Trump: Kalaallit Nunaannut sakkutuunik nassiussissanngikkaluarpunga

USA-p præsidentiata Donald Trumpip amerikamiut sakkutuui Kalaallit Nunaannut nassiunnavianngikkaluarpai.

Bullhead Citymi, USA-p naalagaaffissuata Arizonap aamma Nevadap killeqarfianniittumi, qinersisartunik ataatsimiititsinermini sisamanngornerup unnuaani taama oqarpoq.

PBS Newsip toqqaannartumik aallakaatitaani takuneqarsinnaavoq.

- Tusagassiuutinit taamanikkut isornartorsiorneqangaarpunga, oqartaramik: "Kalaallit Nunaat pillugu oqalunnersi ajorluinnarpoq, tamanna ajorluinnarpoq!“

- Eqqaamaviuk isumaqarsimammata sakkutuut Kalaallit Nunaannut aallartinniarikka?

Trumpip oqalugiaataa nalunaaquttap-akunnera ataaseq affarlu sivisussuseqarpoq.

Oqalugiarnermini arlalinnik sammisaqarpoq, ilaatigut Venezuelami sorsunneq, Iranimi sorsunneq, Demokraatinik isornartorsiuineq aamma Republikanerit qinersinerup qiteqqunnerani ajugaassappata Amerikamiut inersimasut tamaasa 5000 dollarinik tuniumallugit qineqqusaaruteqarluni.

Kalaallit Nunaat aamma eqqartorpaa.

- Danmarkimit pigineqarsimavoq, nuna ajunngitsoq, nuna kusanartoq. Taamaakkaluartoq ungasissorujussuarmi ippoq, uagullu eqqannguani ippugut. Nunangaatsiarsuaq Texasimit anneq.

- Tassa nerrivimmut kusanartunut ilisarnaatigisinnaasatta ilaat, Trump oqarpoq.

Taamaasinerani USA-p præsidentiata Venezuela eqqaavaa.

- Puugutarput immerneqartuarpoq, Venezuelami? Pitsassuamik angusaqarfigiaarput aamma, oqarpoq.

Venezuelami præsidentip illorsuanut Amerikamiut sakkutuui iserterput præsidentiusorlu Nicolas Maduro ukiup aallartinnerani tigusaralugu. Tamatuma malitsigisaanik naalakkersuisuugallartunut USA uulia pillugu isumaqatigiissuteqarpoq.

Danmark, Kalaallit Nunaat USA-lu, USA-p Kalaallit Nunaannut attaveqarnera pillugu nutaamik septembarip naanerani isumaqatigiissuteqarput.

Isumaqatigiissut taanna 1951-imi illersornissaq pillugu isumaqatigiissummut taakkua nunat pingasut akornanni atsiorneqarsimasumut allannguutaavoq ilassutaallunilu.

Tamatuma saniatigut Kunngeqarfiup Danmarkip Kalaallit Nunaannut oqartussaanera uppernarsarneqarpoq, aamma kalaallit namminneq namminiilivinnissamut aalajangiisinnaatitaanerat akuerineqarpoq.

Trump inuit attaveqaqatigiittarfianni, Truth Socialimi pingasunngornermi ullaakkut allappoq, Kalaallit Nunaanni uuliamik, gasimik aatsitassanillu annertuumik misissuinissaq aallartittussanngortoq.

Tamatumali kingorna Kalaallit Nunaata uuliasiornerujussuaq itigartippaa.

Aammattaaq Danmarkimi nunanut allanut ministereqarfiup naqissuserpaa USA-p Kalaallit Nunaanni uuliamik aatsitassanillu allanik ujaasinissaa Kalaallit Nunaanni inatsisit sinaakkutaat malillugit pissasoq.

RITZAU