Trump: Kalaallit Nunaat pillugu isumaqatigiissummut sinaakkutissat piareerput

Nunarput pillugu siunissami isumaqatigiissummut sinaakkutissat suliarineqarput, tamatumalu saniatigut Kalaallit Nunaannik tapersersuisunut akitsuutit atorunnaarsinneqarput.

USA-p præsidentia Donald Trump Truth Socialimi taama allappoq.

- Nato-p generalsekretæria Mark Rutte pitsaasumik ataatsimeeqatigaara, tamannalu tunngavigalugu Kalaallit Nunaat Issittorlu tamakkerlugu isumaqatigiissusiornissamut sinaakkutissat suliarivagut, Trump allappoq.

Præsident naapertorlugu aaqqiissut tamanna atuutilersinneqarpat „USA-mut Natomilu nunanut tamanut iluaqutaalluinnassaaq“.

- Isumaqatigiissut tamanna tunngavigalugu akitsuutit februaarip aallaqqaataani atuutilersussaagaluit atuutilersissanngilakka, Trump oqarpoq.

Nunarput pillugu akerleriinneq sakkortusiartortillugu præsidentip Danmark Europamilu nunat allat akitsuusersuinissaannik sioorasaarpai.

Trumpip sioorasaarinermini februaarip aallaqqaataanit nunanut pineqartunut 10 procentimik akitsuusiiniarluni oqarsimavoq.

Isumaqatigiissummik naammassinnittoqanngippat akitsuut juunip aallaqqaataani 25 procentimut qaffanneqassasoq, præsidenti oqarsimavoq.

Mark Rutte Davosimi nunarsuaq tamakkerlugu aningaasaqarnermut tunngasunik oqallinnermi pingasunngornermi unnukkut naapippaa.