Trump Nuummi kisimi sammineqanngilaq: Tv-kkut malinnaaqqissaarpugut 

Assit takukkit: Oqaluttuarisaanermi naapinnermi tunuliaqutaasut malinnaavigikkit

Vivian Motzfeldt (S) aamma danskit Lars Løkke Rasmussen pingasunngornermi Washington D.C.-mi Marco Rubio aamma J.D. Vance peqatigalugit issiasut, maani angerlarsimaffimmi inuit amerlasuut malinnaapput.

Taakkua ilagaat Ellen K. Frederiksen, Qassiarsummi ataatsimiinnermik pingaarutilimmik uinilu malinnaaqqissaartut.

- Ippassaq Qaqortumit angerlartilluta ataatsimiinneq malinnaaffiginiassagatsigu tuavioratta aallartilivissoq apuuppugut, oqarasuaatikkut taama oqaluttuarpoq .

- Tv-kkut malinnaaqqissaarpugut pissangaqalutalu, oqarpoq.

Naak ataatsimiinneq sivitsoriartulermat, Ellen K. Frederiksenip angerlarsimaffiani pissanganeq qaffariartorpoq.

- Zelensky (Ukrainemi præsidenti, aaqq.) peqatigalugu ataatsimiinnera eqqaamavarput, tassanilu sivikitsumik ataatsimiinneq Trumpip pissusilersuinerlunnera pissutigalugu unitsinneqarmat, oqarpoq.

- Taavalu eqqarsarpugut, taamak sivisutigisumik tassani issiasut, taava neriuutissaqarpoq, sunaaffa suna piviusunngortussaq.

Naalakkersuisoq nunanut allanut tunngasunut ilisimatusarnermullu Vivian Motzfeldt (S), aamma Danmarkip nunanut allanut tunngasunut ministeria, ataatsimiittarfiup silataaniit tusagassiortunut nunarsuarmi tamarmiusunut saqqummiipput.

Amerikamiut oqaloqatiginissaannut atorfillit qulliunerusut aqqutigalugit attaveqaqatigiinnissamut periarfissaqalersoq inerniliunneqarpoq – naak USA-p præsidentiata Nunatta pigilernissaa suli takorloortuaraluaraa.

Takorluugaq Ellen K. Frederiksenip isumakuluutigisaa:

- Amerikamiut naalagaaffiannut ilanngukkutta qanoq pisoqassanersoq naluarput. Nalunngilarpulli USA nunap inoqqaavinut qanoq iliorsimasoq, taamaattumik ilanngunnavianngilagut, oqarpoq.

Ataatsimiinnissaat sioqqullugu Sermitsiap David Qujaukitsoq sinerissami avannarpasinnerpaami, Qaanaami najugaqartoq Sermitsiap aamma oqaloqatigaa.

Taassuma aamma sapaatip akunnerini kingullerni pisut malinnaavigai .

- Malinnaavugut. Sky News, CBS News, Fox News qallunaallu tusagassiorfii ullut tamaasa isiginnaartarpakka. BT, Politiken – TikTok, malinnaaffigisani taagullatsiarpai.

Taassuma Qaanaarmiut pisut qanoq inerneqassanersut aamma pissangatigigaat aamma oqaatigaa. Taamaattorli innuttaasut Amerikamiut USA-lu assigiinngitsunik isumaqarfigaat.

 - Inuit ilaasa Amerikamiut nuannarisarpaat – Donald Trump eqqarsaatiginngikkaluarlugu, inuppassuilli Amerikamiut nuannaraat, oqarpoq.

- Soorunami aamma nalunngilara præsidenti illuatungaannit nuannarineqarpianngitsoq, David Qujaukitsoq oqarpoq

Trumpip soqutiginninnera Tunumut periarfissiisoq

Tasiilami aamma pissutsit malinnaaffigineqarput, tamanna illoqarfimmi taxartartup Aron Kristiansenip oqaatigaa.

Trumpip Nunatsinnik tiguaanissaminik oqaatigisaa ajortuinnaanngitsoq, taanna isumaqarpoq.

 - Maluginiarneqarnerulernitsinnut iluaqutaavoq, tamannalu periarfissanik nutaanik pilersitsilluni, oqarpoq.

- Ajoqutaa tassaavoq amerlasuut ernummateqarnerat politikerinillu ulapputigineqarnerujussua. Suliassat Nunatsinnut tunngassuteqartut unittooqqasimapput, politikerit Trump pillugu ulapputeqarnerat pissutigalugu.

Siunissami takorloorneqarsinnaasutut Nunatta pisiariniarneranut Amerikamiut neqeroorutaannut akuersinikkut aningaasatigut iluanaaruteqartoqarsinnaanera Tasiilamut periarfissiissasoq, Aron Kristiansen isumaqarpoq.

- Nunaqqaterpassuavut ernumassuteqarput, nunalli pisiarineqarnissaanik aamma oqaaseqartoqarluni. Tunumik sumiginnaanersuaq eqqarsaatigalugu tamanna iluaqutaasumik kinguneqarsinnaavoq.

Qaanaami aamma taama assingusunik isummersortoqarpoq.

David Qujaukitsup tamatumani takusinnaavaa sanilinut Tuluttut oqaasilinnut attaveqarnertik iluaqutigalugu, Qaanaami eqqaanilu aalisarneq piniarnerlu pitsaanerusumik siunissaqalersitsisinnaasut.

- Allannguisariaqarpugut. Maani innuttaasut sumiginnarneqartutut misigisimapput, David Qujaukitsoq oqarpoq.

- Ukiuni kingullerni tallimani maani piniartut atugarissaarpallaarsimanngillat.

- Ernumasariaqanngilagut

David Qujaukitsoq isumaqarpoq USA-p Nunatsinnik tiguaanissaa ernumagisariaqanngikkipput.

- Amerikamiut kalaallit ajoquserniarsarinavianngilaat. Uagut akeraqanngilagut. Ernumassutissaqanngilagut. Taama isumaqarpunga, oqarpoq.

USA-li eqqartortillugu David Qujaukitsup Amerikamiut Pituffimmi sakkutooqarfiannit ukiumoortumik juullimut tunissuteqartoqartarnera eqqaagaa, Ellen K. Frederiksenili Qassiarsummeersoq allanik maluginiagaqarpoq.

- Narsami Kuannersuarni aatsitassarsiorfimmik ammaasoqarnissaa ukiorpassuarni annilaanngatigaarput, maannali Naalakkersuisunit matuneqartoq, oqaluttuarpoq - USA-mut ilanngutissagutta ernumassutigaara taassuma (Trumpip) aatsitassaativut piiaarusuttunut tamaasa tuninialerumaarai Nunatsinnilu avatangiisitsinni aatsitassarsiorfiit avaqqutiinnarluta aallartillugit. Takorluugaq ajornerpaaq taamaappoq.

- Aappillerpunga oqaluttuarisaanermi pisoq uteqqittussanngortoq, oqaatsit nutaat atorlugit

Taamaakkaluartoq Nunatta, Danmarkip USA-llu Washingtonimi pingasunngormat ataatsimeeqatigiinnerisa kingorna oqaloqatigiillualerpasipput.

- USA-mik ataatsimeeqateqarnissaq pingaaruteqarpoq. Tusagassiuutit aqqutigalugit oqaloqatigiinnata issiaqatigiilluni oqaloqatigiittoqarmat. Tamanna ajunngitsumik aallartiffiujuaannartoq isumaqarpunga.