Timmisartukkut Ilulissanit avannamut nassiussat 1,4 tonsit tungaanut Ilulissaniittut

Timmisartukkut nassiussat Ilulissaniittut, sumiiffinnut Ilulissat avannaanut ingerlaqqittussat, qanoq oqimaatsiginersut, Inatsisartunut ilaasortap, Jens Napãtûp (N), ilaatigut paaserusukkamiuk paragraf 37 naapertorlugu Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisumut, Iddimanngiiu Jensen Biancomut (IA), apeqquteqarpoq. Naalakkersuisorlu maanna akisimalereerpoq.

- Nassiussat Ilulissanut akunnitsinneqartut, sumiiffinnut allanut ingerlateqqinneqartussani, Upernavimmut, Qaanaamut, Qaarsunut / Uummannamut ingerlateqqinneqartussat 1000-1400 kg-nut missiliorneqarput, Naalakkersuisup akissutaani, Air Greenlandimit suliaasumi, ilaatigut allaqqasoqarpoq.

Taakkua ilaat kinguaattooqqasut ilaalli aamma piffissamik malinnittut akissummi allaqqasoqarpoq. Kinguaattooqqasut kinguaattooqqanngitsullu qanoq oqimaatsiginersut immikkoortillugit nassuiaasoqanngilaq.

Ilulissani avannamut nassiussassat sumukarfinnut qulaani taaneqareersunut ima Air Greenlandimit agguataarneqarlutik juunip 30-ani nalunaarsorneqarsimapput:

• Upernavik: 200-300 kg.

• Qaanaaq: 600-700 kg.

• Qaarsut / Uummannaq: 200-300 kg.

- Sapaatit akunnerini ukunani Ilulissani kianngaq unammillertitsivoq, taamaattumillu oqimaassusissamik killilersuinerit peqqutaallutik nassiussanik niusisoqartariaqartarpoq, timmisartuutileqatigiiffik allappoq.

Pitsaanerulertoqarnissaa naatsorsuutaa

Ilulissani nunani tamalaani mittarfik maanna pilersaarutaasut naapertorlugit ukiaru oktobarip 29-ani ammarpat, tamanna nunap sinneranut, aammalumi Ilulissat avannaanut assartuussisarnermi pitsaanerulersitsissasoq ingerlatseqatigiiffik allappoq.

- Ilulissanut Ilulissaniillu Imarpik qulaallugu toqqaannartumik timmisartuussisalernissaq maanna nunami namminermi timmisartuusseriaatsinut oqilisaataassasoq, Kalaallit Nunaata Avannaani nassiussanik toqqaannarnerusunik nassiussisinnaalernermik pilersitsiffiussasoq, aammalu angallaviit sinnerinik pisinnaasanik atugassiinermik kinguneqassasoq naatsorsuutigineqarpoq, Air Greenland, Naalakkersuisup Inatsisartunut ilaasortamut akissutaani allappoq.