Trump Jens-Frederiup oqariartuuteqareernerata kingorna: Annertuumik ajornartorsiutigissavaa

USA-p præsidentiata Donald Trumpip Jens-Frederik Nielsenip (D) ullumi oqaasii qisuariarfigai, tassa Naalakkersuisut siulittaasuata Kalaallit Nunaat USA-mut ilanngukkusunnginneranik naqissusiinera. Trumpip Jens-Frederik Nielsen kinaanersoq nalullugu ilaatigut oqaatigaa.

Toqqorsivimmit: Evelyn Hockstein/Reuters/Ritzau Scanpix

Ritzaus Bureau Ritzaus Bureau

Saqqummersinneqarpoq 13. Januaari 2026 - 21:37

USA-p præsidentiata Donald Trumpip naalakkersuisut siulittaasuata Jens-Frederik Nielsenip oqaaseqaatai tusagassiortunut qisuariarfigai.

Tusagassiorfik Bloomberg marlunngornermi unnukkut taama allaaserisaqarpoq.

Jens-Frederik Nielsenip Kalaallit Nunaata nammineq aalajangiisinnaassuseqarlunilu USA-mut ilanngukkusunnani Danmarkimut atanera marlunngornermi tusagassiortunik katersortitsinermi oqaatigaa.

Ussassaarut

Oqaatsit taakku kalaallit naalakkersuisuisa siulittaasuannut ajornartorsiuterujussuanngussasut, Trumpip tusagassiortunit aperineqarami oqarpoq.

- Taakkua ajornartorsiutigaat. Isumaqatiginngilakka. Kinaasoq (Jens-Frederik Nielsen, aaqq.) naluara, taannalu pillugu ilisimasaqanngilanga, tamannali annertuumik ajornartorsiutigilissavaa, Trump oqarpoq.