Tillinnianit 10.000 koruunit, nerinermilu allagartat tillinneqartut

Qaqortumi pisiniarfimmi tillinniartoqarneranik ataasinngornermi ullaakkut politiinut nalunaarutiginnittoqartoq, pigaartut pisortaat Thomas Jeppesen oqaluttuarpoq.

Tillinniat igalaaq aserorlugu isersimapput, tassanilu aningaaserivik tigusinnarlugu qimaasimapput. Aningaaserivik 10.000 koruuninik, Air Greenlandimiillu nerinermut allagartanik imaqartoq, pigaartut pisortaat oqaluttuarpoq.

Politiit suliami pasisaqarput, tillinniarnerli suli misissuiffigaat.

Nuummi ATV-mik tillinniartoqarsimasoq ataasinngornermi ullaap tungaani nalunaaqutaq qulip qaangilaarnerani politiit nalunaarfigineqarput. ATV-mik piginnittup nalunaaquttap-akunnialui qaangiuttut, ATV-t nammineq nassaarisimagai, Pigaartut pisortaat oqaluttuarpoq.

ATV-li ajoqusersimavoq, tillinniaq aqqorlussimanera matumani pissutaasorineqarpoq. ATV-llu assakaasimanera takuneqarsinnaavoq.

Politiit qatserisartullu Aasianni Ikerasannguani, inissiamut ikuallattumut ataasinngornermi unnukkut ornigupput.

Ikuallattoqarneranik nalunaarut nalunaaqutaq 21.13 tiguneqarpoq, ikuallannerlu piaaraluni aallartinneqarsimanersoq politiit maanna misissuipput.

Kangerlussuarmi aqqusinermi eqqissiviilliortoqarnerani marlunngornerup unnuaani nalunaaqutaq 02.56 politiit ornigupput.

Inuit marluk imminnut paalerput, aappaalu politiinit tigusarineqarpoq.