Trump: Kalaallit Nunaat ullut 20-it qaangiuppata oqaluuseritigu

Donald Trump piffissami aggersumi Kalaallit Nunaat pillugu iliuuseqarumaarnersoq (take any action) Air Force One-mi ataasinngornerup unnuaani  toqqaannartumik aperineqarpoq.

USA-p præsidentiata apeqqut ingerlaannaq akiumanngilaa:

- Kalaallit Nunaat eqqartornianngilara, Venezuela, Rusland Ukrainelu eqqartorniarpagut. Kalaallit Nunaat qaammatit marluk missaat qaangiuppata eqqarsaatigiumaarparput.

- Kalaallit Nunaat ullut 20-t qaangiuppata oqaluuseritigu, Donald Trump oqarpoq.

- Danmarkip nammassinnaanngilaa

Trumpilli USA-p nunami isumannaallisaanermut tunngatillugu Kalaallit Nunaat pisariaqartikkaa periarfissaq atorluarlugu erseqqissaqqippaa :

- Kalaallit Nunaata eqqaa russit kinamiullu umiarsuaanik ulikkaarpoq.

- Nunap isumannaatsuunissaa eqqarsaatigalugu Kalaallit Nunaat pisariaqartipparput, tamannalu Danmarkip nammassinnaanngilaa. Taama oqaluttuussinnaavassi, præsidenti oqarpoq.

Tamatuma kingorna præsidentip Danmarkip illersornissamut iliuuserisimasai assuarlerpai:

- Danmark qanittukkut Kalaallit Nunaanni isumannaallisaanermik qanoq annertusaasimanersoq nalunngilisiuk? Qimussinik ilasipput. Ilumoorpoq. Isumaqarput iliuuseqarluarlutik, Donald Trump oqarpoq.

Trump nangilluni oqarpoq:

- Uagut pissagipput (Kalaallit Nunaat, aaqq.) EU-p pisariaqartippaa, tamannalu nalunngilaat.

Venezuelami sakkutooqarnikkut akuliunnerup kingorna Kalaallit Nunaat pillugu oqallinneq sakkortusivoq

Trumpip unnuaq oqaaseqaatai sapaatip-akunnerata naanerani Kalaallit Nunaata USA-mi politikkikkut oqallinnermut ilanngutiteqqinneqarnerata kingorna saqqummiunneqarput.

USA-p Venezuelami præsidenti Maduro tigusaralugu aallarutereeraalu Katie Millerip, Det Hvide Husimi pisortaanerup tulliata nuliata, assi X-imi saqqummiuppaa. Assimi Kalaallit Nunaat Amerikap erfalasuata qalipaataanik qalipaaserneqarsimasoq takuneqarsinnaavoq, Katie Millerilu allassimalluni ERNIINNAQ.

Tamanna arlalinnik qisuariarfigineqarpoq, ilaatigut Naalakkersuisut siulittaasuannit Jens-Frederik Nielsenimit (D), taassumalu ilaatigut uivernissamut pissutissaqanngitsoq oqaatigaa.

Præsidentip tusagassiorfimmit The Atlanticimit sapaatiummat ualikkut  apersorneqarnermini USA-p Kalaallit Nunaannik pisariaqartitsinera uteqqimmagu pissutsit sakkortunerulerput:

- Kalaallit Nunaat pisariaqartilluinnarparput (we do need Greenland, absolutely, red.), Trump tusagassiorfik naapertorlugu oqarpoq.

Tamatuma kingorna Trumpip oqaasii ataqqinninngitsuliornerusut  Jens-Frederik Nielsen allappoq , ministeriunerlu Mette Frederiksen sakkortuumik aamma qisuariarpoq:

- USA-mut toqqaannartumik oqartariaqarpunga, ministeriuneq oqarpoq nangillunilu:

- USA-p naalagaaffeqatigiinni nunat pingasut arlaannaalluunniit tiguarsinnaanngilaa.