq, taakkualu Issittumi isumannaallisaanermik annertusaanissartik siunertaraat.
USA-p præsidentiata Donald Trumpip Kalaallit Nunaannik USA piginnittunngortariaqarneranik aallaavilimmik akerleriittoqangaalernerata kingorna aallartitaavoq.
Trumpip arlaleriarluni oqaatigaa Ruslandip Kinallu soqutigisaannut tunngatillugu Issittumi isumannaatsuunissaq ernumagigini.
Taamaattumik præsidenti piffissami kingullermi isumaqarpoq Kalaallit Nunaata Amerikamiunut tunniunneqarnissaa pisariaqartoq.
Januaarilli naanerani NATO-p generalsekretæria Mark Rutte ataatsimeeqatigereeramiuk Trumpip isumani allanngortippaa. Kingorna issittumi isumannaallisaanissap annertusarneqarnissaa ukkatarineqarpoq.
Arctic Sentry-mik Nato-p Arktisimi sakkutooqarnerup ataqatigiissaarinera tigusimavaa - Kalaallit Nunaanni kisimi pinnani.
Taamaaliorpoq amerikamiunit tapersersorneqarluni, suli nalunarallarpoq USA qanoq annertutigisumik peqataassanersoq.
Issittumi alapernaarsuinermik ingerlatsineq aqqutigalugu Nato Issittumi tamarmi – Kalaallit Nunaanniinnaanngitsoq – sakkutooqarnikkut ataqatigiissaarisutut inissippoq.
Danskit illersornissamut ministeriat, Troels Lund Poulsen (V), sisamanngornermi oqarpoq naatsorsuutigalugu Danmark Issittumi isumannaallisaanermut timmisartunik, sakkutuunik kiisalu imarsiornermi sakkutuunik issittumi isumannaallisaanermut ikiuutissasoq.
