Timmisartoq Hercules pingasunngornermi Nuummut mittoq

Nunat arlallit sakkutuuliatik Kalaallit Nunaannut nassiuppaat

Timmisartoq Hercules sakkutuunik ilaasoqarluni pingasunngornermi unnukkut Nuummut mippoq. Tamanna Issittumi amerlanerusunik sakkutooqarnermut ilaavoq.

Danmark NATO-milu suleqataasut arlallit Kalaallit Nunaannut sakkutuunik aallartitsipput. Timmisartut assartuutit marluk mikkumaartut Issittumi Sakkutooqarfik pingasunngornermi Facebookimi allappoq: ataaseq Nuummut aappaalu Kangerlussuarmut.

Sakkutuulli sumiinnissaat nalunaarutigineqanngilaq.

Sakkutooqarnikkut qanoq amerlatigisut Kalaallit Nunaannut tikinnissartik naatsorsuutiginersut, sumilu inissinneqassanersut Sermitsiap danskit illersornissamut pisortaat Michael Hyldgaard Danmarkimi tusagassiortunik katersortitsinermi aperaa.

- Inuit qassiunerat, suullu suliarineqarnersut apeqqutaatillugu qassiusarnissaat nikerartassaaq. Tamannattaaq sumi suliaqartarnissatsinnut atuuppoq.

- Taamaammat imaani silaannarmiluunniit suliaqartassagatta suliagut paasineqartassanngillat ikittuinnarnilluunniit paasineqartassapput, allallu nunami immaqalu allaat Nuummi pisassamik malugineqartarumaarput, taanna akivoq.

Ritzaup nunat sorliit sakkutuunik Kalaallit Nunaannut aallartitsinersut nalunaasugaa ataani takuneqarsinnaavoq. Sakkutuut nunanit allaneersut danskit sungiusarnerannut Operation Arctic Endurance-mut peqataasut tamarmiusut ukuupput:

Sverige: Sakkutuut atorfillit arlallit Kalaallit Nunaannut aallartinneqarput.

Norge: Sakkutuut atorfillit marluk Kalaallit Nunaannut aallartinneqarput.

Tyskland: Paasiniaasussat 13-it Kalaallit Nunaannut aallartinneqarput.

Tuluit Nunaat: Sakkutooq atorfilik ataaseq Kalaallit Nunaannut aallartinneqarpoq.

Frankrig: Sakkutuut 15-it Kalaallit Nunaannut aallartinneqarput. Taakku nunakkut, imaatigut silaannakkullu suliaqarnissamut Frankrigimit ulluni aggersuni ilaneqassapput.

Holland: Imarsiornermi sakkutooq atorfilik ataaseq Kalaallit Nunaannut aallartinneqarpoq.

Finland: Sakkutuut atorfillit marluk Kalaallit Nunaannut aallartinneqarput.

USA Pituffimmi sakkutooqarfimmini inunnik 150-it missaanniittunik sulisoqareerpoq. USA-p sakkutuui Kalaallit Nunaata illersornissaa pillugu 1951-imi isumaqatigiissut tunngavigalugu nunatsinnut isersinnaapput.

Timmisartoq Challenger danskit sakkutuuisa timmisartortartuinit pigineqartoq ataasinngornermi unnukkut Nuummut mippoq. DR taama allappoq.