Trump Kalaallit Nunaannut tunngatillugu akitsuusiinissamik sioorasaaruteqartoq

USA-p præsidentiata Donald Trumpip nunat Kalaallit Nunaannut pilersaarutiminik tapersersuinngitsut akitsuuserniarlugit eqqarsaatersuutigaa.

Præsidentip illorsuani ataatsimeeqatigiinnermi nunat allat qanoq allanngortissinnaanerlugit ersersinniarlugu akitsuutinik atuinini eqqartoramiuk taama oqarpoq.

Ataatsimeersuarnermi peqqinnissaq sammineqarpoq, Trumpillu ilaatigut nakorsaatit akii eqqartorpai.

- Nunatta isumannaatsuunissaanut Kalaallit Nunaat pisariaqartikkatsigu nunat Kalaallit Nunaannut suleqataajumanngitsut immaqa akitsuusersinnaavakka, taanna oqarpoq.

Trumpip akitsuusiinissaq qanoq isumaqartinnerlugu itinerusumik oqaatiginngilaa.

Inatsisitugut naapertuuppa? 

Dansk Industrimi siunnersortiuneq Peter Bay Kirkegaard naapertorlugu Trumpip „piumalluinnaruni“ nunat Kalaallit Nunaannut pilersaarutiminik tapersersuinngitsut immikkut akitsuusersorsinnaavai.

Kirkegaardili naapertorlugu tamanna inatsisinut naapertuunnersoq apeqqutaaginnarpoq.

- Eqqartuussivimmi suliassanngortinneqarpat aatsaat paasissavarput, siunnersortaaneq oqarpoq.

- Trumpip oqaasii soorunami maluginiartariaqarput. Pingaarnerpaamilli iliuusii maluginiarneqassapput. Tamanna iliuuseqarfigissaneraa apeqqutaaginnarpoq, taanna oqarpoq.

USA-mik niuernikkut isumaqatigiissuteqarusuttoq

Trumpili kisimi ingasattumik iliuuseqarumalluni sioorasaarinngilaq. Tusagassaqartitsivik Bloomberg naapertorlugu Europap inatsisartuini ilaasortat ilaasa Trumpip Kalaallit Nunaannik aqutsisinnaajunnaarnissaa EU-p USA-llu akornanni niuernikkut isumaqatigiissutip akuerineqarnissaanut aalajangiisuussasoq eqqarsaatersuutigaat.

- Nunat niuernikkut isumaqatigiissuteqartut tamarmik namminersortuuneq ataqqisariaqarpaat, Bernd Lange, Europa-Parlamentimi niuernermut ataatsimiititaliami ukiorpassuarni siulittaasoq tyskiusoq, isumaqatiginninniarnermillu aqutsisoq Bloombergimit apersorneqarami oqarpoq.