Trump-ip siunnersuisuata nulia USA-p erfalasuanik Kalaallit Nunaat qallerlugu assilialiamik siammarterisoq

Siammartigaq Kalaallit Nunaata amerikamiut erfalasuanik qallerneqarsimaneranik assilialiaq arfininngornermi attaveqaqatigiittarfimmi X-mi arlalinnit maluginiarneqarpoq.

Allaatigisaq annikitsoq, "SOON"-imik imalik, kalaallisuunngortillugu "piaartumik"-mik isumaqartoq, siammartikkamut oqaasertaliunneqarsimavoq.

Aallartitaasoq tassaavoq amerikamiut podcastereq Katie Miller, siusinnerusukkut USA-p præsidentiata Donald Trumpip aqutsisoqarfiani atorfeqarsimasoq. Taanna 2025-p qeqqani aqutsisoqarfimmit tunuarpoq.

Millerip tunuaraluarluni, Politico naapertorlugu, USA-p naalakkersuisuinut attaveqarnini attatiinnarpaa, tassami Stephen Millerimut katissimavoq, taannalu præsidentip illorsuani Det Hvide Hus-imi  pisortaanerup tullersortaatut atorfeqarpoq.

Danmarkip aallartitaa akissummik tunniussaqarpoq

Donald Trumpip arlaleriarluni oqaatigaa Kalaallit Nunaat USA-mut ilanngutissallugu kissaatigigini.

Juullip tungaanut Trumpip Kalaallit Nunaannut immikkut aallartitaq toqqarpaa, oqarluni USA-p Kalaallit Nunaat pisariaqartikkaa nunap isumannaatsuunissaanut.

Katie Millerip Kalaallit Nunaannut quppernermini assiliartaliussimasaa tallimanngornermi akunnerni tallimani 2,7 millionit sinnilinnik isiginnaarneqarpoq 4000-it sinnerlugit oqaaseqarfigineqarluni, tamanna X-imi takuneqarsinnaavoq.

Danmarkip USA-mi aallartitaa, Jesper Møller Sørensen, Katie Millerimut quppernermini akissuteqarluni eqqaasitsissutigivaa, Danmark USA-lu qanittumik ikinngutigiittut suleqatigiittariaqartullu. Tamanna X-imi immikkut saqqummiinermi pivoq.

- Aap, naalagaaffeqatigiit Danmarkip killeqarfii tamakkiisumik ataqqineqarnissaat naatsorsuutigaarput, Jesper Møller Sørensen allappoq.

Siammartigaq Venezuela saassunneqareersorlu takkuttoq

Trumpip præsidentiuffiani siullermi 2017-imiit 2021-mut Mike Pencemut, taamanikkut vicepræsidentiusumut, tusagassiuutilerinerumut Katie Miller siunnersortaasimavoq.

Trump 2024-imi præsidentinngormat Katie Millerip suliffigilerpaa taamanikkut nutaamik pilersinneqartoq Naalagaaffiup Pitsanngorsaavigineqarneranut Immikkoortortaqarfik (Doge), nutaarsiassaqartitsivik Reuters allappoq.

Dogep siunertaraa pisortat aningaasartuutaannik sipaarniarnissaq, tamannalu pisortani sulisut tusindilikkaat soraarsinneqarnerannik kinguneqarpoq.

Techmilliardæri (qarasaasiatigut pilersuinermi milliarteerinngorsimasoq) Elon Musk Dogep siuttuuffigaa, taannalu novembarimi ukioq kingulleq atorunnaarsinneqarpoq.

Arfininngornerup unnuaani Caracasimi, Venezuelap illoqarfiata pingaarnersaanni, USA-p sakkutuuisa saassussinerisa nunallu præsidentianik, Nicolas Maduromik nulianillu tigusarinninnerisa kingorna Kalaallit Nunaat pillugu Millersip X-imi allagaa pivoq.

Tigusarinninneq nunat taakku marluk akornanni qaammatini arlalinni sakkortuumik aaqqiagiinngittoqareernerata kingorna pivoq, USA-mit ilaatigut ikiaroornartunik assartuineraalluni umiatsiat arlalissuit imaani saassunneqartareersut.

/ritzau/