Nunarsuarmi aningaasaqarneq pillugu Schweizimi Davosimi ataatsimeersuarneq World Economic Forum nunarsuup sinnerani malinnaaffigineqarpoq.
Donald Trump nunatta nalunaaqutaa malillugu pingasunngornermi ulloqeqqa sioqqutilaarlugu oqalugiarnissaa naatsorsuutigineqarpoq, præsidentilu qanoq oqassanersoq pissanngatigineqarluni – minnerunngitsumik Kalaallit Nunaannut Kunngeqarfimmullu tunngatillugu pisut aaqqiagiinngissutaasut pillugit oqaaseqassanersoq.
USA-p aningaasaqarnermut ministeriata Scott Bescentip Davosimi tusagassiortunik katersortitsereerpoq, taassumalu Donald Trumpip Kalaallit Nunaata USA-mut ilanngunnissaanik piumasaa uteqqippaa.
Trumpip angusani nersualaarai
Nalunaaqutaq 11.30 qaangilaaraa oqalugiarluni aallartippoq, Trumpillu præsidentitut aappassaanik atuuffimmini qaammatini aqqaneq-marlunni siullerni angusani nersualaarpai.
- USA-mit nutaarsiassanik nuanningaartunik nassarlunga Nunarsuarmi Aningaasaqarneq pillugu ataatsimeersuarnermut matumunnga tikiuppunga. (...) Aningaasaqarnerput siuariarujussuarpoq. Isertitat qaffakkiartorput. Akit appariartorput. Killeqarfivut matuagut, Trump oqarpoq, USA-milu aatsaat taama aningaasaliisoqartiginera eqqaallugu.
- Nunatut ajorluinnartutut issimavugut; maanna nunarsuarmi ingerlalluarnerpaavugut.
- Suut tamarmik nutaarsiassatsialaapput inuiannullu tamanut iluaqutaallutik. Amerika siuariartoraangat nunarsuaq tamarmi siuariartortarpoq. Ajortumik ingerlagaanga suut tamarmik ajortumi ingerlalersarput. Nakkariartoqatigalutalu siuariartoqatigisarpatsigut, Trump oqarpoq.
Europa sakkortuumik isornartorsioraa
Trumpip Europa sakkortuumik maanna isornartorsiorpaa.
Europami sumiiffiit ilaat ilisarnarunnaavissimasut, Europamilu politikki arlalinni kukkusumik ingerlasoq oqarpoq. Tunisassiornermut nukissiuutinullu politikki ilaatigut eqqaavaa.
USA-mi aningaasaqarnikkut politikki nammineq aqutsisuunermini pisoq Europamiut ilinniarfigingaarsinnaagaat, isumaqarpoq.
Trumpip USA-p aningaasaqarnerata ingerlallualernera eqqartorpaa, oqaatigalugulu niuernermi amigartoorutit ikilisimasut.
- Venezuela ikiorparput
Donald Trump Venezuela uuliamik pilersuinissamik isumaqatigiissuteqarfiginissaa sulissutigalugu oqarpoq. Venezuela USA-mik isumaqatigiissuteqarnissamut piareersimanerat pissutigalugu aningaasarpassuarnik iluanaaruteqassasoq aamma oqarpoq.
- Venezuela ukiut 20-t matuma siorna nunarujussuuvoq, ajortumilli aallarsimalluni, maannalu ikiorpavut.
- Saassussineq qaangiummat suleqatigillualerpagut. Qaangiummat ima oqarput: isumaqatigiissusiuinnarta. Amerlanerit taamaaliortariaqarput.
Kalaallit Nunaannut maanna eqqartorpaa
Præsidentip Kalaallit Nunaat maanna eqqartorpaa.
- Kalaallit Nunaanni Danmarkimilu innuttaasut ataqqingaarpakka, NATO-mili ilaasortaasut tamarmik nunaminnik illersuinissamik pisussaaffeqarput, USA-llu kisimi Kalaallit Nunaat illersorsinnaavaa, Donald Trump oqarpoq.
- "Peace of ice" - nuna taanna taajuminaappoq. Sikumineruna, oqarpoq.
Sorsunnersuup aappaani qanoq pisoqarsimanera eqqartorpaa:
- Sorsunnersuup aappaani Danmark nalunaaquttap-akunnialui ingerlanerinnaani Tysklandimit tiguarneqarpoq.
- Sorsunnersuup aappaani Kalaallit Nunaat illersorsimavarput, Trump oqarpoq USA-llu kisimi Kalaallit Nunaata illersornissaanut pisinnaasoq oqarpoq.
- Uagoqanngitsuuppat tyskisut annikitsumillu japanimiusut maanna oqalussagaluarpusi. Sorsunnerup kingorna Danmarkimut utertipparput. Sianiissimaqaagut. Maannali qujasuitsumik pissusilersorput, Donald Trump oqarpoq.
- Ineriartortinneqarpiaranilu illersorneqanngitsoq
Kalaallit Nunaat ineriartortinneqarpiarsimanngitsoq aamma oqaatigaa.
- Kalaallit Nunaat angisoorujussuuvoq najugaqarfigineqannginngajallunilu ineriartortinneqarpiarnikuunngitsoq. Allanngortinneqarnikuunngilaq.
- Nunap isumannaatsuuneranut nunarsuarmilu tamarmi isumannaatsuunermut tunngatillugu pisariaqartipparput. Qeqertaq taanna Amerika Avannarlermut ilaavoq. Nuna uagut killeqarfitsinniippoq, Trump oqarpoq.
Kalaallit Nunaat USA-mut ilaalerpat Natomut aarlerinanngitsoq, iligiinnilli nukittunerulersitsissasoq oqarpoq. USA iligiit akornanni naapertuilluanngitsumik maanna pineqarpoq, Trump oqarpoq.
Nato pillugu oqaaseqareerluni Trumpip Kalaallit Nunaat eqqartoqqilerpaa. Suna pineraa paasiuminaappoq, pissaanermilli atuiniannginnerarpoq:
- Pissaanerujussuarmik atuisuugutta unitsinneqarsinnaassanngikkaluarpugut. Taamaaliussanngilangali. USA-p piumasatuaa tassaavoq nuna Kalaallit Nunaat, Donald Trump oqarpoq.
Attartornissamimmi isumaqatigiissuteqarfigisaq kia illersorusussagamiuk?
Trump sorsuttoqalissagaluarpat missilit atorlugit Kalaallit Nunaata qulaani sorsunnerup annerpaartaa pissasoq oqarpoq.
USA-p ukiorpassuarni utertiffigineqaraniNatomut akiliuteqartarsimanera, USA-llu attartukkamik illersuiunnanngitsoq oqaatigaa. Taama oqarnermini Kalaallit Nunaat pivaa.
- Kalaallit Nunaata pigilernissaa piumasatuaraarput, aamma nunap piinut pisinnaatitaaffik pigisaqarsinnaatitaanerlu, illersussagaannimi piginnittuuneq pisariaqarmat. Attartornissamimmi isumaqatigiissuteqarfigisaq kia illersorusussagamiuk?
NATO-mut akiliuteqariarluni pissarsissutiginagulu, Trump oqarpoq.
- Sikumineq nunarsuarmi eqqissinermut aalajangiisuusinnaasoq
Trumpip USA-p Natomut iliuuserisimasai iliuuserisartagaalu pillugit Kalaallit Nunaat akissarsiarinissaa arlaleriarluni oqaatigaa.
- Maannalu sermimineq eqqissinissamut aalajangiisuusinnaasoq qinnutigivara, Trump oqarpoq, nangillunilu:
- Akuersisinnaavusi, tamannalu qujamasuutigissaqaarput.
- Naaggaarsinnaavusi, tamannalu eqqaamassavarput, Trumpip suna pinerlugu itisilernagu oqarpoq.
Isumaqatigiissutit suut eqqarsaatigaagit?
Oqalugiareernermi kingorna Donald Trump apersorneqarpoq, tassanilu Kalaallit Nunaat pillugu USA-p Danmarkillu akornanni isumaqatigiissut qanoq ittoq takorloorsinnaaneraa apeqqutigineqarpoq.
Trumpip apeqqut toqqaannartumik akinngilaa, oqarporli Kalaallit Nunaat Danmarkimut aningaasarpassuarnik naleqartoq uteqattaarlugulu Danmark mikisunnguusoq.
- Naalagaaffiup nunanilu allani isumannaallisaanissaq eqqarsaatigalugu pingaaruteqarluinnarpoq.
- Pissaanermik pilersitsisinnaavoq ‘inunnik ajortunik’ iliuuseqarsinnaajunnaarsitsisumik.
Danmarkip Kalaallit Nunaanni illersornissamut aningaasarpassuit atorniarlugit 2019-imi neriorsuuteqarsimasoq, Danmarkillu neriorsuutini eqqortinngikkaam Trumpip aamma oqaatigaa.
