Tasiilaq ilaqutariinnik annaasaqaqqippoq

Josefip igaani qiviallattaallugillu aalatillattaarujoorai, nulia nerisarfimmi issiarujoorpoq. Meeqqat – inimi - iggaviup sanianiittumi Frozen isiginnaartarlugulu pinnguarput. Ilaqutariit Nuussuarmi utaqqiisaagallartumik najugaannut iserluni tuttu suppi sivitsortumi qalaaterusaagaq naanngitsuugassaanngilaq.

- Nuummut pigatta siullertut kissaatigaara tuttut. Aamma ullut tamangajaasa yoghurtitortarpunga, Karen oqarpoq.

Karen, Josef meeqqatillu marluk Nuummut qaammatip ataatsip matuma siorna nuupput. Tasiilamilu najugaqarallaramik tuttuguinnartarsimanngillat. Karenip nillataartitsivitsik ammarpaa, Tasiilamiikkallaramillu amigaatigisarsimasamik ilaat: Iipilit, peberfrugtit qallersuutissarpassuillu takutillugit.

- Ukiuleraangat piareersartarpugut. Qerititsiviit qallersuutissanik immerlugit. Maani nungunneq ajorneri suli sungiunniarsaraara, ilaanni suli pisiniarpallaartoortarpugut. Aamma akikinnermik, Karen illarlunilu oqarpoq.

- Sooruna Tasiilap pisiniarfia peqarneq ajortoq?

Josefip Karenillu Nuummut nuukkusunnertik piffissami sivitsortumi eqqartullattaasarpaat. Karenip anaanaa parkinsonimik taasagaannik nappaateqalersimasoq qanillerusullugulu, periarfissat imminnut meeqqanullu pitsaanerusut ujartorusuleqqagamikkit. 

Tamarmik Tasiilami suliffigissaarlutillu avatangiiserissaaraluarput. Karen 43-nik ukioqarpoq, Tasiilamilu napparsimavimmi sundhedsassistentitut atorfeqarnikuulluni. Massakkut Sanami sulivoq. Josef 50-inik ukioqartoq angallammi takornarianik angallassissutaasumi aquttuugaluarpoq, saniatigullu qatserisartuulluni. Maanna meeqqamik, Nuunu-Ajaajap sisamanik ukiullik, Inaluullu arfinilinnik ukiullip sungiussiniarnerani sulinngikkallarpoq.

- Meeqqat meeqqerivimmi atuarfimmilu sungiussiimineruppata arlaanni sulilerumaarpunga. Nuummi periarfissarpassuaqarpoq, aamma qatserisarfimmiit tikilluaqqusereernikuupput, Josef oqarpoq.

Ilaqutariit tuttu suppitussamaaqisut pulaaratsigit meeqqat inersimanerusut marluk isersimaqataapput, taakkua Karenip meeraqarfimminit allamit meerarai. 20-nik ukiulik Sofus terminalarbejderinngorniartoq, 25-nillu ukiulik Ellen Nuummi GU-mi massakkut ilinniartoq isersimarujoorput.

- Iseriaannanngorlugit iluaqaaq, Ellen qungujulluni oqarpoq.

Meeqqani nukarliup tullia, arfinilinnik ukiulik Inaluk, naatitanngersorujussuuvoq. Inalummut ukiuni kingullerni Tasiilamiinneq erloqinarsigaluttuinnarpoq. Umiarsuarmi nioqqutissanik Tasiilamut pajuttoq kingulleq novembarimi tikereeraangat naatitanik allanillu nioqqutissanik nutaanik pissarsiniarneq ajornarsivittalernikuuvoq. Icelandair Tasiilamut ukiuunerani nioqqutissanik nutaanik ukiorpassuarni pilersuisartoq ukiuunerani tikissaarpoq. Islandimiit Kulusumut ukiuunerani timmisartuussineq akilersinnaanngimmat aqqummik unitsitsinermut tunngavilersuutigineqarluni. Inaluup angajoqqaani apersortalerpai.

- Naatitanngertorujussuuvoq, iipili ullormut pinngitsoorsinnaanagu. Taava akisinnaanngisatsinnik ukiuni kingullerni aperisalerpoq “Sooruna Tasiilap pisiniarfia peqarneq ajortoq?”. Nalligiummerlugu nuliannut uteriisertalerpunga Nuummut misiliisariaqarluta. Saniatigullu nioqqutissat akitsoriartuinnarlutik, Josef taama oqartoq Karen isumaqataavoq.

- Ippassaraasit Facebookimut ilisisoqarsimavoq qaqortuliaq ataaseq 53 koruunit, Karen oqarpoq.

Kisimiinngillat 

Ukiuni kingullerni nuuttuni ilaqutariit Nathanielsenikkut kisimeeqqajanngillat. Tasiilamimi innuttaasut ukiut qulit ingerlaneranni 16 procentimik ikileriarput. Innuttaasut 2015-imi 2.093-iupput, ullumikkut 1.758-iinnanngorsimallutik.

Innuttaasut ikiliartornerat meeqqat amerlassusaannut annermik sunniuteqarpoq. Tasiilami meeqqat 2015-imi 697-iupput, ullumikkut 169-inik ikinnerullutik 528-nnanngorsimallutik. Meeqqat sisamariaatingajammik ikilipput. 

- Tunumiut maanga nuuttartut nalunngisakka ilinniagaqartuupput. Ataasiakkaajupput uattulli ilinniagaqanngitsut. Nuuttarput Nuummi periarfissat annertummata, suliffissat ujartorlugit, Josef oqarpoq.

Ilaqutariit Nathanielsenikkutulli ittut Tasiilamiit aallaraangata innuttaasut ikiliinnartanngillat. Illoqarfilli innuttaasunik tunniussassalinnik annaasaqartarpoq. Ilaqutariit Nuummut nuuttussanngormata ugguartorpassuupput.

- Arlaleriarlunga uanga tusarpara soorlu napparsimavimmi sulininni, suliffiga iluatsitsinikuusoq. Oqartarput: “Annaasaq annertoorujussuaq annaalerparput,” Tasiilami qasseriarlunga tusarnikuunerpara, Karen oqarpoq.

Pinngortitaq alianaappoq, illoqarfilli ineriartunngilaq

Naak Nuummi nioqqutissanik amigaateqaratik iluatakkaluarlutik, illoqarfik qimatartik eqqaallattaasarpaat.

- Unganaraluaqaaq Tasiilap pinngortitaa eqqarsaatigalugu, soorunami arlaatigut tikeqqissinnaajumaarparput, Karen taama oqarmat uia isumaqataavoq.

- Pinngortitartaa Tasiilap aasakkut angallavigeqaaq, alianaageqaarpullu. Ingammik Sermilik angalaarfigisaqigatsigu. Pinngortitartaa puigornavinngilarput alianaaqimmat. Kisianni illoqarfiup ineriartornera taama arriitsigitillugu uternissaq takorlooruminaappoq, Josef oqarpoq.

Nuuttaqattaassagunittaaq meeqqanut peqqinnarnavianngitsoq Karenip oqaatigaa. Arlaatigulli pisoqarnissaa sillimaffiginiarlugu Tasiilami inigisartik, uterusulissagunik angerlarfigisinnaaniarlugu ukiumi ataatsimi attartortikkallarpaat. Uterusulissappatali susoqartariaqarpa? 

- Ukiut qulit taakani maluginikooqaara kommunerujussuanngornermit Tasiilaq qanoq eqqugaatiginersoq, aallartiffiani ilaanikuugama. Suliffeqarfiit, soorlu Tusass, iffiorfik matorarput, afdelingit noorartut. Taamanili malunnarpoq Tasiilap ineriartornera unikaallarujussuarnikoq, Karen oqarpoq nerriviliorlunilu aallartilluni.

Josefip tuttu suppiliani qalaannaqaa, nuliamilu oqaatigisaanut isumaqataavoq.

- Tappavaniikkusuinnarsinnaassagaluarpunga neriorsuutit politikerininngaanniit ingerlaannaq piviusunngortinneqartaraluarpata. Arriippallaaqaaq. Soorlu uanga nuannarisara qatserisarfik, ukiut 16-it matuma siorna qatserisartunngoramali, eqqaamanerlunngikkukku marloriarluni pingasoriarluniluunniit qatserisarfissaq suli  kinguartinneqaqattaarpoq, Josef oqarpoq.