Trumpip akitsuutinik qaffaanissamik sioorasaarinerata kingorna Canadap ikaartarfiup ammaanersiornerani nalliuttorsioqatigiinnissaq taamaatikkaa

USA-p Canadallu akornanni ikaartarfik Gordie Howe International Bridgep, Canadami Ontariomiit USA-milu naalagaaffimmut Michiganimut atasup, atoqqaartinneqarnerani nalliuttorsiornissaq Canadap taamaatippaa.

Det Hvide Hus-ip ataasinngornermi, Canadamiut nioqqutissiaannik 50 procentinik 19 augut aallarnerfigalugu akitsuusersuiniarluni nalunaaruteqarnerata kingorna, taama pisoqarpoq.

Taama Canadami attaveqarnermut ministerip oqaaseqartartua, Gregor Robertsen, nutaarsiassaqartitsivimmut Reutersimut oqarpoq.

- USA-p sapaatip akunnerani matumani siusinnerusukkut niuernikkut iliuuseqarniarluni sioorasaarinera, eqqarsaatigalugu nunat taakku marluk ataatsimoorlutik nalliuttorsiornissaat naleqqutinngilaq, oqaaseqartartoq Jenna Ghassabeh nalunaarummi allappoq.

Pilersaarut malillugu ikaartarfik ataasinngornermi juulip 27-ani angallannermut ammaanneqassaaq.

USA-mi Canadamilu atorfilittat peqatigalugit, pisortatigoortumik atoqqaarfissiortitsineq tallimanngornermi juulip 24-ani, ingerlanneqarnissaa pilersaarutaasimagaluarpoq.

Ghassabehmi Reuters naapertorlugu, Canadap juulip 27-vani ikaartarfiup, ammarnissaa suli pilersaarutigaa. Taamaattorli nalliuttorsiorneq canadamiut peqatigalugit juulip 24-viani ingerlanneqassaaq.

Ikaartarfik, Canadami inunngortup National Hockey League-mi tusaamasap Gordie Howeugaluup aqqanik taaguuserneqarpoq, sanaartornerlu 2018-mi aallartilluni.

Ikaartarfiup sanaartornera 4,7 milliardit dollarit, tassa 30,8 milliarder krouunit missaani akeqarpoq.

USA-p præsidentiata Donald Trumpip ikaartarfiup ammarnissaa unitsinniarlugu februaarimi sioorasaarivoq, ilaatigut Canadap Amerikamiut imigassaannik tuniniaasarunnaarnera immunnillu nioqqutissanik eqqussuinermut akitsuusiisimanera pissutigalugu.

Aamma Amerikamiut atortuinik kiffartuussinerannillu annerusumik atuisoqannginnera isornartorsiorpaa, isumaqarlunilu ikaartarfiup minnerpaamik affaa USA-p pigisariaqaraa.

RITZAU