Nunami inoqarfiit siammasissut, silap atugassarititaa assartuinermullu periarfissat killeqartut. Sinerissami orpeerniarnermi unammilligassat ilagigaat, KNI A/S-imiit paasissutissiissutigineqarpoq.
- Soorunami pisisartut kiffartuuttuarusuppagut juullimilu nioqqutinik siammasissunik neqerooruteqarusulluta, KNI A/S-imi sulisoqarnermut, attaveqaqatigiinnermut piujuartitsinermullu pisortaq Julianne Henningsen Heilmann oqarpoq.
Nunami inoqarfiit siammasissut, silap atugassarititaa assartuinermullu periarfissat killeqartut. Sinerissami orpeerniarnermi unammilligassat ilagigaat, KNI A/S-imiit paasissutissiissutigineqarpoq.
- Soorunami pisisartut kiffartuuttuarusuppagut juullimilu nioqqutinik siammasissunik neqerooruteqarusulluta, KNI A/S-imi sulisoqarnermut, attaveqaqatigiinnermut piujuartitsinermullu pisortaq Julianne Henningsen Heilmann oqarpoq.
Nuummut 20.000-it missaanni innuttaqartumut orpeerniarneq, nunaqarfinnullu mikisunut 50-it missaannik innuttaqartunut juullip orpianik assartuineq annertuumik assigiinngissuteqartoq, taassuma erseqqissarpaa.
- Assartuinermi atugassarititat allaanerulluinnarput, oqarpoq.
Nuummut nassiussat Aarhusimiit Nuummut toqqaannartumik nassiunneqartarput, illoqarfinnili nunaqarfinnilu allani orpiit nassiunneqarnerat akisuneruvoq sivisunerulaartumillu assartuisoqartarluni.
- Ingammik sumiiffinni sikusartuni, umiarsuaq kingulleq aggustimi oktobarimilu tikittarpoq. Taamaattoqartillugu orpiit nutaajutinniarnissaat ajornakusoortarpoq, qerititsiviillu atorneqarsinnaasut killeqartarlutik, Julianne Henningsen Heilmann oqarpoq.
Nioqqutitut nalinginnaasutut assartorneqartartut
Orpiit assartugassatut nalinginnaasutut angallanneqartartut, umiarsuaatileqatigiiffik Royal Arctic Line AG-mut ilisimatitsivoq.
- Orpiit atuisuniit containerinut assartugassanngorlugit inniminnerneqakkajuttarput, taamaanngippat umiarsualivimmut tunniunneqartarlutik sulisuttalu containerinut poortortarlugit, Aputsiaq Lynge RAL-imi ingerlatsinermut pisortaq oqarpoq.
Tassa KNI A/S-ip orpiit nassiussat allat assigalugit nalinginnaasumik assartortarpai.
- Sila nillertereersoq orpiit Danmarkimiit nassiunneqartarput, taamaattumik nalinginnaasumik assartugassatut nassiunneqartarput, Julianne Henningsen Heilmann oqarpoq.
Suliffeqarfiup Greenland Escapep, Nuummi juullimut niuffatsitinermik ingerlatsisuusup, orpiit panerpallaannginnissaat anguniarlugu Danmarkimi toqqorsivinni nillertumiinnissaat qulakkeertaraat, AG-mi sapaatip-akunnerani kingullermi saqqummertuni allaaserineqarpoq.
Orpiit siunissami nioqqutigineqassappata panersinnaanerat annikillisinniarlugu, containerini nillataartitsivimmiitinneqartassanersut qerititsivimmiitinneqartassanersulluunniit eqqarsaatigineqassasoq, KNI A/S ilisimatitsivoq.
- Taamatulli nassiussineq nalinginnaasumik nassiussinermit akisunerujussuuvoq, tamannalu pisisartunut akisunerulersitsissalluni, Julianne Henningsen Heilmann nassuiaavoq.
Amigartoorutit kommuninut aasaq manna ilisimatitsissutigineqartut
KNI A/S-ip sinerissami siorna orpeerniarnini amigartoorutigisimallugu paasissutissiissutigaa.
- Taamaattumik kommunit sumiiffinni namminneq aaqqiissuteqarsinnaaniassammata ukioq manna orpinnik nioqquteqarniannginnerput pillugu aasaq nalunaarfigaavut, oqarpoq.
Julianne Henningsen Heilmannip pisisartunut juullimut orpeerniartarnissaq suliffeqarfimmiit misissuiffigineqaleruttortoq paasissutissiissutigaa.
- Piffissami aggersumi suliaq tamanna misissussavarput, oqarpoq
