Taamaammat Siumut ministeriunertut piukkussaminik tikkuussereerusunngilaq 

Danmarkimi partiit saamerliit talerperliillu Folketingimut qinersinissami naligiissaqisut ilimasaarutigineqarmat kalaallit Folketingimut qinigaatitassaat kiap ministeriuninngornissaanik aalajangiisoorataannaapput. 

Siumumilli kina ministeriunertut piukkunnerunerlugu oqaatigerusunngilaat.

- Tikkuussilinngilagut kina ministeriunerussanersoq, danskit qinersisartuisa aalajangigassarivaat, Siumut siulittaasua Aleqa Hammond taama oqarpoq imalu nangilluni.

- Kisiannili aalajangiisunngussagaluarutta oqariartuutissagut isumaqatiginniutissat taakkuupput, apeqqutaatinnagu aappaluttunuunersoq imaluunniit tungujortunuunersoq.

Danmarkimimi kia ministeriuninngornissaanik aalajangiisussanngussagaluarunik kikkut tunniussaqarnerusinnaanerat Siumumit takoqqaarusuppaat.

- Pissarsiassatsinnik annerpaamik qulakkeerinnissinnaasut suleqatigissavagut, Aleqa Hammond oqarpoq.

Illersornissamut isumaqatigiissut isumaqatigiinniutiginiaraat

AAMMA ATUARUK

Siumup USA-mut illersornissamut isumaqatigiissut isumaqatigiinniutigeqqikkusup-paa

Siullertut Danmarkip USA-llu illersornissamut isumaqatigiissutaata 1951-imeersup nutarterneqarluni nunatsinnit atsioqataaffigineqarnissaa ministeriuninngorniuttunut piumasaqaatigerusuppaat. 

- Issatsiaannannguaq ersiortinneqarpugut danskit amerikarmiullu illersornissamut isumaqatigiissuteqaasaartut. Pissutsit sattaasersortutut piginneqataanngitsutullu atukkat Kalaallit Nunaannut tulluarunnaarput, nunasiaataanerup nalaani isumaqatigiissutaasimasut, Aleqa Hammond oqarpoq. 

Isumaqatigiinniarnerni timitaleerusuttut pingaarnerutinniarpaat. 

- Kalaallit naligalugit oqaluttarunik, aammami oqaluttaramik, timitaliinissaat tullinnguuppoq. Takoqqaarusupparput timitaliinissaminnut neriorsuutaat. 

USA-p nunarput, allaat sakkulersorluni, tiguarniarlugu qanittoq tikillugu siorasaarisarpoq. Taamatut inissisimaneranni qanoq ililluni illersornissamut isumaqatigiinniaqatigineqarsinnaappat?

- Amerikarmiut pissuserinnerunissaannut tunngasoq isumaqatigiissummiinngilaq. Kisiannili isumaqatigiissutissaq uaniittariaqarpoq: Sakkutooqarfiit sumiissappat? Umiarsualiviit sumiitsinniarpaat? Illersornissakkut qanoq annertusaaniarpat? NATO-p suleqatiginerani suna pingaarnersiugaava issittumi? Assigiinngitsut apeqqutit tamarmik, uagut soorunami nunarput inuilu pineqarmata, issittoq pineqarmat isumaqatigiissummik piginneqataasuusariaqarpugut, Aleqa Hammond oqarpoq. 

- Tamarmik arriitsumik sulinikuupput

Ministeriuneq Mette Frederiksen Danmarkimi talerperlernut sanilliullugu nunatsinnut tunngasunik arlalinnik suliniuteqartareerpoq. Assersuutigalugu meeqqat Danmarkimut misiliutissatut 1951-imi aallartitaasimasut ministeriunerunermini siullermi, 2020-mi, utoqqatserfigai. 

Aamma piumassuserinngisaminnik naartunaveersaasersorneqarsimasut siorna utoqqatserfigai. Siumumilli isumaqarput suliat allat, soorlu suliaq inatsisitigut ataataqanngitsunut tunngasoq, piumassuserinngisaminnik naartunaveersaasersorneqarsimasut taarsiiffigineqarnissaanut suliaq, aamma kalaallit meerartaasa Danmarkimi najugallit angajoqqaaminnit arsaarinnissutigineqartarnerannut tunngassuteqartut paamaarunneqarpallaartartut. 

- Takorloorsinnaanngilarput danskit taama pineqarsimasuuppata taama sivisutigisumik utaqqisimasariaqaraluarneri. Pingaarnerpaatut suliassamittut isigisimasuugunikkit suliassatik naammassisimassagaluarpaat. Taamaattumik apeqqutaanngilaq aappaluttuunersoq tungujortuunersorluunniit. Tamarmik arriitsumik sulinikuupput, Aleqa Hammond naggasiivoq.