Trumpip Iran piumasaqaateqanngitsumik tunniutiinnaqqullugu piumaffigaa
Iran tunniutiinnartinnagu USA-p Iranimut isumaqatigiissusiornissani soqutiginngikkaa, USA-p præsidentia oqarpoq.
USA-p præsidentiata Donald Trumpip Iranimi siuttussamik toqqaaqataaniarluni tusagassiuutinut arlalinnut oqarpoq.
Assi: Ken Cedeno/Reuters
Irani piumasaqaateqarani tunniutiinnanngippat USA-mit isumaqatigiissusiorfigineqarunnanngilaq.
USA-p præsidentia Donald Trump inuit attaveqaqatigiittarfianni Truth Social-imi allappoq.
- Iran piumasaqaateqanngitsumik tunniutiinnanngippat isumaqatigiissuteqarfigineqarsinnaanngilaq!, præsident allappoq.
USA-p Israelillu Iran ullut arfinillit matuma siorna saassutereeraallu taama nalunaaruteqarpoq. Ulluni aamma taama amerlatigisunik Iranip Kangia Kangillermiittut nunat arlallit saassuttaarpai - Israel ilanngullugu.
Sorsunnerup ulluani siullermi — arfininngornermi februaarip 28-anni — Iranip siuttua ayatollah Ali Khamenei Israelip illoqarfiani pingaarnerpaami Teheranimut saassussisoqarmat toqutaavoq.
Iranimi "nukittuumik akuerineqarsinnaasumillu" siuttussamik toqqaasoqassasoq, Trump allappoq.
USA-p præsidentia Iranip siuttussaanik nutaamik toqqaanermi peqataajumalluni sisamanngornermi tusagassiorfinnut Axiosimut Reutersimullu oqarpoq.
Tamatuma kingorna USA-p suleqatini peqatigalugit "qasusuilluni" Iranip "aningaasaqarnerata aatsaat taama annertutigilernissaa, pitsaanerulernissaa nukittunerulernissaalu" suliniutigilissavaa.
- Iran pitsaasumik siunissaqarpoq.
- Irani ingerlallualeqqilli (make Iran great agan), Trump Truth Socialimi allappoq.
Sorsunnermi tamatumani Israel USA-lu saassusseqqaartuupput, tamalu kingorna Iranip ilaatigut Israelip Arabiallu qeqertaasa ilaannut USA-p sakkutooqarfigisaasa ilaannut saassussinerit assingusut aallartippai.
Sorsunnerup aallartinnissaa sioqqullugu USA-p Iranillu atomimik sakkussiat pillugit isumaqatigiissut nutaaq sivisuumik isumaqatigiinniutigisimavaat, sapaatillu-akunnerini saassussinerit siulliit sioqqullugu nunanit taakkunannga marlunnit aallartitat Schweizimi illoqarfimmi Genèvemi arlaleriarlutik naapipput.
Iran atomimik sakkussialiornerminik killilersuinissamik atominillu qaartartussianik sanaartorunnaarnissamik isumaqatigiissummut akuersinngippat USA-p saassukkumaaraa Trumpip sioorasaarutigisareerpaa.
USA-p Israelillu Iran ukiup ataatsip ingerlanerani aappassaat saassuppaat. Israelip nunami atomimik nukissiorfinnut sakkutooqarfinnullu siorna juunimi saassussinerata kingorna ulluni aqqaneq-marlunni sorsuttoqalerpoq, USA-p kingorna peqataaffigiligaani.
/ritzau/
