USA-p præsidentia, Donald Trump, Venezuela-p præsidentia Nicolás Madurop tigusarineqarsimaneranit assit siammarteqqaarallarpai Truth Social-imi.
Tusagassiivik Reuters allappoq.
Assimi Maduro takuneqarsinnaavoq amerikamiut umiarsuaanni "Iwo Jima"-mi.
Tusagassiorfik AFP naapertorlugu Maduro saviminernik paffequtserlugu tigusaasimasoq, isai assiaqutitaqartut, tusaasaqarsinnaajunnaarlugulu siutai asserneqarsimallutik.
Præsidentip ullumi siusinnerusukkut oqaatigaa, Maduro nulialu, Cilia Flores, New York-imukaanneqassasut.
"Sorsunnersuup aappaata kingorna saassussineq torrallataanerpaaq"
Præsident Donald Trump Mar-a-Lago-mi tusagassiortunik katersortitsinermini aallartikkami, erseqqissaatigaa saassussineq iluatsilluartoq:
- Saassussineq sorsunnersuup aappaaniit taamak iluatsitsigisoq takuneqarsimanngisaannarpoq. USA-llu oqaluttuarisaanerani saassussinerit pitsaanerpaat ilagaat.
- Maduro unnuaanerani iluatsilluartumik tigusimavarput. Taartumi toqunartumilu.
Trump: Utaqqivaatigut
Maduro nulialu sukkasuumik tigusarineqarput. Præsidentip oqaatigaa USA-p sakkutuuisa takkunnissaat utaqqisimagaat.
- Nalunngilaat helikopterit, umiarsuit timmisartullu amerlasuut pigigigut. nalunngilaat tikittussaasugut.
USA Venezuelami aqutsigallassaaq
- Nuna aqussavarput, isumannaatsumik eqqortumillu tunniussinissarput qulakkeerneqarsinnaalernissaata tungaanut, Donald Trump oqarpoq.
- Annerusumik saassussinissatsinnut piareersimasimavugut, pisariaqassappat. pisariaqanngitsutulli isikkoqarpoq, kisianni suli piareersimavugut.
Trump Maduromut tapersersuisunut mianersoqqusivoq
- Tamanna mianersoqqusissatut atorneqartariaqarpoq, USA-p naalagaaffiup kiffaanngissusia navianartorsiortikkusuttunut tamanut, Donald Trump oqarpoq.
- Venezuelami politikerit tamarmik paasisariaqarpaat, Maduromut pisimasoq namminnerminnut pisinnaammat, innuttaasunut eqqortumik iliorsinnaanngikkunik.
- Venezuelami innuttaasut kiffaanngissuseqarput. Sivisuumik suliaq ingerlasimavoq, kisianni maanna kiffaanngissuseqalerput.
Amerikamiut uuliasiorfii Venezuelaliartinneqassapput
Amerikamiut præsidentiat, Donald Trump, Marl-a-Lago-mi tusagassiortunik katersortitsinermi oqarpoq amerikamiut uuliasiorfii venezuelamut aallartinneqassasut.
- Suliffeqarfiit angisuut Venezuelamukassapput dollarillu miliardillit atorlugit. uuliamik atugarliortitsinerup iluarsaanissaanut aningaasarsiorsinnaalissapput.
Trumpip oqaatigaa, USA-p Venezuelap uuliamik inuussutissarsiorsinnaanera pilersissimallugu. Tamatumali kingorna "Saamerliuniat" USA-mit uuliamik inuussutissarsiorsinnaanera tillissimasut.
- Taamaattoqaraluartoq uagut iliuuseqanngilagut. Uanga maanna iliuuseqarpunga.
FN-ip pisortaanera saassussinerup kingunerisassaanik ernumassuteqarpoq
FN-ip pisortaanera, antónio guterres, ernumassuteqarpoq amerikamiut venezuelamut saassussinerat nunap immikkoortuani kingunerisassaanik ernummateqarpoq.
Taama nutaarsiassaqartitsivik reuters naapertorlugu oqarpoq.
- Ineriartorneq ulorianartumut killissinnaavoq.
Taassuma apeqquserpaa ernumassutigalugulu, saassussinermut atatillugu nunat tamalaat inatsisaat ataqqineqarsimanersut .
Venezuelamut saassussinermut Kina isornartorsiuivoq
Kina sakkortuumik isornartorsiuivoq amerikamiut venezuelamut saassussinerat pillugu.
Naalagaaffiup naalakkersuisui oqaaseqarnerminni taamak oqarput nutaarsiassaqartitsivik reuters naapertorlugu.
- Kina sakkortuumik tupatsitaavoq, sakkortuumillu isornartorsiorparput USA-p naalagaaffimmik nammineq naalagaaffittut inissisimasumik taassumalu præsidentianik sakkortuumik saassussinerat pillugu, oqaatigineqarpoq.
Kinamit aamma oqaatigineqarpoq, amerikamiut iliuuserisaat Kina naapertorlugu nunat tamalaat inatsisaannut akerliusut aammalu nunap immikkoortuani eqqissinermik navianartorsiortitsisut.
Donald Trump-ip siornatigut oqaatigaa, Kina saassussinermut ajornartorsiutaassanngitsoq.
- Xi-mut (Kinap præsidentia, aaqq.) pitsaasumik attaveqarpunga. Kina ajornartorsiuteqassanngilaq saassussinermut, taakkumi aamma uuliamik pissarsissapput, Reuters allappoq.
Brasiliap USA'p saassussinera isornartorsiorpaa
Brasiliap sakkortuumik USA'p Venezuela'mut saassussinera isornartorsiorpaa.
Taama oqarpoq nunap præsidentia Luiz Inácio Lula da Silva, nutaarsiassaqartitsivik Reuters naapertorlugu.
- Taamatut iliuuseqarneq Venezuela'p naalagaaffiup killeqarfianik sakkortuumik unioqqutitsineruvoq. Iliuuseqarneq Latinamerikami aamma Caribiamik politikki pillugu sunniuteqarnerpaaffiusimasut eqqaamanninneratulli ippoq, aamma nunap eqqissisimasumik inissisimanera navianartorsiortippaa, taama oqarpoq.
Præsidentip naqissuserpaa, isumaqatigiinniarnerup suleqatigiinnerullu siuarsarneqarnissaa kissaatigineqartoq.
- Nunat allat saassussinerat nunat tamalaat inatsisaannik unioqqutitsineruvoq, aamma nunarsuarmi saassussinernik, eqqissiviilliornernik aamma isumannaatsuunnginnernik ulikkaartumik aallartisaaneruvoq, aamma nukittunerpaaq pisinnaatitaaffeqartoq.
Mexicop sakkortuumik USA'p saassussinera isornartorsiorpaa
Mexicop sakkortuumik USA Venezuela'mut saassussinera pillugu isornartorsiorpaa.
Taamak oqarput nunap naalakkersuisui nalunaarummi nutaarsiassaqartitsivik AFP naapertorlugu.
Mexicop oqaatigaa, sakkutooqarnerup qanoq ittuunera tamarmi Amerika Kujalliup eqqissisimaneranut navianartorsiortitsisoq.
Maduro iperagaarnissaa Ruslandip kaammattuutigaa
Ruslandimi nunanut allanut ministeriaqarfiup USA kaammattorpaa "naalagaaffiup præsidentia inatsisit naapertorlugit qinerneqarsimasoq" iperagaassasoq.
Taama oqarpoq ministeriaqarfik nalunaarummi nutaarsiassaqartitsivik Reuters naapertorlugu.
- Venezuela'p præsidentia, Nicolás Maduro, aamma nulia USA-miittut uppernarsarneqarmat, USA'p aqutsisui kaammattorpagut eqqarsaatiminnik allannguissasut præsidentilu nuliaalu iperagaassasut.
Meloni USA-p sakkutooqarnikkut iliuusaa ilalerpaa
Italiap ministeriunera, Giorgia Meloni, amerikamiut Venezuelami arfininngornerup unnuaani saassussinerat pillugu ilaliivoq.
Tassani oqaatigaa "inatsisit naapertorlugiot imminut illersornerusoq eqqortoq", nutaarsiassaqartitsivik AFP allappoq.
- Naalagaaffiup isumaqataaffiginngilaa, avataaniit sakkutooqarnikkut ingerlariaaseq atorlugu kisermaassisunik piiaanissaq. Kisianni imminut illersuutigaluni nunap isumannaatsuuneranut saassussinermut akiuiniarneruvoq inatsisitigut tunngavilik, taama oqarpoq.
Israel Maduro-p tigusarineqarnissaa nersualaarpaa
Israelip Venezuelap præsidentiata, Nicolás Madurop peerneqarnera tikilluaqquaa.
Nunap nunanut allanut naalakkersuisoqarfianit Reuters naapertorlugu Israel nalunaarpoq.
- Israel tikilluaqquaa, kisermaassisup, Ikiaroornartut peqqarniisaarniallu sakkugalugit ingerlatsisimasoq aamma peqqarniitsumik aqutsisup, peerneqarnera. Neriuutigaarput tamat oqartussaaqataanerat naalagaaffimmut uterteqqinneqassasoq, aamma naalagaaffiit akornanni attaveqatigiinneq pitsanngussasoq.
Maluginiagassaq: Allaaserisaq katiterneqarpoq Ritzau-p Liveblog-ianiit pisimasumut tunngatillugu.
Allaaserisap naammassinerani nunat assigiinngitsut amerlasuut USA-p saassussineranut qisuariaateqarsimapput, aamma nunat amerliartortut piumasarivaat Naalagaaffiit Peqatigiiffiata FN-ip isumannaatsuunissamut ataatsimiititaliaa ataatsimiissasoq pisimasumut tunngatillugu.
