Trumpip illersornissamut periusissiaani nutaami nunarput arlaleriarluni taaneqarpoq
Ukiut sisamakkaarlugit USA illersornissamut periusissiamik nutaamik suliaqartarpoq. Maanna saqqummiunneqartumi nunarput arlaleriarlugu taaneqarpoq.
Kalaallit nunaat tassaavoq præsident Trumpip nutaamillu amerikamiut sakkutooqarfissatut pilersaarutaanni pingaarutilik USA-mut. (Arkivfoto).
Foto: Mads Claus Rasmussen/Ritzau Scanpix
USA-p præsident Trumpillu nunap illersornissaanut periusissiaani nutaami nunarput arlaleriarluni taaneqarpoq.
Periusissiaq nutaaq USA-mi illersornissamut ministereqarfimmit, Department of War-imit, nunatta nalunaaqutaa malillugu unnukkut nalunaarutigineqarpoq.
Tassani nunarput USA-p sakkutooqarnikkut niuernikkullu soqutigisaanik pingaarutilinnik sammisaqarfissatut arlaleriarluni eqqaaneqarpoq.
Nunarput aallaqqaasiummi siullermik eqqaaneqarpoq, tassani allassimavoq USA-p præsidentiata Donald Trumpip præsidentitut aappassaanik atuuffini aallartikkaa ilaatigut USA-p pingaarutilinnut soorlu nunatsinnut tunngasunik oqartussaassuseqarnissaa qularnartoqartillugu.
Periusissiami aamma allassimavoq USA-p nunarsuup kitaani soqutigisai illersorneqassasut.
- USA-p nunanut pingaarutilinnut, pingaartumik Panamap Kanaalianut, Den Amerikansk Golfimut (Den Mexicanske Golf) Kalaallit Nunaannullu sakkutooqarnikkut niuernikkullu isersinnaanera qulakkeerumavarput, allassimavoq.
Nunap illersornissaanut periusissiaq ukiut sisamakkaarlugit nutarterneqartarpoq, kingullermillu 2022-mi saqqummiunneqarpoq præsidentiugallartup Joe Bidenip Demokraatineersup aqutsinerani.
Nutaarsiassaqartitsivik AFP allappoq periusissiaq nutaaq arlalitsigut allaanerulluinnartoq.
Ilaatigut allaanerussutigaa Washingtonimit tapersersorneqannginnerugaluarlutilluunniit iligiit akisussaaffimmik tigusinerusariaqartut, aammalu Kinamut Ruslandimullu aarlerinaatitut inissiisoqarnera sakkukinnerulluni.
Silap pissusiata allanngoriartornera, Bidenip aqutsinerani aarlerinartutut isigineqaraluartoq, 2026-mut pilersaarutini aamma eqqaaneqanngilaq.
Illersornissamut ministereqarfik allappoq „USA-p nunarsuarmi kitaani suleqatai“ iliuuseqarnerusariaqartut, ilaatigut Amerikamiut akerlilersuisuisa sumiiffinnik pingaarutilinnik tigusinnginnissaannut tunngatillugu.
Tassani nunarput immikkut eqqaaqqinneqarpoq.
- Illersornissamut ministereqarfiup nunat kitaaniittut suleqatigissavai anguniakkat taakku siuarsarniarlugit, kajumissaarniarlugit akisussaaffeqarnerulernissaannullu piginnaanngorsarniarlugit.
