Trumpip immikkut aallartitaa Kalaallit Nunaannut marsimi tikeraassaaq – isumaqatigiissuteqartoqartariaqartoq isumaqarpoq
Jeff Landryp Trumpip Kalaallit Nunaannut piumasaqaataa ilumoortuusoq apersorneqarnermini erseqqissarpaa.
Assi: Dale Zanine/Reuters/Ritzau Scanpix
Donald Trumpip Kalaallit Nunaat pillugu immikkut aallartitaa Jeff Landry Kalaallit Nunaannut tikeraarnissani marsimi pilersaarutigalugu Fox Newsimit apersorneqarluni oqarpoq.
Reuters allappoq.
Landryp isumaqatigiittoqarsinnaasoq isumaqarluni aamma oqarpoq.
- Isumaqarpunga tamanna pippat isumaqatigiissuteqartoqartariaqartoq, isumaqatigiissuteqartoqarumaartorlu, tallimanngornermi apersorneqarnermini oqarpoq.
Landry: Trump pimoorussivoq
Amerikamiut politikkeriisa aallartitaat Christiansborgimut tallimanngornermi tikeraarnerisa nalaanni taanna taama oqariartuuteqarpoq.
Trumpip immikkut aallartitaata Trumpip Kalaallit Nunaa pillugu piumasaqaatini pimoorukkaa aamma naqissuserpaa, Reuters allappoq.
- Danmarki (Trump, aaqq.) sunik ujartugaqarnini pillugu paasitippaa, maannalu nunanut allanut tunngasunut ministeri Marco Rubio præsidentillu tullia J.D. Vance isumaqatigiissusiornissaat pineqarpoq, Jeff Landry oqarpoq.
Trumpip piumasaqaatai arlaleriarluni saqqummiuttarai
USA-p Kalaallit Nunaat pigilerusullugu Trumpip piumasaa immikkut aallartitap arlaleriarluni ingerlateqqinnikuuaa.
Sisamanngornermi inuit attaveqaqatigiittarfianni X-imi aamma allappoq, tassani Amerikamiut isumannaatsuunissaannut Kalaallit Nunaat pingaaruteqartoq uteqqillugu.
- Nunat akeqqersimaartut sioorasaarinerat pissutigalugu Amerikamiut Issittumi aalajangersimalluinnarlutik iliuuseqartariaqarput, Landry aviisimi X-imi allappoq.
