Timmisartumik aqqaanermi sakkutuut assigiinngitsut ikiuuttut

Timmisartortartup toqungasup qaammammi matumani siusinnerusukkut Sermitsiap qaqqaaniit tikikkuminaatsumiit aqqarneqarnera illersornissaqarfiup ikiuineratigut pivoq.

Timmisartoq ataatsimik motoorilik oktobarip 25-ani silarluttoq qaqqamut nakkarpoq, oqartussaasullu aqqaanissamik annertuumik novembarip 7-ani aallartitsipput.

Sakkutooqarnikkut piginnaaneqarluartut arlallit suliassaq isumannaatsumik naammassiniarlugu atorneqartut Issittumi Sakkutooqarfik tusagassiutitigut nalunaarummi allappoq.

Sakkutuut immikkut sungiusarsimasut peqataallutillu sakkutuut imarsiortut umiarsuaat alapernaarsuut Thetis sakkutuullu timmisartortartut qulimiguuliutaat MH-60R Seahawk atorneqarput.

Timmisartortartoq atortullu elektroniskiusut aqqarneqartut

Timmisartortartoq ajunaarsimasoq, atortui elektroniskiusut pigisaasalu allat aqqarneqarnissaat siunertaavoq, taakkulu kingorna isumannaatsumik aqqarneqarlutillu politiinut tunniunneqarput.

Politiit piumasaqarnerat malillugu sakkutuut suliassanut taamaattunut immikkut ilinniartinneqarsimasut ikittunnguit suliakkerneqarsimasut Issittumi Sakkutooqarfik nalunaarpoq:

- Sumiiffinni tikikkuminaatsumi suliassat suliarissagaanni sulisunut atortunullu immikkut piumasaqaateqarpoq. Illersornissaqarfiup sulisut immikkut ilinniarsimasut atortullu immikkut ittut, piffissaq sivikitsoq atorlugu taamatut suliaqarnissamut atorneqarsinnaasut pigivai, Issittumi Sakkutooqarfimmi aqutsisoq, kommandørkaptajn Brian Jensen oqarpoq nangillunilu:

- Issittumi Sakkutooqarfiup sakkutuui ulluinnarni pissutsini immikkorluinnaq ittuni sungiusartarlutillu suliaqartarput, taamaalillutillu immikkut piginnaasaqalertarlutik. Taamaammat pisariaqartitsisoqariataaraangat Illersornissaqarfik ikiuukkiartorsinnaavoq – aamma pissutsit ajornakusooraangata.

Issittumi Sakkutooqarfik naapertorlugu ajutoornernik misissuisartut ajutoornermik misissuinertik ingerlatiinnarpaat, atortuisalu ilaat aqqarneqartut paasissutissaqarnersut misissussavaat.